ପାର୍ବଣ ପୂର୍ବରୁ ମହଙ୍ଗା ମାଡ଼: ୮ ଟଙ୍କା ବଢ଼ିପାରେ କ୍ଷୀର ମୂଲ୍ୟ! ରାଜ୍ୟ ସରକାରଙ୍କୁ ୩ ଦିନିର ଅଲ୍ଟିମେଟମ ଦେଲେ…
ନୂଆଦିଲ୍ଲୀ,୧୯।୯: କର୍ନାଟକରେ ପାର୍ୱଣ ଋତୁ ପୂର୍ୱରୁ ଲୋକଙ୍କୁ ଆଉ ଏକ ବଡ଼ ଝଟକା ଲାଗିପାରେ। ଏଠାରେ ଖୁବ ଶୀଘ୍ର କ୍ଷୀର ଦରରେ ବଡ଼ ଧରଣର ବୃଦ୍ଧି ଦେଖିବାକୁ ମିଳିପାରେ। ବାସ୍ତବରେ, କର୍ନାଟକର ରାଜ୍ୟ ଦୁଗ୍ଧ ଉତ୍ପାଦକ ସଂଘଗୁଡ଼ିକ କ୍ଷୀର ଦରରେ ଲିଟର ପିଛା ୮ ଟଙ୍କା ବୃଦ୍ଧି କରିବାକୁ ଦାବି କରିଛନ୍ତି। ବେଙ୍ଗାଲୁରୁ ପ୍ରେସ କ୍ଲବରେ ଆୟୋଜିତ ଏକ ସାମ୍ୱାଦିକ ସମ୍ମିଳନୀରେ ଏହି ଦାବି ଉଠାଯାଇଛି।
ସେମାନଙ୍କ କହିବା କଥା ହେଉଛି, ଉତ୍ପାଦନ ଖର୍ଚ୍ଚ ବୃଦ୍ଧି ଏବଂ କ୍ଷୀର ଉତ୍ପାଦନ କମିବା କାରଣରୁ ସେମାନଙ୍କ ଉପରେ ଚାପ ପଡୁଛି। କର୍ନାଟକ ମିଲ୍କ ପ୍ରଡ୍ୟୁସର୍ସ ଆସୋସିଏସନ ଅନୁସାରେ, ବାମୁଲ (Bamul), ଚାମୁଲ (Chamul), ମାଣ୍ଡ୍ୟା ମିଲ୍କ ଏବଂ ତୁମକୁର (Tumkur) ସମେତ ଅନେକ ବଡ଼ ମିଲ୍କ ୟୁନିଅନ ଏହି ଦାବି ସପକ୍ଷରେ ଅଛନ୍ତି। ସଂଘଗୁଡ଼ିକ ଦୁଗ୍ଧ ଉତ୍ପାଦକମାନଙ୍କୁ ଦିଆଯାଉଥିବା ସରକାରୀ ପ୍ରୋତ୍ସାହନ ରାଶି (ଇନସେଣ୍ଟିଭ) ମଧ୍ୟ ବୃଦ୍ଧି କରିବାକୁ ଦାବି କରିଛନ୍ତି।
ଏହି ଦାବିଗୁଡ଼ିକୁ ପୂରଣ କରିବା ପାଇଁ ଉତ୍ପାଦକମାନେ ସରକାରଙ୍କୁ ୩ ଦିନର ଚରମ ଚେତାବନୀ (ଅଲ୍ଟିମେଟମ) ଦେଇଛନ୍ତି। ଯଦି ଏହି ସମୟ ମଧ୍ୟରେ ସରକାର କ୍ୟାବିନେଟ ବୈଠକ ଡାକି ଏହା ଉପରେ କୌଣସି ନିଷ୍ପତ୍ତି ନ ନିଅନ୍ତି, ତେବେ ଉତ୍ପାଦକମାନେ ‘ବିଧାନ ସୌଧ’ ପର୍ଯ୍ୟନ୍ତ ବିରୋଧ ପ୍ରଦର୍ଶନ ଶୋଭାଯାତ୍ରା ବାହାର କରିବାକୁ ଚେତାବନୀ ଦେଇଛନ୍ତି।
ବାମୁଲ ମିଲ୍କ ୟୁନିଅନର ସଭାପତି ନାଗରାଜ କହିଛନ୍ତି ଯେ, ଡାଏରୀ ଆସୋସିଏସନ ଗତ ଆଠ ମାସ ଧରି ରାଜ୍ୟ ସରକାରଙ୍କ ସହ ଆଲୋଚନା ଚଳାଇଛି, କିନ୍ତୁ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ। ୟୁନିଅନ୍ଗୁଡ଼ିକ ଏବେ କ୍ଷୀର ସଂଗ୍ରହ ମୂଲ୍ୟରେ ଲିଟର ପିଛା ୮ ଟଙ୍କା ବୃଦ୍ଧି କରିବାକୁ ଦାବି କରିଛନ୍ତି।
ଦୁଗ୍ଧ ସଂଘଗୁଡ଼ିକ ଅନୁସାରେ, ଦୁଗ୍ଧ ଚାଷୀମାନେ ଏବେ ପ୍ରବଳ ଆର୍ଥିକ ସଙ୍କଟ ଦେଇ ଗତି କରୁଛନ୍ତି। ଗୋଟିଏ ପଟେ କମ ବର୍ଷା ଯୋଗୁଁ ଗୋରୁଗାଈଙ୍କ ପାଇଁ ସବୁଜ ଘାସର ଘୋର ଅଭାବ ଦେଖାଦେଇଛି। ଅନ୍ୟପଟେ ଗୋଖାଦ୍ୟ ଏବଂ କଞ୍ଚାମାଲ ଦରରେ ୨୫% ପର୍ଯ୍ୟନ୍ତ ବୃଦ୍ଧି ଘଟିଛି। ଏହା ଉପରେ ପରିବହନ ଖର୍ଚ୍ଚ ମଧ୍ୟ ବଢ଼ିଛି; ଏ ସବୁକୁ ମିଶାଇ କ୍ଷୀର ଉତ୍ପାଦନ ଖର୍ଚ୍ଚ ଯଥେଷ୍ଟ ବଢ଼ିଯାଇଛି। ଏଭଳି ପରିସ୍ଥିତିରେ ଚାଷୀଙ୍କ ପାଇଁ ଗୋରୁଗାଈ ପାଳନ କରିବା କଷ୍ଟକର ହୋଇପଡ଼ିଛି, ଯାହାର ପ୍ରଭାବ ସେମାନଙ୍କର ମୋଟ ଉତ୍ପାଦନ ଉପରେ ମଧ୍ୟ ପଡୁଛି।
ଯଦି ରାଜ୍ୟ ସରକାର ଦୁଗ୍ଧ ସଂଘଗୁଡ଼ିକ ପକ୍ଷରୁ ଉଠାଯାଇଥିବା ଦାବିକୁ ମାନିନିଅନ୍ତି ଏବଂ ଦର ବୃଦ୍ଧି ପ୍ରସ୍ତାବକୁ ମଞ୍ଜୁରୀ ଦିଅନ୍ତି, ତେବେ ନବରାତ୍ରୀ ଏବଂ ଦୀପାବଳି ଠିକ ପୂର୍ୱରୁ ନନ୍ଦିନୀ ଭଳି ବ୍ରାଣ୍ଡର କ୍ଷୀର ବହୁତ ମହଙ୍ଗା ହୋଇଯିବ। ଏହାଦ୍ୱାରା କେବଳ ରୋଷେଇ ଘରର ବଜେଟ ବିଗିଡ଼ିବ ନାହିଁ, ବରଂ ପାର୍ୱଣ ଋତୁରେ ମିଠା, ଖୁଆ ଏବଂ ଅନ୍ୟାନ୍ୟ ଦୁଗ୍ଧଜାତ ସାମଗ୍ରୀର ଦର ମଧ୍ୟ ଆକାଶଛୁଆଁ ହୋଇପାରେ।
ସୌଜନ୍ୟ ଧରିତ୍ରୀ
