ଆସ୍ତାନା (କାଜାଖସ୍ତାନ): ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଗୁରୁବାର ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଜଣେ ଅଭିଜ୍ଞ ଓ ବୁଦ୍ଧିମାନ ରାଜନେତା ଭାବରେ ପ୍ରଶଂସା କରିଛନ୍ତି, କିନ୍ତୁ କହିଛନ୍ତି ଯେ ତାଙ୍କ ପ୍ରତି ଏକାଧିକ ବାର ହତ୍ୟା ଉଦ୍ୟମ ପରେ ଟ୍ରମ୍ପ ସୁରକ୍ଷିତ ଅଛନ୍ତି ବୋଲି ସେ ବିଶ୍ୱାସ କରନ୍ତି ନାହିଁ। ଗତ ଜୁଲାଇ ମାସରେ ପେନ୍ସିଲଭେନିଆରେ ଏକ ହତ୍ୟା ଉଦ୍ୟମରେ ଡୋନାଲ୍ଡ ଟ୍ରମ୍ପ ଆହତ ହୋଇଥିଲେ। ସେପ୍ଟେମ୍ବର ମାସରେ ଟ୍ରମ୍ପଙ୍କ ଫ୍ଲୋରିଡା ଗଲ୍ଫ କୋର୍ସରେ ମଧ୍ୟ ଜଣେ ବ୍ୟକ୍ତି ରାଇଫଲରେ ତାଙ୍କୁ ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଥିଲା। କାଜାଖସ୍ତାନରେ ଏକ ଶିଖର ସମ୍ମିଳନୀ ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ପୁଟିନ କହିଛନ୍ତି ଯେ ଆମେରିକାର ନିର୍ବାଚନ ପ୍ରଚାର ଯେଭଳି ଚାଲିଥିଲା ସେଥିରେ ସେ ଆଶ୍ଚର୍ଯ୍ୟ ହୋଇଛନ୍ତି।
ସତର୍କ ରହିବାକୁ କହିଲେ ପୁଟିନ
ବାଇଡେନଙ୍କୁ ସମାଲୋଚନା ଓ ଟ୍ରମ୍ପଙ୍କୁ ପ୍ରଶଂସା
ଟ୍ରମ୍ପଙ୍କ ବିରୁଦ୍ଧରେ ଲଢ଼ିବା ପାଇଁ ସମ୍ପୂର୍ଣ୍ଣ ଅସଭ୍ୟ ପଦ୍ଧତି ସହ ଏକାଧିକ ବାର ହତ୍ୟା ଉଦ୍ୟମ ପର୍ଯ୍ୟନ୍ତ ହୋଇଥିଲା। ମୋ ମତରେ ସେ ଏବେ ସୁରକ୍ଷିତ ନୁହନ୍ତି। ‘ଦୁର୍ଭାଗ୍ୟବଶତଃ ଆମେରିକା ଇତିହାସରେ ଅନେକ ଘଟଣା ଘଟିଛି। ମୁଁ ଭାବୁଛି ସେ (ଟ୍ରମ୍ପ) ବୁଦ୍ଧିମାନ ଏବଂ ମୁଁ ଆଶା କରୁଛି ସେ ସତର୍କ ରହିବେ’ ବୋଲି ପୁଟିନ ଦୋହରାଇଛନ୍ତି। ଆମେରିକା ନିର୍ବାଚନ ପ୍ରଚାର ସମୟରେ ଟ୍ରମ୍ପଙ୍କ ପରିବାର ଓ ପିଲାମାନଙ୍କୁ ରାଜନୈତିକ ବିରୋଧୀମାନେ ଯେଉଁଭଳି ସମାଲୋଚନା କରିଛନ୍ତି ସେଥିପାଇଁ ସେ ଆହୁରି ଆଶ୍ଚର୍ଯ୍ୟ ହୋଇଛନ୍ତି। ରୁଷ୍ରେ ଡକାୟତମାନେ ମଧ୍ୟ ଏଭଳି ଉପାୟ ଅବଲମ୍ବନ କରିବେ ନାହିଁ। ପାଶ୍ଚାତ୍ୟ କ୍ଷେପଣାସ୍ତ୍ର ସାହାଯ୍ୟରେ ରୁଷ୍ ଉପରେ ଆକ୍ରମଣ କରିବାକୁ କିବ୍କୁ ଅନୁମତି ଦେଇ ୟୁକ୍ରେନରେ ଯୁଦ୍ଧକୁ ତ୍ୱରାନ୍ୱିତ କରିବାକୁ ବାଇଡେନ ପ୍ରଶାସନର ନିଷ୍ପତ୍ତିକୁ ସେ ଅପରିଣାମଦର୍ଶୀ ବୋଲି କହିଛନ୍ତି।
ସୌଜନ୍ୟ – ସମ୍ୱାଦ