ସାବଧାନ! ରାଜଧାନୀରେ ଏହି ସବୁ ସ୍ଥାନରେ ଲାଗିଲା ବୋଲାର୍ଡସ, ନିୟମ ଉଲ୍ଲଂଘନ କଲେ କଟିବ ଚାଲାଣ

ଭୁବନେଶ୍ୱର,୧୩।୩(ତ୍ରିନାଥ ମହାନ୍ତି): ପୂର୍ବରୁ ଅମାନିଆମାନେ ବିଭିନ୍ନ ଛକରେ ରାସ୍ତାର ବାମ ପାର୍ଶ୍ୱରେ ଗାଡ଼ି ରଖୁଥିଲେ। ଫଳରେ ଆମ୍ବୁଲାନ୍ସ ଏବଂ ଅନ୍ୟ ଜରୁରିକାଳୀନ ସେବା ଯୋଗାଉଥିବା ଗାଡ଼ି ସହଜରେ ଯାଇପାରୁ ନ ଥିଲା। କିନ୍ତୁ ଏଥର ପୋଲିସ ଆକ୍ସନ ମୋଡକୁ ଆସିଛି। ରାସ୍ତାର ବାମ ପାର୍ଶ୍ୱକୁ ଫାଙ୍କା ରଖିବା ପାଇଁ ୨୦ଟି ଛକରେ ବୋଲାର୍ଡସ(ରୋଡ୍‌ ବ୍ୟାରିକେଡ୍‌) ଲଗାଇଛି। ଫଳରେ ବାମ ପାର୍ଶ୍ୱରେ କେହି ଗାଡ଼ି ରଖିବେ ନାହିଁ। ଯେଉଁମାନେ ଗାଡ଼ି ବାମପାର୍ଶ୍ୱରେ ରଖିବେ କିମ୍ବା ଏହାକୁ ଭାଙ୍ଗିବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଟ୍ରାଫିକ ଡିସିପି ତପନ ମହାନ୍ତି କହିଛନ୍ତି। ଏହା କିଭଳି କାର୍ଯ୍ୟକାରୀ କରୁଛି ତାହାକୁ ଅନୁଧ୍ୟାନ କରିବା ପାଇଁ ଅତିରିକ୍ତ ପୋଲିସ କମିଶର, ଟ୍ରାଫିକ୍‌ ଡିସିପି ଏବଂ ଅନ୍ୟ ଷ୍ଟାଫ୍‌ ବିଭିନ୍ନ ଛକ ବୁଲି ଦେଖିଛନ୍ତି।
ପ୍ରଥମ ଏକ ମାସ ଲୋକଙ୍କୁ ସଚେତନ କରିବା ପାଇଁ ଛଡ଼ାଯିବ। ପରେ କଡ଼ାକଡ଼ି ହେବ ଏନ୍‌ଫୋର୍ସମେଣ୍ଟ। ଯେଉଁମାନେ ଛକର ବାମପାର୍ଶ୍ୱ ବୋଲାର୍ଡସ ଡେଇଁ ଛିଡ଼ା ହୋଇଥିବେ, ସେମାନଙ୍କ ଘରକୁ ଚାଲାଣ ଯିବ। ସହରରେ ଲାଗିଥିବା ୧ହଜାର ସିସିଟିଭିରୁ ନିୟମ ଉଲ୍ଲଂଘନକାରୀଙ୍କୁ ଚିହ୍ନଟ କରାଯାଇ ଘରକୁ ଚାଲାଣ ପଠାଯିବ। ପ୍ରାଥମିକ ପର୍ଯ୍ୟାୟରେ ରାଜଧାନୀର ୨୦ଟି ଛକରେ ଏହି ବୋଲାର୍ଡସ ଲାଗିଛି। ଏହା ସଫଳ ହେଲେ ସହରର ଅନ୍ୟ ସ୍ଥାନରେ ଲଗାଯିବ। ଯେଉଁମାନେ ସିଧା ଏବଂ ଡାହାଣପଟକୁ ଯିବାକୁ ଥିବେ ସେମାନେ ବୋଲାର୍ଡସ ଭିତରେ ଛିଡ଼ା ହେବ। ଫଳରେ ବାମ ପଟ ଫାଙ୍କା ରହିବ। ଏହା ଲାଗିବା ପରେ ଟ୍ରାଫିକ ନିୟନ୍ତ୍ରଣ କିଛି ମାତ୍ରାରେ ସହାୟକ ହେଉଛି ବୋଲି ଅତିରିକ୍ତ ପୋଲିସ କମିଶନର ନରସିଂହ ଭୋଳ କହିଛନ୍ତି।

ସୌଜନ୍ୟ ଧରିତ୍ରୀ