ଦେବଗଡ଼,୧୭।୪(ଶଶାଙ୍କ ଶେଖର ଝାଙ୍କର): ଦେବଗଡ଼ ଜିଲାର ପ୍ରଧାନପାଟ ଜଳପ୍ରପାତ ଓଡ଼ିଶାର ଏକ ପ୍ରମୁଖ ପର୍ଯ୍ୟଟନସ୍ଥଳୀଭାବେ ଓଡ଼ିଶା ତଥା ରାଜ୍ୟ ବାହାରେ ସୁପରିଚିତ ତଥା ପ୍ରସିଦ୍ଧ ଲାଭ କରିଛି। ତେବେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ପଞ୍ଚମ ଶ୍ରେଣୀ ଭାଷା ମହକ ବହିରେ ପ୍ରଧାନପାଟ ସଂପର୍କିତ ବିଷୟବସ୍ତୁ ସ୍ଥାନ ପାଇଛି। ଯାହାକି ପ୍ରଧାନପାଟ ଇତିହାସରେ ଆଉ ଏକ ଫର୍ଦ୍ଦ ଯୋଡିହୋଇଯିବା ସହିତ ଜିଲା ପାଇଁ ଗୌରବ ଆଣିଦେଇଛି। ଉକ୍ତ ବିଷୟବସ୍ତୁରେ ପ୍ରଧାନପାଟ ଜଳପ୍ରପାତର ବିଶେଷତ୍ୱ ତଥା ବିଭିନ୍ନ ଲୋକକଥା ସଂପର୍କରେ ଛାତ୍ରୀଛାତ୍ରମାନଙ୍କ ଶିକ୍ଷଣୀୟ ସଂପର୍କରେ ବର୍ଣ୍ଣନା କରାଯାଇଛି। ସହରକୁ ଲାଗି ରହିଥିବା ଏହି ପାହାଡର ସୁଉଚ୍ଚରେ ସପ୍ତକୁଣ୍ଡ ମଧ୍ୟରୁ ବୋହି ଆସୁଛି ପ୍ରଧାନପାଟ ଜଳପ୍ରପାତର ଜଳସ୍ରୋତ। ତତ୍ସହିତ ପ୍ରଧାନପାଟ ପାଦଦେଶରେ ରହିଥିବା ‘ବସନ୍ତ ନିବାସ’ ଓ ‘ଲଳିତ ନିବାସ’ ନାମକ ଦୁଇଟି ରମଣୀୟ ଶେଳନିବାସ ସଂପର୍କରେ ମଧ୍ୟ ଉକ୍ତ ବିଷୟବସ୍ତୁରେ ସ୍ଥାନପାଇଛି। ଉକ୍ତ ଶେଳନିବାସରେ ରାଜା ବାସୁଦେବ ସୁଢଳଦେବ ଓ ରାଜା ସଚ୍ଚିତାନନନ୍ଦ ତ୍ରିଭୁବନ ଦେବଙ୍କ ସମୟରେ ରାଜ୍ୟର ବହୁ ବିଶିଷ୍ଟ କବି ଆସି ସାହିତ୍ୟ ଚର୍ଚ୍ଚା କରୁଥିଲେ। ଏବେ ବି ବହୁ ବିଶିଷ୍ଟ କବିଙ୍କ ଲେଖା ଆଜି ବି ବସନ୍ତ ନିବାସର କାନ୍ଥରେ ଖୋଦିତ ହୋଇ ରହିଛି। ଏହାସହିତ ମା’ ପଧାନୀ ବୁଢ଼ୀ ଦୈବୀ ଶକ୍ତିପୀଠ ଓ ଅନତିଦୂରରେ ପଞ୍ଚଖଣ୍ଡା, ଶକ୍ତିପୀଠ ଏବଂ ଭୁବନେଶ୍ବରରୁ କିପରି ପର୍ଯ୍ୟଟକମାନେ ଦେବଗଡରେ ପଂହଚି ପ୍ରଧାନପାଟ ଭ୍ରମଣ କରିପାରିବେ ସେ ସଂପର୍କରେ ଉଲ୍ଲେଖ କରାଯାଇଛି।
ସୌଜନ୍ୟ ଧରିତ୍ରୀ