Odisha: ଅନ୍ଧାର ହୋଇଯିବ ଅଧା ଓଡ଼ିଶା: ମାଛକୁଣ୍ଡ ପରେ ବାଲିମେଳାରୁ ବିଦ୍ୟୁତ୍ ଉତ୍ପାଦନ ଠପ୍
କୋରାପୁଟ ଜିଲ୍ଲାର ମାଛକୁଣ୍ଡ ପରେ ଶନିବାର ମାଲକାନଗିରି ଜିଲ୍ଲାର ବାଲିମେଳା ଜଳଭଣ୍ଡାରରୁ ବିଦ୍ୟୁତ୍ ଉତ୍ପାଦନ ଠପ୍ ହୋଇଯାଇଛି। ଅବିଭକ୍ତ କୋରାପୁଟ ଜିଲ୍ଲାର ଦୁଇ ପ୍ରମୁଖ ଜଳ ବିଦ୍ୟୁତ୍ ଉତ୍ପାଦନ କେନ୍ଦ୍ର ବନ୍ଦ ହେବା ପରେ ଅଧା ଓଡ଼ିଶାରେ ବିଦ୍ୟୁତ୍ ସେବା ବ୍ୟାହତ ହେବା ନେଇ ଆଶଙ୍କା ପ୍ରକାଶ ପାଇଛି।
ମାଲକାନଗିରି: କୋରାପୁଟ ଜିଲ୍ଲାର ମାଛକୁଣ୍ଡ ପରେ ଶନିବାର ମାଲକାନଗିରି ଜିଲ୍ଲାର ବାଲିମେଳା ଜଳଭଣ୍ଡାରରୁ ବିଦ୍ୟୁତ୍ ଉତ୍ପାଦନ ଠପ୍ ହୋଇଯାଇଛି। ଅବିଭକ୍ତ କୋରାପୁଟ ଜିଲ୍ଲାର ଦୁଇ ପ୍ରମୁଖ ଜଳ ବିଦ୍ୟୁତ୍ ଉତ୍ପାଦନ କେନ୍ଦ୍ର ବନ୍ଦ ହେବା ପରେ ଅଧା ଓଡ଼ିଶାରେ ବିଦ୍ୟୁତ୍ ସେବା ବ୍ୟାହତ ହେବା ନେଇ ଆଶଙ୍କା ପ୍ରକାଶ ପାଇଛି। ଉପର ମୁଣ୍ଡରେ କମ୍ ବର୍ଷା ଓ ଜଲାପୁଟ ଡ୍ୟାମ୍ରୁ ବାଲିମେଳାକୁ ପାଣି ଆସୁନଥିବାରୁ ଜଳସ୍ତର ଆଶାତୀତ ଭାବେ ହ୍ରାସ ପାଇଛି। ଜଳଭଣ୍ଡାରରେ ମାତ୍ର ୧୩ ପ୍ରତିଶତ ଜଳ ଗଚ୍ଛିତ ଥିବାରୁ ଖରିଫ ଚାଷ ପ୍ରଭାବିତ ଆଶଙ୍କାରେ ବିଦ୍ୟୁତ୍ ଉତ୍ପାଦନ ବନ୍ଦ ରଖିବାକୁ ନିଷ୍ପତ୍ତି ନେଇଛି ଜଳସମ୍ପଦ ବିଭାଗ। ଫଳରେ ଓଡ଼ିଶା ହାଇଡ୍ରୋ ପାୱାର କର୍ପୋରେସନ୍ (ଓଏଚ୍ପିସି) ଦ୍ବାରା ପରିଚାଳିତ ବିଦ୍ୟୁତ୍ କେନ୍ଦ୍ରର ୬ଟି ୟୁନିଟ୍ ବନ୍ଦ ରହିଛି।
୬ଟି ୟୁନିଟ୍ରୁ ଘଣ୍ଟାକୁ ଉତ୍ପାଦନ ହେଉଥିଲା ୩୭୦ ମେଗାୱାଟ୍
ଉପର ମୁଣ୍ଡରେ ବର୍ଷା କମ୍, ଜଲାପୁଟ ଡ୍ୟାମ୍ରୁ ଆସୁନି ପାଣି
ଖରିଫ ଚାଷ ଲାଗି ଜଳ ସଂରକ୍ଷଣ ପାଇଁ ପ୍ରଶାସନର ପଦକ୍ଷେପ
ପୋଟେରୁ ସେଚ ପ୍ରକଳ୍ପର ମୁଖ୍ୟ ନିର୍ମାଣ ଯନ୍ତ୍ରୀଙ୍କ ସୂଚନାନୁସାରେ, ବାଲିମେଳା ଜଳଭଣ୍ଡାରର ସର୍ବୋଚ୍ଚ ଜଳସ୍ତର ୧୫୧୬ ଫୁଟ। କ୍ୟାଚ୍ମେଣ୍ଟ ଅଞ୍ଚଳରେ କମ୍ ବର୍ଷା କାରଣରୁ ଜଳସ୍ତର ଏବେ ୧୪୫୫.୬୦ ଫୁଟକୁ ଖସି ଆସିଛି। ୨୦୨୫ ଏହି ସମୟରେ ଜଳଭଣ୍ଡାରରେ ୧୯.୯୪ ପ୍ରତିଶତ ପାଣି ଗଚ୍ଛିତ ଥିଲା। ଗତ ବର୍ଷ ଏହି ସମୟରେ ଜଳଭଣ୍ଡାର କ୍ୟାଚ୍ମେଣ୍ଟ ଅଞ୍ଚଳରେ ୭୭୮ ମିମି ବର୍ଷା ହୋଇଥିଲା। ଚଳିତ ବର୍ଷ କ୍ୟାଚ୍ମେଣ୍ଟ ଅଞ୍ଚଳରେ ୫୧୯ ମିମି ବର୍ଷା ରେକର୍ଡ କରାଯାଇଛି। ପୂର୍ବ ବର୍ଷ ଅପେକ୍ଷା ୨୫୯ ମିମି କମ୍ ବର୍ଷା ହୋଇଥିବାରୁ ଜଳସ୍ତର ଖସିବାରେ ଲାଗିଛି। ଅନ୍ୟପକ୍ଷରେ ମାଛକୁଣ୍ଡ ଜଳବିଦ୍ୟୁତ୍ କେନ୍ଦ୍ରରେ ଅଗ୍ନିକାଣ୍ଡ ପରେ ବିଦ୍ୟୁତ୍ ଉତ୍ପାଦନ ବନ୍ଦ ରହିଛି। ଜଲାପୁଟ ଡ୍ୟାମ୍ରୁ ଆବଶ୍ୟକ ପରିମାଣର ପାଣି ତଳମୁଣ୍ଡରେ ଥିବା ବାଲିମେଳା ଜଳଭଣ୍ଡାରକୁ ଆସିପାରୁନି।
ସୌଜନ୍ୟ ସମ୍ବାଦ
