ପୁଣି ବିମାନବନ୍ଦରରୁ ମାରିଜୁଆନା ଜବତ: ବିସ୍କୁଟ୍‌ ପ୍ୟାକେଟ୍‌ରୁ ୪କୋଟି ଟଙ୍କାର ନିଶା ଜବତ

ଭୁବନେଶ୍ବର: ଭୁବନେଶ୍ବର ବିଜୁ ପଟ୍ଟନାୟକ ବିମାନବନ୍ଦରରୁ ପୁଣି ଥରେ ଜର୍ମାନୀ ପ୍ରସ୍ତୁତ ମାରିଜୁଆନା ଜବତ କରାଯାଇଛି। ଗତଥର ପଶ୍ଚିମବଙ୍ଗର ୨ ମହିଳାଙ୍କଠାରୁ ପ୍ରାୟ ୧୦ କେଜି ମାରିଜୁଆନା ଜବତ କରାଯାଇଥିଲା ଏବଂ କଷ୍ଟମସ୍‌ ଅଧିକାରୀମାନେ ୨ମହିଳାଙ୍କୁ ଗିରଫ କରିଥିଲେ। ଏଥର କିନ୍ତୁ ରାଜସ୍ବ ଗୁଇନ୍ଦା ନିର୍ଦ୍ଦେଶାଳୟ(ଡିଆର୍‌ଆଇ) ଓ କଷ୍ଟମ ବିଭାଗ ମିଳିତ ଟିମ୍‌ ପଞ୍ଝା‌ରେ ଜଣେ କେରଳୀ ଚାଲାଣକାରୀ ଧରାପଡ଼ିଛି। ଚାଲାଣକାରୀ ବେଶ୍‌ ଚତୁରତାର ସହ ବିସ୍କୁଟ୍‌ ପ୍ୟାକେଟ୍‌ରେ ଭର୍ତ୍ତି କରି ମାରିଜୁଆନା ଆଣୁଥିଲେ ହେଁ ଡିଆର୍‌ଆଇ ସ୍କ୍ବାଡ୍‌ ଆଖିରୁ ଖସିପାରିନାହିଁ। ସେ ବ୍ୟାଙ୍କକ୍‌ରୁ ଭୁବନେଶ୍ବର ଆସୁଥିବା ଜଣାପଡ଼ିଛି। ତଦନ୍ତ ଶେଷ ହୋଇନଥିବାରୁ ବିଭାଗୀୟ ଅଧିକାରୀମାନେ ସବିଶେଷ ବିବରଣୀ ଦେଇନାହାନ୍ତି। କିନ୍ତୁ ଜବତ ମାରିଜୁଆନାର ମୂଲ୍ୟ ୪କୋଟି ଟଙ୍କାରୁ ଅଧିକ ହେବ ବୋଲି ସୂଚନା ଦେଇଛନ୍ତି।  ବ୍ୟାଙ୍କକ୍‌ରୁ ଭୁବନେଶ୍ବର ଆସୁଥିବା ବିମାନରେ ଜଣେ ବ୍ୟକ୍ତି ମାରିଜୁଆନା ନେଇ ଆସୁଥିବା ଖବର ପାଇ ଡିଆର୍‌ଆଇ ସ୍କ୍ବାଡ୍‌ ଛକି ରହିଥିଲା।

ବିସ୍କୁଟ୍‌ ପ୍ୟାକେଟ୍‌ରୁ ୪କୋଟି ଟଙ୍କାର ନିଶା ଜବତ
ଜର୍ମାନୀରୁ ଭୁବନେଶ୍ବର ଭାୟା ବ୍ୟାଙ୍କକ୍‌

ସନ୍ଦିଗ୍ଧ ବ୍ୟକ୍ତିଙ୍କ ଲଗେଜ୍‌ ଯାଞ୍ଚ କଲାବେଳେ କିଛି ବିସ୍କୁଟ୍‌ ପ୍ୟାକେଟ୍‌ରୁ ମାରିଜୁଆନା ମିଳିଥିଲା। ଜବତ ମାରିଜୁଆନାର ଓଜନ ପାଖାପାଖି ୪ କେଜି ହେବ ଏବଂ ବଜାର ମୂଲ୍ୟ ୪କୋଟି ଟଙ୍କାରୁ ଅଧିକ ହେବ ବୋଲି ଆକଳନ କରାଯାଇଛି। ଚାଲାଣକାରୀକୁ ଅଟକ ରଖି ପଚରାଉଚରା କରାଯାଉଛି। ପ୍ରାଥମିକ ସୂଚନାନୁସାରେ, ଏହି ଅଣଓଡ଼ିଆ ଯୁବକଜଣକ ଏକ ଏଜେନ୍‌ସି ପାଇଁ କାମ କରୁଛି। ତାଙ୍କୁ ଚାଲାଣକାରୀ ଭାବେ ନିଯୁକ୍ତି ମିଳିଛି ଏବଂ ଅଗ୍ରିମ ଆକାରରେ ସେ କିଛି ଟଙ୍କା ପାଇଛନ୍ତି ଏବଂ ଭାରତରେ ମାରିଜୁଆନା ପହଞ୍ଚାଇବା ପରେ ତାଙ୍କୁ ତାଙ୍କର ପୂରା ପ୍ରାପ୍ୟ ମିଳିବାର ଥିଲା। ମାତ୍ର ଉକ୍ତ ଏଜେନ୍‌ସି କିଏ, ସେମାନେ କେଉଁଠିକୁ ନିଶା ପଠାଉଥିଲେ, ଯୁବକଙ୍କଠାରୁ କିଏ ନିଶା ଗ୍ରହଣ କରିଥାନ୍ତା, ସେନେଇ କିଛି ତଥ୍ୟ ପଦାକୁ ଆସିପାରିନାହିଁ। ଏହା ଏକ ବଡ଼ ନେଟ୍‌ୱର୍କ ହୋଇଥିବାରୁ ଡିଆର୍‌ଆଇ ସ୍କ୍ବାଡ୍‌ ସତର୍କତାର ସହ ତଦନ୍ତ ଜାରି ରଖିଛି।

ସୂଚନାଯୋଗ୍ୟ ଯେ ୪ ତାରିଖ ଦିନ ଏହି ବିମାନବନ୍ଦରରୁ କୋଲକାତାର ୨ମୁସଲିମ୍ ମହିଳା ଧରାପଡ଼ିଥିଲେ। କଷ୍ଟମସ୍‌ ଅଧିକାରୀମାନଙ୍କ ଦ୍ବାରା ଗିରଫ ହୋଇଥିବା ୨ ମହିଳା ମାଲେସିଆ କ୍ବାଲାଲମ୍ପୁରରୁ ଭୁବନେଶ୍ବର ଆସୁଥିଲେ। ସେମାନଙ୍କଠାରୁ ପାଖାପାଖି ୧୦ କେଜି ଓଜନର ମାରିଜୁଆନା ମିଳିଥିଲା। ତେଣୁ ଲାଗଲାଗ ଭୁବନେଶ୍ବର ବିମାନବନ୍ଦରରୁ ମାରିଜୁଆନା ଜବତ ଘଟଣାକୁ ନେଇ ଚିନ୍ତା ପ୍ରକଟ କରାଯାଉଛି। ନିଶା ମାଫିଆମାନେ ଭୁବନେଶ୍ବରକୁ ମାରିଜୁଆନା ହବ୍‌ କରି‌ଦେଲେଣି ବୋଲି ସନ୍ଦେହ କରାଯାଉଛି। ଏଭଳି ଦାମୀ ନିଶାର ଗ୍ରାହକ ଭୁବନେଶ୍ବରରେ ଥିବା ସନ୍ଦେହ ସୃଷ୍ଟି ହୋଇଛି। ତେଣୁ ପୁଲିସ ଓ ଅବକାରୀ ବିଭାଗ ଏଦିଗରେ ଅଧିକ ଛାନ୍‌ଭିନ୍‌ କରିବା ଜରୁରି ହୋଇପଡ଼ିଛି।

ସୌଜନ୍ୟ-ସମ୍ୱାଦ