ପ୍ରୟାଗରାଜ: ଉତ୍ତରପ୍ରଦେଶର ପ୍ରୟାଗରାଜରେ ଏକ ଅଜବ ଘଟଣା ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ଏଠାକାର ରାଜାପୁର ଅଞ୍ଚଳରେ ଥିବା ଏକ ଗ୍ରୋସରୀ ଦୋକାନ ବାହାରେ ଲାଗିଛି ଏକ ନିଆରା ବୋର୍ଡ। ଯେଉଁଥିରେ ଲେଖାଯାଇଛି, ‘ଏହି ଦୋକାନକୁ ମହିଳାଙ୍କ ଆସିବା ମନା’। ଏହାସହ ଦୋକାନୀ ଭଗବାନଙ୍କୁ ଅତି କମ୍ରେ ଗ୍ରାହକ ପଠାଇବାକୁ ମଧ୍ୟ ଅନୁରୋଧ କରିଛନ୍ତି। ବୋର୍ଡର ଫଟୋ ସାମ୍ନାକୁ ଆସିବା ପରେ ଏହାକୁ ନେଇ ଅନେକ ପ୍ରଶ୍ନ ଉଠିଛି।
ଏହି ଦୋକାନର ମାଲିକ ଘନଶ୍ୟାମ ବାବା। ତାଙ୍କ କହିବା ଅନୁଯାୟୀ, ଏହା କୌଣସି ପ୍ରଚାର କିମ୍ବା ଲୋକଙ୍କ ଦୃଷ୍ଟି ଆକର୍ଷଣ କରିବାର ଉଦ୍ୟମ ନୁହେଁ, ବରଂ ପରିସ୍ଥିତି ତାଙ୍କୁ ଏଭଳି ନିଷ୍ପତ୍ତି ନେବାକୁ ବାଧ୍ୟ କରିଛି। ତାଙ୍କ ଦୋକାନ ଆଖପାଖରେ ପ୍ରତିଦିନ ସନ୍ଧ୍ୟା ହେଲେ ମଦ୍ୟପଙ୍କ ଆସର ଜମୁଛି। ନିଶାସକ୍ତ ଲୋକମାନେ ସେଠାରେ ରହି ଯାତାୟାତ କରୁଥିବା ମହିଳାଙ୍କୁ ଅଶାଳୀନ ମନ୍ତବ୍ୟ ଦେବା ସହ ଦୁର୍ବ୍ୟବହାର କରୁଛନ୍ତି।
ମହିଳାମାନେ ଅସୁରକ୍ଷିତ
ଦୋକାନୀଙ୍କ କହିବା ଅନୁସାରେ, ଏଭଳି ଘଟଣା ଯୋଗୁଁ କେବଳ ମହିଳାମାନେ ଅସୁରକ୍ଷିତ ଅନୁଭବ କରୁନାହାନ୍ତି, ବରଂ ପୂରା ଅଞ୍ଚଳର ପରିବେଶ ମଧ୍ୟ ଖରାପ ହେଉଛି। ପ୍ରତିଦିନ ଏହି ସମସ୍ୟା ଦେଖି ଦେଖି ସେ ଅତିଷ୍ଠ ହୋଇପଡ଼ିଛନ୍ତି। ତେଣୁ ମହିଳାମାନେ ଦୋକାନକୁ ନଆସିଲେ ମଦ୍ୟପଙ୍କ ଉତ୍ପାତ ମଧ୍ୟ କମିବ ବୋଲି ଭାବି ସେ ଏଭଳି ବୋର୍ଡ ଲଗାଇଛନ୍ତି।
ନିଷ୍ପତ୍ତିକୁ ସମର୍ଥନ
ଏହି ଘଟଣା ସୋସିଆଲ ମିଡିଆରେ ପହଞ୍ଚିବା ପରେ ଲୋକଙ୍କ ମଧ୍ୟରେ ଭିନ୍ନ ଭିନ୍ନ ମତ ପ୍ରକାଶ ପାଇଛି। କିଛି ଲୋକ ଦୋକାନୀଙ୍କ ପରିସ୍ଥିତିକୁ ବୁଝି ତାଙ୍କ ନିଷ୍ପତ୍ତିକୁ ସମର୍ଥନ କରିଛନ୍ତି। ଅନ୍ୟପକ୍ଷରେ ଅନେକ ଏହାକୁ ଭୁଲ୍ ବୋଲି କହିଛନ୍ତି। ସେମାନଙ୍କ ମତରେ, ମଦ୍ୟପଙ୍କ ଦୁର୍ବ୍ୟବହାର ପାଇଁ ମହିଳାମାନେ କାହିଁକି ଦଣ୍ଡ ଭୋଗିବେ? ଏଭଳି ସମସ୍ୟାର ସମାଧାନ କରିବା ପୁଲିସ ଓ ପ୍ରଶାସନର ଦାୟିତ୍ୱ।
ଏହି ଘଟଣା ମହିଳାଙ୍କ ସୁରକ୍ଷା ଏବଂ ସାଧାରଣ ସ୍ଥାନରେ ହେଉଥିବା ଅସଦାଚରଣକୁ ନେଇ ପୁଣିଥରେ ଚର୍ଚ୍ଚା ଆରମ୍ଭ କରିଛି। ଜଣେ ଦୋକାନୀ ନିଜ ବ୍ୟବସାୟ ଓ ମହିଳାଙ୍କ ସୁରକ୍ଷା ମଧ୍ୟରେ ଏଭଳି ନିଷ୍ପତ୍ତି ନେବାକୁ ବାଧ୍ୟ ହେବା ଘଟଣା ପ୍ରଶାସନର ଭୂମିକା ଉପରେ ମଧ୍ୟ ପ୍ରଶ୍ନ ଉଠାଇଛି। ତେବେ ଏହି ଘଟଣାରେ ପୁଲିସ ପକ୍ଷରୁ କୌଣସି ପଦକ୍ଷେପ ସମ୍ପର୍କରେ ଖବରରେ ଉଲ୍ଲେଖ ନାହିଁ।
ସୌଜନ୍ୟ ସମ୍ବାଦ
