ଲଣ୍ଡନ: ବ୍ରିଟିସ ସାଂସଦ ରୁପର୍ଟ ଲୋ ନିକଟରେ ସଂସଦରେ ଦେଇଥିବା ଭାଷଣ ବ୍ରିଟେନରେ ସଂଗଠିତ ଶିଶୁ ଗ୍ରୁମିଂ ଗ୍ୟାଙ୍ଗର ଦୀର୍ଘ ଦିନର ପ୍ରସଙ୍ଗକୁ ପୁଣି ଥରେ ଏକ ଜାତୀୟ ବିତର୍କର କେନ୍ଦ୍ରବିନ୍ଦୁ କରିଛି। ପୀଡିତା ଝିଅମାନଙ୍କ ମର୍ମସ୍ପର୍ଶୀ ସାକ୍ଷ୍ୟ ପଢ଼ି ଲୋ ଗୃହକୁ ଥରାଇ ଦେଇଥିଲେ ଏବଂ ସରକାରଙ୍କଠାରୁ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଥିଲେ। ତାଙ୍କ ନିରପେକ୍ଷ ଅନୁସନ୍ଧାନ ସମୟରେ ସଂଗୃହୀତ ସାକ୍ଷ୍ୟ ବିଷୟରେ ଉଲ୍ଲେଖ କରି ଲୋ କହିଛନ୍ତି, ମୁଁ ଏହି ସଂସଦକୁ ଏହି ସାହସୀ ପୀଡିତାଙ୍କ ସାକ୍ଷ୍ୟ ଶୁଣିବାକୁ ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆହ୍ବାନ କରୁଛି। ସେ କହିଛନ୍ତି ଯେ ଅନେକ ଝିଅ ଯେଉଁମାନେ ପିଲାଦିନେ ଏହି ଗ୍ୟାଙ୍ଗର ଟାର୍ଗେଟ୍ର ଶିକାର ହୋଇଥିଲେ, ସେମାନେ ତାଙ୍କ ସହ ସେମାନଙ୍କର ଭୟଙ୍କର ଅନୁଭୂତି ବାଣ୍ଟିଥିଲେ।
ପୀଡିତାଙ୍କ ସାକ୍ଷ୍ୟ
ସାକ୍ଷ୍ୟରୁ ଅତ୍ୟଧିକ ହିଂସା ଓ ଯୌନ ଶୋଷଣର ଆଶ୍ଚର୍ଯ୍ୟଜନକ ମାମଲା ପ୍ରକାଶ ପାଇଛି। ଜଣେ ପୀଡିତା କହିଛନ୍ତି ଯେ, ଯେତେବେଳେ ତାଙ୍କୁ ମାତ୍ର ୧୨-୧୩ ବର୍ଷ ହୋଇଥିଲା, ଜଣେ ଅପରାଧୀ ତାଙ୍କ ଶରୀରରେ ଜବରଦସ୍ତ ମଦ ବୋତଲ ଢାଳି କାଚ ଭାଙ୍ଗି ଦେଇଥିଲେ। ଅନ୍ୟ ଜଣେ ମହିଳା ଦାବି କରିଛନ୍ତି ଯେ ଦୁର୍ବ୍ୟବହାର ସମୟରେ ଦେଶର ବିଭିନ୍ନ ସ୍ଥାନରେ ଅନେକ ପୁଲିସ ଅଧିକାରୀ ମଧ୍ୟ ତାଙ୍କ ସହ ଦୁଷ୍କର୍ମରେ ସମ୍ପୃକ୍ତ ଥିଲେ। ଜଣେ ୧୩ ବର୍ଷୀୟା ପୀଡିତା କହିଛନ୍ତି ଯେ ତିନି ବର୍ଷ ମଧ୍ୟରେ ତାଙ୍କୁ ପ୍ରାୟ ୬୦୦-୭୦୦ ବିଭିନ୍ନ ପୁରୁଷ ଦୁଷ୍କର୍ମ କରିଥିଲେ। ଅନ୍ୟ ଜଣେ ଝିଅ ୧୫ ବର୍ଷ ବୟସରେ ତାଙ୍କ ସହ ହୋଇଥିବା ଦୁଷ୍କର୍ମ ବିଷୟରେ କହିଥିଲେ ଯେ, ତାଙ୍କ ଗୁପ୍ତାଙ୍ଗ ଓ ମଳଦ୍ୱାରରୁ ରକ୍ତ ବାହାରୁଥିଲା। ଫୁଲା ଏତେ ଅଧିକ ଥିଲା ଯେ େସ ବସି ପାରୁ ନ ଥିଲେ। କେତେକ ସାକ୍ଷ୍ୟରେ ମଧ୍ୟ ଜଘନ୍ୟ କାର୍ଯ୍ୟ ବିଷୟରେ ଉଲ୍ଲେଖ କରାଯାଇଛି ଯାହା ନିଷ୍ଠୁରତାର ସୀମା ଅତିକ୍ରମ କରିଥିଲା। ପୀଡିତାମାନଙ୍କ ମଧ୍ୟରୁ ଜଣେ କହିଛନ୍ତି ଯେ ତାଙ୍କୁ ଭ୍ୟାନ୍ରେ ୧୫-୨୦ ଜଣ ଝିଅଙ୍କ ସହ କୁକୁର ପିଞ୍ଜରାରେ ବନ୍ଦ କରି ରଖାଯାଇଥିଲା। ଅନ୍ୟ ଜଣେ କହିଛନ୍ତି ଯେ ତାଙ୍କୁ କୁକୁରମାନଙ୍କ ଦ୍ବାରା ଦୁଷ୍କର୍ମ କରାଯାଇଥିଲା, ଯେତେବେଳେ ଆଖପାଖରେ ଥିବା ପୁରୁଷମାନେ ଭିଡିଓ ତିଆରି କରୁଥିଲେ, ହସୁଥିଲେ ଓ ବାଜି ଲଗାଉଥିଲେ। ପୀଡ଼ିତାମାନେ ଆହୁରି କହିଛନ୍ତି ଯେ ଅପରାଧୀମାନେ ସେମାନଙ୍କୁ ଧମକ ଦେଉଥିଲେ ଯେ ଯଦି ସେମାନେ କାହାକୁ କୁହନ୍ତି ତେବେ ସେମାନେ ସେମାନଙ୍କ ପରିବାର ସହିତ ସେମାନଙ୍କୁ ହତ୍ୟା କରିବେ।
ରିପୋର୍ଟରେ ପାକିସ୍ତାନୀ ବଂଶୋଦ୍ଭବ ଗ୍ୟାଙ୍ଗର ଉଲ୍ଲେଖ
ରୁପର୍ଟ ଲୋ ଗତ ବର୍ଷ ଅତି କମ୍ରେ ୮୫ଟି ଅଞ୍ଚଳରେ ‘ଗ୍ୟାଙ୍ଗ ଆଧାରିତ ଶିଶୁ ଯୌନ ଶୋଷଣ’ ଉପରେ ଏକ ନିରପେକ୍ଷ ଅନୁସନ୍ଧାନ କରିଥିଲେ। ଅନୁସନ୍ଧାନ ରିପୋର୍ଟରୁ ଜଣାପଡିଛି ଯେ ଏହି ଗ୍ୟାଙ୍ଗରେ ମୁଖ୍ୟତଃ ପାକିସ୍ତାନୀ ବଂଶୋଦ୍ଭବ ପୁରୁଷ ଅଛନ୍ତି, ଯେଉଁମାନେ ଦଶନ୍ଧି ଧରି ସକ୍ରିୟ ଅଛନ୍ତି। ଏହି ରିପୋର୍ଟରେ ପୁଲିସର ଘୋର ଅବହେଳା ଓ ଅନୁଷ୍ଠାନିକ ବିଫଳତାକୁ ମଧ୍ୟ ତୀବ୍ର ସମାଲୋଚନା କରାଯାଇଛି।
ଜାତିଆଣ ଭେଦଭାବ ଅଭିଯୋଗକୁ ଡରି କାର୍ଯ୍ୟାନୁଷ୍ଠାନ ହେଉନାହିଁ
ଏହି ପ୍ରସଙ୍ଗ ପ୍ରଥମେ ୟର୍କସାୟାରର ରୋଥରହାମ୍ ସହରରେ ସାମ୍ନାକୁ ଆସିଥିଲା। ୧୯୯୭ରୁ ୨୦୧୩ ମଧ୍ୟରେ, ସେଠାରେ ୧୪୦୦ରୁ ଅଧିକ ଶିଶୁ ଯୌନ ଶୋଷଣର ଶିକାର ହୋଇଥିଲେ। ପ୍ରଫେସର ଆଲେକ୍ସିସ୍ ଜୟଙ୍କ ୨୦୧୪ ରିପୋର୍ଟ ଅନୁଯାୟୀ, କର୍ତ୍ତୃପକ୍ଷ ଜାତିଆଣ ଭେଦଭାବ ଅଭିଯୋଗକୁ ଡରି ଏଥିରେ ହସ୍ତକ୍ଷେପ କରିନଥିଲେ। ରୋଚଡେଲ, ଅକ୍ସଫୋର୍ଡ, ଟେଲଫୋର୍ଡ, ବ୍ରିଷ୍ଟଲ ସମେତ ପ୍ରାୟ ୫୦ଟି ସହରରେ ସମାନ ଢାଞ୍ଚା ପୁନରାବୃତ୍ତି ହୋଇଥିଲା। ୨୦୨୩ରେ ତତ୍କାଳୀନ ପ୍ରଧାନମନ୍ତ୍ରୀ ଋଷି ସୁନକଙ୍କ ଦ୍ୱାରା ଗଠିତ ଶିଶୁ ଯୌନ ଶୋଷଣ ଟାସ୍କଫୋର୍ସ ଗୋଟିଏ ବର୍ଷରେ ୫୫୦ରୁ ଅଧିକ ସନ୍ଦିଗ୍ଧଙ୍କୁ ଗିରଫ କରିଥିଲା। ୨୦୨୩ରେ ପିଲାଙ୍କ ବିରୋଧରେ ୧.୧୫ ଲକ୍ଷରୁ ଅଧିକ ଯୌନ ଅପରାଧ ରିପୋର୍ଟ ହୋଇଥିଲା।
ସୌଜନ୍ୟ ସମ୍ବାଦ