ମସ୍କୋ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଜୈବ ଚିକିତ୍ସା ଗବେଷଣା ମାଧ୍ୟମରେ ମଣିଷର ଜୀବନକାଳ ବୃଦ୍ଧି କରିବା ପାଇଁ ଏକ କାର୍ଯ୍ୟକ୍ରମକୁ ପ୍ରାଥମିକତା ଦେଉଛନ୍ତି। ୨୬ ବିଲିୟନ ଡଲାରର ସରକାରୀ ଅନୁଦାନରେ ପାଣ୍ଠି ଯୋଗାଇ ଦିଆଯାଇଥିବା ଏହି କାର୍ଯ୍ୟକ୍ରମରେ ଜେନୋଟ୍ରାନ୍ସପ୍ଲାଣ୍ଟେସନ୍ ଭଳି ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଏବଂ ଘୁଷୁରୀରେ ପ୍ରତିରୋପଣଯୋଗ୍ୟ ମାନବ ଅଙ୍ଗ ବିକାଶ ପାଇଁ ପ୍ରୟାସ ଅନ୍ତର୍ଭୁକ୍ତ। ଏହି କାର୍ଯ୍ୟକ୍ରମ ମଣିଷକୁ ଦୀର୍ଘାୟୁ ପ୍ରଦାନ କରିବାର ଲକ୍ଷ୍ୟ ରଖିଛି। ରୁଷ ବୈଜ୍ଞାନିକମାନେ ମଣିଷର ଜୀବନକାଳ ୧୫୦ ବର୍ଷ ପର୍ଯ୍ୟନ୍ତ ବୃଦ୍ଧି କରିବାକୁ ଚେଷ୍ଟା କରୁଛନ୍ତି। ରୁଷ-ସମର୍ଥିତ ବୈଜ୍ଞାନିକ ପଦକ୍ଷେପରେ ଜିନ୍ ଥେରାପି, ଅଙ୍ଗ ମୁଦ୍ରଣ, ମିନି-ଘୁଷୁରୀ ଅଙ୍ଗ ଚାଷ ଏବଂ ଅତ୍ୟଧିକ ନିମ୍ନ ତାପମାତ୍ରା କ୍ରାୟୋଥେରାପି ଅନ୍ତର୍ଭୁକ୍ତ। ଏହି ସମସ୍ତ ନୂତନ ସ୍ୱାସ୍ଥ୍ୟ-ସଂରକ୍ଷଣ ପ୍ରଯୁକ୍ତିବିଦ୍ୟା ୨୬ ବିଲିୟନ ଡଲାରର ଏକ ବିଶାଳ ସରକାରୀ ପଦକ୍ଷେପର ଅଂଶ। ଏହି କାର୍ଯ୍ୟକ୍ରମ ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି ଯେ, ପୁଟିନ ଦୀର୍ଘାୟୁ ହେବା ପାଇଁ ଆଗ୍ରହୀ।
ରୁଷ ସରକାର ସମ୍ପ୍ରତି ଘୋଷଣା କରିଛନ୍ତି ଯେ, ବୈଜ୍ଞାନିକମାନେ ଦୀର୍ଘାୟୁ ପଦକ୍ଷେପର ଅଂଶ ଭାବରେ କୋଷଗୁଡ଼ିକର ବୟସ୍କ ହେବା ପ୍ରକ୍ରିୟାକୁ ଧୀର କରିବା ପାଇଁ ଜିନ୍-ଥେରାପି ଚିକିତ୍ସା ବିକଶିତ କରୁଛନ୍ତି। ଏପ୍ରିଲ ୨୩ ରେ, ରୁଷ ଉପ ବିଜ୍ଞାନ ମନ୍ତ୍ରୀ ଡେନିସ୍ ସେକିରିଂସ୍କି କହିଥିଲେ, ଏହି ଔଷଧ ବାର୍ଦ୍ଧକ୍ୟ ବିରୋଧରେ ଲଢ଼େଇରେ ସବୁଠାରୁ ଆଶାଜନକ ପଥ ମଧ୍ୟରୁ ଗୋଟିଏ। ରୁଷ ଗବେଷକମାନେ ଏବେ ଜେନୋଟ୍ରାନ୍ସପ୍ଲାଣ୍ଟେସନ୍ ଉପରେ କାମ କରୁଛନ୍ତି, ଏହା ବାୟୋପ୍ରିଣ୍ଟିଂ, ଅର୍ଥାତ୍, ଜୀବନ୍ତ ଟିସୁର ଥ୍ରୀଡି- ପ୍ରିଣ୍ଟିଂ ସହିତ ଜେନେଟିକାଲି ପରିବର୍ତ୍ତିତ ମିନି-ଘୁଷୁରୀ ଭିତରେ ମାନବ ଅଙ୍ଗ ବୃଦ୍ଧି କରିବାର ଏକ ପ୍ରକ୍ରିୟା। ବୈଜ୍ଞାନିକମାନେ ମାନବ କାର୍ଟିଲେଜ୍ ଟିସୁ ଏବଂ ଏକ ମୂଷା ଥାଇରଏଡ୍ ଗ୍ରନ୍ଥି ବାୟୋପ୍ରିଣ୍ଟ କରିଥିବା ଦାବି କରିଛନ୍ତି। ସେମାନଙ୍କର ଲକ୍ଷ୍ୟ ହେଉଛି ୨୦୩୦ ସୁଦ୍ଧା ସମ୍ପୂର୍ଣ୍ଣ ମାନବ ଅଙ୍ଗ ପ୍ରତିରୋପଣ ଲକ୍ଷ୍ୟ ହାସଲ କରିବା।
ଝିଅକୁ ଦେଲେ ଦାୟିତ୍ୱ
୨୦୨୪ମସିହାରେ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମର ଲକ୍ଷ୍ୟ ଜିନ୍ ଥେରାପି ଏବଂ ରିଜେନେରେଟିଭ୍ ଔଷଧକୁ ବିକଶିତ କରିବା। ରିପୋର୍ଟର ଆକଳନ ଅନୁଯାୟୀ ଏହି କାର୍ଯ୍ୟକ୍ରମ ୧୭୫,୦୦୦ ଜୀବନ ବଞ୍ଚାଇବାକୁ ସକ୍ଷମ ହେବ। ଗବେଷକମାନେ ଚଳିତ ଦଶନ୍ଧି ଶେଷ ସୁଦ୍ଧା ମଣିଷଠାରେ ସମ୍ପୂର୍ଣ୍ଣ ଅଙ୍ଗ ପ୍ରତିସ୍ଥାପନ କରିବାର କ୍ଷମତା ହାସଲ କରିବାକୁ ଲକ୍ଷ୍ୟ ରଖିଛନ୍ତି। କ୍ରେମଲିନ୍ ପ୍ରେସ୍ ସର୍ଭିସ୍ କହିଛି ଯେ, ଏହି କାର୍ଯ୍ୟକ୍ରମଗୁଡ଼ିକରେ ଅନେକ ବୈଜ୍ଞାନିକ କାମ କରୁଛନ୍ତି। ଏହି ପ୍ରକଳ୍ପଗୁଡ଼ିକ ସରକାରୀ ସମର୍ଥିତ। ଏହି ପଦକ୍ଷେପର କେନ୍ଦ୍ରରେ ପୁଟିନଙ୍କ ନିକଟତର ଦୁଇଜଣ ପ୍ରଭାବଶାଳୀ ବ୍ୟକ୍ତି ଅଛନ୍ତି। ପୁଟିନଙ୍କ ଝିଅ ଏଣ୍ଡୋକ୍ରାଇନୋଲୋଜିଷ୍ଟ ମାରିଆ ଭୋରୋଣ୍ଟସୋଭା ଏବଂ ସୋଭିଏତ୍ ଯୁଗର କୁର୍ଚାଟୋଭ୍ ଇନଷ୍ଟିଚ୍ୟୁଟ୍ର ମୁଖ୍ୟ ପଦାର୍ଥବିଜ୍ଞାନୀ ମିଖାଏଲ୍ କୋଭାଲଚୁକ୍।
ଅମରତ୍ୱ ବିଷୟରେ କହିବା କଷ୍ଟକର, କିନ୍ତୁ ଏହାଦ୍ବାରା ଗାଡ଼ିମଟର ଭଳି ମଣିଷର ନିଜ ଶରୀରକୁ ମରାମତି କରିବାର କ୍ଷମତା ନିଃସନ୍ଦେହରେ ବୃଦ୍ଧି ପାଇବ। ବିଜ୍ଞାନ ଏବଂ ଯାନ୍ତ୍ରିକୀକରଣର ଅଗ୍ରଗତି ଦ୍ୱାରା ମଣିଷର ଅଙ୍ଗଗୁଡ଼ିକର ମରାମତି ଏବଂ ପ୍ରତିରୋପଣ ସମ୍ଭବ ହୋଇପାରିବ ବୋଲି ମିଖାଏଲ କୋଭାଲଚୁକ୍ କହିଛନ୍ତି।
ସୌଜନ୍ୟ ସମ୍ବାଦ
