90-crore project: ଆରମ୍ଭରୁ ଅଟକିଲା ୯୦ କୋଟି ଟଙ୍କାର ପ୍ରକଳ୍ପ: ଖଣି ପ୍ରଭାବିତ ଅଞ୍ଚଳରେ ଜଳକଷ୍ଟ

କଣିହାଁ: ଅନୁଗୋଳ ଜିଲ୍ଲା କଣିହାଁ କୋଇଲା ଖଣି ଅଞ୍ଚଳର ପ୍ରଭାବିତ ଲୋକଙ୍କୁ ପାନୀୟ ଜଳ ଯୋଗାଇ ଦେବା ପାଇଁ ରାଜ୍ୟ ସରକାର ୨୦୧୮ ମସିହାରେ ପ୍ରକଳ୍ପ ଆରମ୍ଭ କରିଥିଲେ। ଏଥିପାଇଁ  ୯୦ କୋଟି ଟଙ୍କାର ବ୍ୟୟ ବରାଦ କରାଯାଇଥିଲା। ପ୍ରକଳ୍ପ ଆରମ୍ଭ ହେବା ଦେଖି ଅଞ୍ଚଳବାସୀ ବେଶ୍‌ ଖୁସି ହୋଇଥିଲେ। ଭାବିଥିଲେ, ଏଥର ଜଳକଷ୍ଟ ଦୂର ହେବ। ହେଲେ କାମ ଆରମ୍ଭ ହେବାର ମାତ୍ର କିଛି ମାସ ପରେ ଏହା ବନ୍ଦ ହୋଇଗଲା। ୮ ବର୍ଷ ହେଲା ଏମିତି କାମ ବନ୍ଦ ରହିଛି। ଏପଟେ ଖଣି ଅଞ୍ଚଳ ଲୋକେ ପାଣି ମୁନ୍ଦାଏ ପାଇଁ ଡହଳବିକଳ ହେଉଛନ୍ତି। ତଥ୍ୟ ଅନୁସାରେ, କଣିହାଁ ବ୍ଲକ୍‌ କମରେଇ ପଞ୍ଚାୟତର ଦଣ୍ଡସିଂହା ଗାଁ ନିକଟରେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ପକ୍ଷରୁ ପାନୀୟ ଜଳ ପ୍ରକଳ୍ପ ନିର୍ମାଣ ଆରମ୍ଭ ହୋଇଥିଲା। କିନ୍ତୁ, ହଠାତ୍‌  ଏହି ପ୍ରକଳ୍ପକୁ ବନ୍ଦ କରି ଦିଆଗଲା। କେଉଁ କାରଣରୁ କାମ ବନ୍ଦ ହେଲା, ତାହାର କୌଣସି ସ୍ପଷ୍ଟୀକରଣ ଦିଆଗଲା ନାହିଁ। ଏହି ପ୍ରକଳ୍ପକୁ ତୁରନ୍ତ କାର୍ଯ୍ୟକ୍ଷମ କରି ଲୋକଙ୍କୁ ପାଣି ଯୋଗାଇବା ପାଇଁ ତାଳଚେର ବିଧାୟକ ବ୍ରଜ କିଶୋର ପ୍ରଧାନ ନିକଟରେ କଣିହାଁ ବ୍ଲକ୍‌ ଗସ୍ତରେ ଆସିଥିବା ରାଜ୍ୟ ସରକାରଙ୍କ ପଞ୍ଚାୟତିରାଜ, ଗ୍ରାମ୍ୟ ଉନ୍ନୟନ ଓ ପାନୀୟଜଳ ଯୋଗାଣ ବିଭାଗ ମନ୍ତ୍ରୀ ରବି ନାଏକଙ୍କ ନିକଟରେ ଦାବି କରିଥିଲେ। ହେଲେ, ଆଜି ପର୍ଯ୍ୟନ୍ତ ତାହା କାର୍ଯ୍ୟକ୍ଷମ ହେଲାନାହିଁ। ଏଥିପାଇଁ ଖଣି ପ୍ରଭାବିତ ଲୋକଙ୍କ ଭିତରେ ଅସନ୍ତୋଷ ବଢ଼ୁଛି।