ଲଗାଣ ବର୍ଷା ପ୍ରଭାବରେ ବେହାଲ ବଣାଇଁ ଅଞ୍ଚଳ; ବାଗୁନ ନାଳରେ ଭାସିଗଲା ବାଇକ, ଅଫିସରେ ଆଣ୍ଠୁଏ ପାଣି
ବଣାଇଁ,୨୮।୭( ପ୍ରଦୀପ ତ୍ରିପାଠୀ ): ସୁନ୍ଦରଗଡ଼ ଜିଲା ବଣାଇଁ ଉପଖଣ୍ଡରେ ଦୁଇଦିନ ଧରି ଲଗାଣ ବର୍ଷା ଜାରି ରହିଛି । ଫଳରେ ଏକ ପ୍ରକାର ଜନଜୀବନ ପ୍ରଭାବିତ ହୋଇଛି । ଉପଖଣ୍ଡର ଗୁରୁଣ୍ଡିଆ ରେ ଲଗାଣ ବର୍ଷା ଯୋଗୁଁ ବନ୍ୟା ପରିସ୍ଥିତି ଦେଖିବାକୁ ମିଳିଛି । ବନବିଭାଗ କାର୍ଯ୍ୟାଳୟ, ମେଡିକାଲ, ବ୍ଲକ ପରିସର ପୁରା ପୁରି ଜଳମଗ୍ନ ହୋଇ ରହିଥିବା ବେଳେ ଗୁରୁଣ୍ଡିଆ ମୁଖ୍ୟ ରାସ୍ତା ଉପରେ ପ୍ରାୟ ଚାରି, ପାଞ୍ଚ ଫୁଟ ପର୍ଯ୍ୟନ୍ତ ବନ୍ୟା ଜଳ ପ୍ରବାହିତ ହେବାରେ ଲାଗିଛି ।
ମୁଖ୍ୟ ରାସ୍ତା ସଂଲଗ୍ନ ପ୍ରାୟ ଦୋକାନ, ବାସଗୃହ ଭିତରେ ଛାତିଏ ପାଣି ଥିବା ନେଇ ସାଧାରଣ ଜୀବନଯାତ୍ରା ପ୍ରଭାବିତ ହୋଇଛି । ଏନେଇ ଚିନ୍ତାରେ ପଡିଛନ୍ତି ଅଞ୍ଚଳବାସୀ । ଦୋକାନ ଭିତରେ ପାଣି ପଶିବା ଫଳରେ ଦୋକାନ ଭିତରେ ଥିବା ସବୁ ଜିନିଷ ପତ୍ର ନଷ୍ଟ ହୋଇଯାଇଛି । ସେପଟେ ଗୁରୁଣ୍ଡିଆର ଶିଶୁ ଉଦ୍ୟାନ ଭିତରେ ଦଶ ଫୁଟ ପାଣି ଲହଡି ଭାଙ୍ଗୁଛି । ଲୋକଙ୍କ ଘର ଭିତରେ ପାଣି ପଶି ବହୁତ ଆସବାବପତ୍ର ନଷ୍ଟ ହୋଇ ଯାଇଛି । ଗୁରୁଣ୍ଡିଆ ସ୍ୱାସ୍ଥ୍ୟ କେନ୍ଦ୍ର, ବ୍ଳକ କାର୍ଯ୍ୟାଳୟ ଭିତରେ ପାଣି ପଶି ବହୁତ କ୍ଷୟ କ୍ଷତି ହୋଇଛି । ଉପଯୁକ୍ତ ଡ୍ରେନ ବ୍ୟବସ୍ଥା ନଥିବାରୁ ବାରମ୍ବାର ଏମିତି ପରିସ୍ଥିତି ସୃଷ୍ଟି ହେଉଛି । ଅନୁରୂପ ଭାବେ ଲହୁଣିପଡ଼ା ଅଞ୍ଚଳର ପଟାଝରଣ ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇ ପଡିଛି । ସେପଟେ ବାଖରତୋଳା ଗ୍ରାମ ସଂଲଗ୍ନ ରାସ୍ତାରେ ବର୍ଷା ଜଳ ପ୍ରବାହିତ ଅଞ୍ଚଳକୁ ବାହ୍ୟଜଗତରୁ ବିଚ୍ଛିନ୍ନ କରିଦେଇଛି ।
କୋଇଡା ଖଣି ଅଞ୍ଚଳ କେବଲାଙ୍ଗ ଓ ସାନରକ୍ସି ପଞ୍ଚାୟତର ଅନେକ ଗ୍ରାମବାସୀଙ୍କ ଦୁଖ ସରୁନି । ଲଗାଣ ବର୍ଷାରେ ଜୀବନକୁ ବାଜି ଲଗାଇ ଯୁଗ ଯୁଗ ଧରି ଉଛୁଳା ନାଳ ପାର ହୋଇ ବିଦ୍ୟାଳୟ, ବଜାର, ହସପିଟାଲ ଆଦି ସ୍ଥାନକୁ ଯାଇଥାନ୍ତି । ବାରମ୍ବାର ପୋଲ ନିର୍ମାଣ ଦାବି କେବଳ ଦାବିରେ ହିଁ ରହିଯାଇଛି । ଆଜି ପ୍ରତ୍ୟୁଷରେ ପୁରୁଣାପାଣି ବାଗୁନ ନାଳର ପୋଲ ଉପରେ ପାଣି ବୋହୁଥିବା ବେଳେ ରକ୍ସି ଗ୍ରାମର ଜଣେ ଯୁବକ ରୁବେନ ବାରଜୋ କମଣ୍ଡ ପ୍ଲାଣ୍ଟ୍ କୁ ବାଇକ ଯୋଗେ ଯାଉଥିବା ବେଳେ, ପ୍ରଖର ସ୍ରୋତରେ ତାଙ୍କ ବାଇକ ଭାସି ଯାଇଥିଲା ହେଲେ ସେ ଅଳ୍ପକେ ବର୍ତ୍ତି ଯାଇଥିଲେ । କୋଇଡ଼ା ମୁଖ୍ୟ ସହର ଓ ଆଖପାଖ ଅଞ୍ଚଳରେ ରାସ୍ତା ଉପରେ ବନ୍ୟାଜଳ ଲହଡି ଭାଙ୍ଗୁଛି । ଆଗକୁ ଆହୁରି ବର୍ଷା ସମ୍ଭାବନା ରହିଛି ତେଣୁ ସାଧାରଣ ଲୋକ ସତର୍କ ରହିବା ପାଇଁ ଚାରିଟି ବ୍ଳକ ପ୍ରସାଶନ ପକ୍ଷରୁ ସତର୍କତା ଜାରି କରାଯାଇଛି ।
ସୌଜନ୍ୟ ଧରିତ୍ରୀ
