ଚେନ୍ନାଇ: ତାମିଲ ସୁପରଷ୍ଟାର ଜୋସେଫ ବିଜୟଙ୍କ ”ତାମିଲଗା ଭେଟ୍ରି କାଝାଗମ” (ଟିଭିକେ) ପାର୍ଟିର ଜଣେ ସକ୍ରିୟ କର୍ମୀଙ୍କୁ ଚେନ୍ନାଇରେ ଜଣେ ୧୦ ବର୍ଷୀୟ ନାବାଳିକାକୁ ଯୌନ ନିର୍ଯାତନା ଦେବା ଅଭିଯୋଗରେ ଗିରଫ କରାଯାଇଛି। ଅଭିଯୁକ୍ତଙ୍କୁ ଦିନେଶ ଓରଫ ପାମ୍ବୁ ଦିନେଶ(୪୩) ଭାବେ ଚିହ୍ନଟ କରାଯାଇଥିବା ବେଳେ ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି।
ପୋଲିସ ସୂଚନା ଅନୁଯାୟୀ, ମାଇଲାପୋରର ବାସିନ୍ଦା ପୀଡ଼ିତା ନାବାଳିକା ଜଣକ କାସିମେଡୁ ସିଙ୍ଗାରାଭେଲାନ ନଗରସ୍ଥିତ ନିଜ ସମ୍ପର୍କୀୟଙ୍କ ଘରକୁ ବୁଲିବାକୁ ଯାଇଥିବା ବେଳେ ଏହି ଅଘଟଣ ଘଟିଥିଲା। ଝିଅଟି ବାହାରେ ଖେଳୁଥିବା ସମୟରେ ଅଭିଯୁକ୍ତ ଦିନେଶ ତାଙ୍କୁ ପ୍ରଲୋଭନ ଦେଖାଇ ନିଜ ଘରକୁ ଡାକି ନେଇ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି। ଏଥିସହ ଏହି ବିଷୟରେ କାହାକୁ କହିଲେ ତାଙ୍କୁ ଜୀବନରୁ ମାରିଦେବାକୁ ମଧ୍ୟ ସେ ଧମକ ଦେଇଥିଲେ। ଏହି ସମ୍ବେଦନଶୀଳ ଘଟଣା ସମ୍ପର୍କରେ ନାବାଳିକା ଜଣକ ନିଜ ମାଉସୀଙ୍କୁ ଜଣାଇବା ପରେ ଗତ ମେ’ ୩ ତାରିଖରେ କାସିମେଡୁ ପୋଲିସ ଷ୍ଟେସନରେ ଅଭିଯୋଗ ଦାୟର କରାଯାଇଥିଲା। ମାମଲାଟି ଜଣେ ନାବାଳିକାଙ୍କ ସହ ଜଡ଼ିତ ଥିବାରୁ ପୋଲିସ ତୁରନ୍ତ ପୋକ୍ସୋ ଆଇନ ଅନୁଯାୟୀ ମାମଲା ପଞ୍ଜୀକୃତ କରି ତଦନ୍ତ ଭାର ରାୟପୁରମ ଅଲ୍ ଓମେନ୍ ପୋଲିସ ଷ୍ଟେସନକୁ ହସ୍ତାନ୍ତର କରିଥିଲା। ଭୋଟ ଗଣନା ଦିନ ଅର୍ଥାତ ମେ’ ୪ ତାରିଖରେ ଅଭିଯୁକ୍ତ ଜଣକ ଆର.କେ. ନଗର ନିର୍ବାଚନମଣ୍ଡଳୀର ଏକ ଗଣନା କେନ୍ଦ୍ରରେ ନିଜ ଦଳର ପ୍ରାର୍ଥୀଙ୍କୁ ସମର୍ଥନ କରିବା ପାଇଁ ଉପସ୍ଥିତ ଥିଲେ। ପୋଲିସ ତାଙ୍କୁ ସେଠାରେ ଗିରଫ କରିବାକୁ ଚେଷ୍ଟା କରି ବିଫଳ ହୋଇଥିଲେ ହେଁ, ପରବର୍ତ୍ତୀ ସମୟରେ ଟ୍ରାକିଂ କରି ସେହି ରାତିରେ ହିଁ ତାଙ୍କୁ ହେପାଜତକୁ ନିଆଯାଇଥିଲା। ଅଭିଯୁକ୍ତଙ୍କୁ ବର୍ତ୍ତମାନ କୋର୍ଟରେ ହାଜର କରାଯାଇ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ଏବଂ ପୋଲିସ ପ୍ରମାଣ ସଂଗ୍ରହ ସହ ଅଧିକ ତଦନ୍ତ ଜାରି ରଖିଛି।
ସୌଜନ୍ୟ ସମ୍ବାଦ