ନୂଆଦିଲ୍ଲୀ,୨୩।୭: କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ‘ପ୍ରଶସ୍ତ’ (PRASHAST) ଆପ୍ ମାଧ୍ୟମରେ ସ୍କୁଲ ପିଲାମାନଙ୍କଠାରେ ଶିକ୍ଷଣ ଅକ୍ଷମତା ଏବଂ ଦିବ୍ୟାଙ୍ଗତାକୁ ପ୍ରାରମ୍ଭିକ ପର୍ଯ୍ୟାୟରେ ହିଁ ଚିହ୍ନଟ କରିବାକୁ ଅନୁରୋଧ କରିଛନ୍ତି। ବୁଧବାର ସେ କହିଛନ୍ତି ଯେ ସରକାର ଶିକ୍ଷା ମନ୍ତ୍ରୀଙ୍କ ଦ୍ୱାରା ବିକଶିତ ‘ପ୍ରଶସ୍ତ’ ଆପ ଜରିଆରେ ଶିକ୍ଷଣ ଅକ୍ଷମତା ଥିବା ପିଲାମାନଙ୍କୁ ଶୀଘ୍ର ଚିହ୍ନଟ କରିବାକୁ ପ୍ରାଥମିକତା ଦେଉଛନ୍ତି।
ସେ ଏହି କଥା ଉପରେ ଜୋର୍ ଦେଇଛନ୍ତି ଯେ ଜାତୀୟ ଶିକ୍ଷା ନୀତି (NEP) ୨୦୨୦ ଅଧୀନରେ ଆରମ୍ଭ କରାଯାଇଥିବା ଏହି ପଦକ୍ଷେପର ଉଦ୍ଦେଶ୍ୟ ହେଉଛି ଭିନ୍ନକ୍ଷମ ପିଲାମାନଙ୍କୁ ମୁଖ୍ୟସ୍ରୋତର ଶିକ୍ଷା ସହିତ ଯୋଡ଼ିବା। ଶିକ୍ଷା ମନ୍ତ୍ରୀ ଏହିସବୁ କଥା ସଂସଦର କାର୍ଯ୍ୟାନୁଷ୍ଠାନ ସ୍ଥଗିତ ରହିବା ସମୟରେ ଓଡ଼ିଶାର ଭାଜପା ସାଂସଦମାନଙ୍କ ସହିତ ହୋଇଥିବା ବୈଠକରେ କହିଛନ୍ତି। ସେ କହିଛନ୍ତି ଯେ ସାଂସଦମାନେ ରାଜ୍ୟର ବିକାଶ ସହିତ ଜଡ଼ିତ ପ୍ରସଙ୍ଗଗୁଡ଼ିକ ଉପରେ ଆଲୋଚନା କରିଛନ୍ତି, ଯେଉଁଥିରେ ପଢ଼ିବା-ଶିଖିବା ପ୍ରକ୍ରିୟାରେ ଅସୁବିଧାର ସମ୍ମୁଖୀନ ହେଉଥିବା ପିଲାମାନଙ୍କ ଶିକ୍ଷା ଉପରେ ବିଶେଷ ଧ୍ୟାନ ଦିଆଯାଇଛି। ଧର୍ମେନ୍ଦ୍ର ପ୍ରଧାନ କହିଛନ୍ତି, “ଆମର ମୁଖ୍ୟ ଉଦ୍ଦେଶ୍ୟ ହେଉଛି ପ୍ରାରମ୍ଭିକ ପର୍ଯ୍ୟାୟରେ ସଂଘର୍ଷ କରୁଥିବା ପିଲାମାନଙ୍କୁ ଚିହ୍ନଟ କରିବା, ସେମାନଙ୍କୁ ସଠିକ ପଦ୍ଧତିରେ ପଢ଼ାଇବା ଏବଂ ସେମାନଙ୍କ ଶୈକ୍ଷିକ ଫଳାଫଳରେ ସୁଧାର ଆଣିବା।”
ସୂଚନାଯୋଗ୍ୟ ଯେ, ସମଗ୍ର ଶିକ୍ଷା ଅଭିଜାନ ଅଧୀନରେ ଏନ୍ସିଇଆରଟି (NCERT) ଦ୍ୱାରା ପ୍ରସ୍ତୁତ କରାଯାଇଥିବା ‘ପ୍ରଶସ୍ତ’ (ପ୍ରି-ଆସେସ୍ମେଣ୍ଟ ହୋଲିଷ୍ଟିକ ସ୍କ୍ରିନିଂ ଟୁଲ) ଆପ, ‘ଦିବ୍ୟାଙ୍ଗଜନ ଅଧିକାର ଅଧିନିୟମ, ୨୦୧୬’ ଅନ୍ତର୍ଗତ ସ୍ବୀକୃତିପ୍ରାପ୍ତ ୨୧ ପ୍ରକାରର ଦିବ୍ୟାଙ୍ଗତା ପାଇଁ ସ୍କୁଲଗୁଡ଼ିକରେ ପିଲାମାନଙ୍କର ସ୍କ୍ରିନିଂ କରିବା ନିମନ୍ତେ ବିକଶିତ କରାଯାଇଛି।
ସୌଜନ୍ୟ ଧରିତ୍ରୀ
