ମାଲକାନଗିରି: ଅର୍ଣ୍ଣବର ପ୍ରଭାବରେ ମାଲକାନଗିରି ଜିଲ୍ଲାରେ ପାଗ ସମ୍ପୂର୍ଣ୍ଣ ବିଗିଡ଼ିଯାଇଛି। ଗତକାଲି ଠାରୁ ଲଗାତାର ତୁହାକୁ ତୁହା ବର୍ଷା ଜିଲ୍ଲାବାସୀଙ୍କ ଜନଜୀବନକୁ ଅସ୍ତବ୍ୟସ୍ତ କରି ଦେଇଛି। ଅବିରତ ବର୍ଷା ଯୋଗୁଁଁ ଜିଲ୍ଲାର ବିଭିନ୍ନ ନଦୀ, ନାଳ ଓ ଜଳାଶୟରେ ଜଳସ୍ତର ବଢ଼ିବାରେ ଲାଗିଛି। ଅନେକ ତଳିଆ ଅଞ୍ଚଳରେ ପାଣି ପଶିଥିବା ବେଳେ ରାଜପଥ ଉପରେ ମଧ୍ୟ ବନ୍ୟାଜଳ ପ୍ରବାହିତ ହେଉଛି।
ବର୍ଷାର ସବୁଠାରୁ ବଡ଼ ପ୍ରଭାବ ଦେଖିବାକୁ ମିଳିଛି ଜାତୀୟ ରାଜପଥ ୩୨୬ ଉପରେ। ମାଲକାନଗିରିରୁ ହାଇଦ୍ରାବାଦ ଓ ତେଲଙ୍ଗାନା ଦିଗକୁ ଯାଉଥିବା ଏହି ରାଜପଥର ପୋଟେରୁ ପୋଲ ଉପରେ ପ୍ରାୟ ୪ ଫୁଟ୍ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ଫଳରେ ଏହି ରାସ୍ତାରେ ଯାତାୟାତ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି।
କେବଳ ପୋଟେରୁ ନୁହେଁ, କାଲିମେଳା ବ୍ଲକ ଅନ୍ତର୍ଗତ କଙ୍ଗୁରୁକୋଣ୍ଡା ପୋଲ ଉପରେ ମଧ୍ୟ ବନ୍ୟାଜଳ ପ୍ରବାହିତ ହେଉଛି। ଦୁଇଟି ପ୍ରମୁଖ ପୋଲ ଉପରେ ପାଣି ଚାଲିବା ଯୋଗୁଁଁ ମାଲକାନଗିରି ସହ ଅନ୍ୟ ଜିଲ୍ଲା ଓ ପଡ଼ୋଶୀ ରାଜ୍ୟ ସହ ଯୋଗାଯୋଗ ପ୍ରଭାବିତ ହୋଇଛି।
ବନ୍ୟାଜଳ ଯୋଗୁଁଁ ରାସ୍ତାରେ ଯାତାୟାତ ଠପ୍ ହୋଇଯିବା ପରେ ରାଜପଥର ଉଭୟ ପାର୍ଶ୍ୱରେ ଶତାଧିକ ଗାଡ଼ି ଅଟକି ରହିଛି। ଯାତ୍ରୀବାହୀ ବସ୍, ଟ୍ରକ୍, ମାଲବାହୀ ଗାଡ଼ି ସମେତ ଅନ୍ୟାନ୍ୟ ଯାନବାହନ ରାସ୍ତାରେ ଅଟକି ରହିଥିବାରୁ ଯାତ୍ରୀ ଓ ଚାଳକମାନେ ଦୀର୍ଘ ସମୟ ଧରି ଅସୁବିଧାରେ ପଡ଼ିଛନ୍ତି।
ସୌଜନ୍ୟ ସମାଜ
