ମସ୍କୋ/ୱାସିଂଟନ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଇରାନ ଏବଂ ଆମେରିକା ମଧ୍ୟରେ ବିବାଦର ସମାଧାନ ପାଇଁ ୱାସିଂଟନକୁ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଦେଇଛନ୍ତି। ବୁଧବାର ଏକ ଫୋନ୍ ବାର୍ତ୍ତାଳାପ ସମୟରେ, ପୁଟିନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ କହିଥିଲେ ଯେ, ଯଦି ଇରାନ ୪୪୦ କିଲୋଗ୍ରାମ ସମୃଦ୍ଧ ୟୁରାନିୟମ ରୁଷକୁ ଦେଇଦିଏ ତେବେ ପରମାଣୁ ଅସ୍ତ୍ର ସମସ୍ୟାର ସବୁଦିନ ପାଇଁ ସମାଧାନ ହୋଇଯିବ। ଆଲୋଚନାର ଏହି ଅଂଶ ବ୍ରିଟିଶ ଖବରକାଗଜ ଦି ଡେଲି ମେଲ୍ରେ ପ୍ରକାଶ ପାଇଛି। ରିପୋର୍ଟ ଅନୁଯାୟୀ,ପୁଟିନ ଏହାକୁ ରୁଷକୁ ହସ୍ତାନ୍ତର କରିବାକୁ ପରାମର୍ଶ ଦେଇଥିଲେ। ଇରାନ ଏଥିରେ ରାଜି ହେବ ବୋଲି ସେ କହିଥିଲେ। ତେବେ ପୁଟିନଙ୍କ ପ୍ରସ୍ତାବକୁ ଟ୍ରମ୍ପ ‘ନା’ କହି ସିଧାସଳଖ ପ୍ରତ୍ୟାଖ୍ୟାନ କରିଥିଲେ । ଟ୍ରମ୍ପ କହିଥିଲେ ଯେ ସମୃଦ୍ଧ ୟୁରାନିୟମକୁ ଆମେରିକାକୁ ହସ୍ତାନ୍ତର କରିବା ଏକମାତ୍ର ସମାଧାନ।
ଅନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି ଅନୁଯାୟୀ, ଇରାନ ପାଖରେ ବର୍ତ୍ତମାନ ୬୦ ପ୍ରତିଶତ ପର୍ଯ୍ୟନ୍ତ ସମୃଦ୍ଧ ୪୪୦ କିଲୋଗ୍ରାମ ୟୁରାନିୟମ ଅଛି। ଇରାନ ଏହି ପରିମାଣକୁ ୯୦ ପ୍ରତିଶତ ପର୍ଯ୍ୟନ୍ତ ସମୃଦ୍ଧ କରିବାକୁ ଚାହୁଁଛି। ଏହା ସହଜରେ ୧୧ଟି ପରମାଣୁ ଅସ୍ତ୍ର ଉତ୍ପାଦନ କରିପାରିବ। ଚଳିତ ସପ୍ତାହର ଆରମ୍ଭରେ ପୁଟିନଙ୍କୁ ଭେଟିଥିବା ଇରାନ ବୈଦେଶିକ ମନ୍ତ୍ରୀ ଆବାସ ଆରାଘଚିଙ୍କ ସହ ସାକ୍ଷାତ କରିବା ପରେ ଟ୍ରମ୍ପଙ୍କୁ ପୁଟିନ ଏହି ପ୍ରସ୍ତାବ ଦେଇଥିଲେ। ଏହା ଅନୁମାନ କରାଯାଉଛି ଯେ ଇରାନ ରୁଷକୁ ସମୃଦ୍ଧ ୟୁରାନିୟମ ହସ୍ତାନ୍ତର କରିବାକୁ ଇଚ୍ଛୁକ। ତଥାପି, ଇରାନ ଏ ବିଷୟରେ ଆନୁଷ୍ଠାନିକ ଭାବରେ କିଛି କହିନାହିଁ।
ଇରାନକୁ ରୁଷର ଏକ ସହଯୋଗୀ ରାଷ୍ଟ୍ର ଭାବରେ ବିବେଚନା କରାଯାଏ। ରୁଷ ଉପରେ ଇରାନର ପରମାଣୁ କାର୍ଯ୍ୟକ୍ରମକୁ ପାଣ୍ଠି ଯୋଗାଇବାର ମଧ୍ୟ ଅଭିଯୋଗ ଆସିଛି। ଇରାନ ଏବଂ ରୁଷ ମଧ୍ୟ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଅଂଶୀଦାର। କ୍ରେମଲିନ୍ ଅନୁଯାୟୀ, ପୁଟିନ୍ ଇରାନ ଉପରେ ଆଉ ଏକ ଆକ୍ରମଣ ବିରୋଧରେ ଟ୍ରମ୍ପଙ୍କୁ ଚେତାବନୀ ଦେଇ କହିଥିଲେ ଯେ ଏହା ଯୁଦ୍ଧକୁ ଆହୁରି ତୀବ୍ର କରିବ। ପୁଟିନ୍ ବିବାଦର ସମାଧାନ ପାଇଁ ଆଲୋଚନା ପାଇଁ ଅନୁରୋଧ କରିଥିଲେ। ଏହି ସମୟରେ, ରାଷ୍ଟ୍ରପତି ଟ୍ରମ୍ପ୍ ସାମ୍ବାଦିକମାନଙ୍କ ସହ କଥାବାର୍ତ୍ତା କରି କହିଛନ୍ତି ଯେ ସେ ପୁଟିନଙ୍କୁ ସେ ୟୁକ୍ରେନ ଯୁଦ୍ଧ ବନ୍ଦ କରିବାକୁ ଅନୁରୋଧ କରିଛନ୍ତି। ଟ୍ରମ୍ପଙ୍କ ଅନୁସାରେ, ପୁଟିନ ଖୁବ୍ ଶୀଘ୍ର ଅସ୍ତ୍ରବିରତି ଘୋଷଣା କରିପାରନ୍ତି। ତଥାପି, ଏହି ଅସ୍ତ୍ରବିରତି କେବଳ ଅଳ୍ପ ଦିନ ପାଇଁ ରହିବ। ପ୍ରକୃତରେ, ରୁଷ ମେ’ ୯ ତାରିଖରେ ବିଜୟ ଦିବସ ପରେଡ୍ ଆୟୋଜନ କରୁଛି। ସେହି ଦିନ ଅସ୍ତ୍ରବିରତି ଘୋଷଣା କରିବାକୁ ଯୋଜନା କରୁଛି। ପୁଟିନ ଏବଂ ଟ୍ରମ୍ପ ବାଣିଜ୍ୟ ବିକାଶ ଉପରେ ମଧ୍ୟ ଆଲୋଚନା କରିଥିଲେ। ଉଭୟ ନେତା ସମ୍ପର୍କ ସୁଧାରିବା ଦିଗରେ କାମ କରିବାକୁ ସହମତ ହୋଇଥିଲେ।
ସୌଜନ୍ୟ ସମ୍ବାଦ
