9/11 Attack: ଅଲ-କାଏଦା ଏବଂ ସାଉଦି ସହ ୯/୧୧ ସନ୍ଦିଗ୍ଧଙ୍କ କନେକ୍ସନର ଖୁଲାସା, ପ୍ରମାଣ ଥାଇ ବି ଚୁପ୍ ଏଫବିଆଇ
ନୂଆଦିଲ୍ଲୀ,୦୮/୦୯; ଆମେରିକାରେ ୯/୧୧ ଆତଙ୍କବାଦୀ ଆକ୍ରମଣକୁ ୨୫ ବର୍ଷ ବିତିଛି । ଏତେ ବର୍ଷ ପରେ ଏହାର ତଦନ୍ତ ସହ ଜଡିତ ଏକ ବଡ ଖୁଲାସା ହୋଇଛି । ଏକ ଅନୁସନ୍ଧାନରେ ଓମାର ଅଲ-ବାୟୁମିଙ୍କ ସହ ଜଡିତ ଭିଡିଓ ଫୁଟେଜ୍ ମିଳିଛି । ଯାହା ପୂର୍ବରୁ ସାର୍ବଜନୀନ ହୋଇନଥିଲା । ଏହି ଫୁଟେଜରେ ବାୟୁମି ଅଲ-କାଏଦାର ଭବିଷ୍ୟତ ନେତା ଅନୱାର ଅଲ-ଆୱଲାକିଙ୍କ ସହ ନଜର ଆସିଛନ୍ତି । ଉଭୟ ସାନ ଡିଏଗୋ ନିକଟରେ ପେଣ୍ଟବଲ୍ ଖେଳୁଥିବାର ମଧ୍ୟ ନଜର ଆସିଛନ୍ତି । ଏହି ଫୁଟେଜରେ ସାଉଦି ଆରବର ଇସଲାମିକ ବ୍ୟାପାର ମନ୍ତ୍ରଣାଳୟ ସହିତ ଜଣେ ଅଧିକାରୀଙ୍କ ଉପସ୍ଥିତି ମଧ୍ୟ ଦର୍ଶାଯାଇଛି । ୯/୧୧ ଆକ୍ରମଣ ପରେ ବାୟୁମିଙ୍କ ନାମ ଏଫ୍ ବିଆଇର ତଦନ୍ତରେ ଆସିଥିଲା । ଏହି ଆକ୍ରମଣରେ ସେ ଦୁଇ ଅଭିଯୁକ୍ତଙ୍କୁ ସାହାଯ୍ୟ କରିଥିବା ସନ୍ଦେହ କରାଯାଉଥିଲା । ଏଫବିଆଇ ପାଖରେ ପ୍ରମାଣ ଥାଇ ବି ସେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ ।
ବାୟୁମି ଜଣେ ଉଗ୍ରବଦୀ କିମ୍ବା ସାଉଦି ଗୁପ୍ତଚର ବୋଲି ଅଭିଯୋଗକୁ ଅସ୍ୱୀକାର କରିଛନ୍ ତି। ସାଉଦି ଆରବ ମଧ୍ୟ ୯/୧୧ ଆକ୍ରମଣରେ ଏହାର ସରକାର କିମ୍ବା ଅଧିକାରୀଙ୍କ କୌଣସି ଭୂମିକାକୁ ଅସ୍ୱୀକାର କରିଛି । ବାୟୁମି ୧୯୯୪ ରେ ସାଉଦି ଆରବରୁ ସାନ ଡିଏଗୋରେ ପହଞ୍ଚିଥିଲେ। ସେ ଦାବି କରିଛନ୍ତି ଯେ, ସେ ଇଂରାଜୀ ଅଧ୍ୟୟନ କରିବାକୁ ଆମେରିକା ଆସିଛନ୍ତି। ପରେ ସାମ୍ନାକୁ ଆସିଥିବା ଦସ୍ତାବିଜ ଅନୁଯାୟୀ,ସେ ପାଠପଢ଼ା ପ୍ରତି ସେତେଟା ଧ୍ୟାନ ଦେଇନଥିଲେ । ସେ ଧାର୍ମିକ କାର୍ଯ୍ୟକ୍ରମ ଆୟୋଜନ କରିବାରେ ଜଡିତ ଥିଲେ । ତଦନ୍ତ ରିପୋର୍ଟ ଅନୁଯାୟୀ, ୧୯୯୭ କିମ୍ବା ୧୯୯୮ ର ପ୍ରାରମ୍ଭରେ ଏକ ଭିଡିଓରେ ବାୟୁମି, ଆୱଲାକି ଏବଂ ଅନ୍ୟ କେତେଜଣ ସାମରିକ ଶୈଳୀର ପେଣ୍ଟବଲ୍ ଖେଳରେ ଭାଗ ନେଉଥିବାର ଦେଖାଯାଇଛି । କିଛି ଲୋକ ସେନା ପରି ପୋଷାକ ପିନ୍ଧିଥିଲେ। ଖେଳ ସମୟରେ କିଛି ଲୋକ ଧାର୍ମିକ ସ୍ଲୋଗାନ ଦେଉଥିବାର ମଧ୍ୟ ଦେଖିବାକୁ ମିଳିଥିଲା।
ସୌଜନ୍ୟ ପ୍ରମେୟ
