Defence Technology: DRDOର ‘କ୍ୱାଣ୍ଟମ୍ ଲକ୍’ର ପରୀକ୍ଷଣ ସଫଳ, ଏଣିକି ଅସ୍ତ୍ର ପରୀକ୍ଷାର ଗୋପନୀୟ ତଥ୍ୟ ସୁରକ୍ଷିତ ରହିବ
ବାଲେଶ୍ୱର,୧୫/୧୦: ଭାରତର ପ୍ରତିରକ୍ଷା କ୍ଷେତ୍ରରେ ସାଇବର ସୁରକ୍ଷାକୁ ଅଧିକ ମଜଭୁତ କରିବା ଦିଗରେ ବୁଧବାର ଏକ ବଡ଼ ସଫଳତା ହାସଲ କରିଛି ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆର୍ଡିଓ) । ବାଲେଶ୍ୱର ଜିଲ୍ଲା ଚାନ୍ଦିପୁରସ୍ଥିତ ପ୍ରୁଫ୍ ଆଣ୍ଡ୍ ଏକ୍ସପେରିମେଣ୍ଟାଲ୍ ଏଷ୍ଟାବ୍ଲିସମେଣ୍ଟ୍ (ପିଏକ୍ସଇ)ରେ ଅସ୍ତ୍ର ପରୀକ୍ଷଣ ସମୟରେ ବ୍ୟବହୃତ ନେଟୱର୍କରେ ଏକ ଅତ୍ୟାଧୁନିକ କ୍ୱାଣ୍ଟମ୍ ସୁରକ୍ଷା ପ୍ରଯୁକ୍ତି (କ୍ୱାଣ୍ଟମ୍ ଲକ୍)ର ସଫଳ ପରୀକ୍ଷଣ କରାଯାଇଛି । ଏହି ପ୍ରଯୁକ୍ତି ଯୁଦ୍ଧାସ୍ତ୍ର ପରୀକ୍ଷଣ ସମ୍ପର୍କିତ ସମ୍ବେଦନଶୀଳ ତଥ୍ୟକୁ ସୁରକ୍ଷିତ ରଖିବା ସହ ଅନଧୀକୃତ ଭାବେ ତଥ୍ୟ ହାସଲ କରିବା ଉଦ୍ୟମକୁ ଚିହ୍ନଟ କରିବାରେ ସହାୟକ ହେବ ।
ଡିଆର୍ଡିଓ ପକ୍ଷରୁ କୁହାଯାଇଛି, ଚାନ୍ଦିପୁରର ଡାଇନାମିକ୍ ଟେଷ୍ଟ୍ ରେଞ୍ଜର ସକ୍ରିୟ ନେଟୱର୍କରେ କ୍ୱାଣ୍ଟମ ଲକ୍ ବା କ୍ୱାଣ୍ଟମ୍ କି ଡିଷ୍ଟ୍ରିବ୍ୟୁସନ୍(କ୍ୟୁକେଡି) ପ୍ଲାଟଫର୍ମକୁ ସଫଳତାର ସହ ସଂଯୋଗ ଓ ପରୀକ୍ଷଣ କରାଯାଇଛି । ଏହା ଦ୍ୱାରା ଅସ୍ତ୍ର ପରୀକ୍ଷଣ ସମୟରେ ସଂଗୃହୀତ ଗୁରୁତ୍ୱପୂର୍ଣ୍ଣ ତଥ୍ୟ ଓ ରିଅଲ୍ ଟାଇମ୍ ଟେଲିମେଟ୍ରିକୁ ସୁରକ୍ଷିତ ରଖିବାର ସମ୍ଭାବନା ପ୍ରମାଣିତ ହୋଇଛି ।
କ୍ୱାଣ୍ଟମ୍ ଲକ୍ ସାଧାରଣତଃ ଉପଗ୍ରହ ଓ ଭୂ-ଷ୍ଟେସନ୍ ମଧ୍ୟରେ ତଥା ବିଭିନ୍ନ ଉପଗ୍ରହ ମଧ୍ୟରେ ଯୋଗାଯୋଗ ପ୍ରଦର୍ଶନ କରିଥାଏ । ଏହା ଭାରତୀୟ ପ୍ରତିରକ୍ଷା ବିଭାଗର ସମସ୍ତ ତଥ୍ୟକୁ ଗୋପନ ରଖିବା ସହ ସମ୍ପୂର୍ଣ୍ଣ ସୁରକ୍ଷା ପ୍ରଦାନ କରିଥାଏ । ଏହା ବ୍ୟତୀତ ଅନ୍ୟ ଦ୍ୱାରା ତଥ୍ୟ ଚୋରି ଚିହ୍ନଟ କରିବାର ମଧ୍ୟ କ୍ଷମତା ରଖିଛି । ବିଶେଷ କରି କ୍ୱାଣ୍ଟମ୍ ଲକ୍ ଟେଲିମେଟ୍ରିର ସୁରକ୍ଷା ଉପରେ ଗୁରୁତ୍ୱ ଦେଉଛି । ଟେଲିମେଟ୍ରି ହେଉଛି ପରୀକ୍ଷଣ ସମୟରେ ସେନ୍ସର ଦ୍ୱାରା ପଠାଯାଉଥିବା ତଥ୍ୟର ପ୍ରବାହ । ଗୁଳି ବା କ୍ଷେପଣାସ୍ତ୍ରର ଗତି, ଗତିପଥ ଏବଂ ଲକ୍ଷ୍ୟସ୍ଥଳରେ ଆଘାତର ସ୍ଥାନକୁ ତଥ୍ୟର ପ୍ରବାହରେ ସାମିଲ କରାଯାଏ । ଏହି ତଥ୍ୟରୁ ଅସ୍ତ୍ରଶସ୍ତ୍ରର କାର୍ଯ୍ୟଦକ୍ଷତା ବିଷୟରେ ଜଣାପଡ଼େ । ମାତ୍ର ଏବେ କ୍ୱାଣ୍ଟମ୍ ଲକ୍ ଦ୍ୱାରା ଉପରୋକ୍ତ ତଥ୍ୟଗୁଡ଼ିକର ଆଉ ସୂଚନା ମିଳିବନି ।
ଚାନ୍ଦିପୁରସ୍ଥିତ ପିଏକ୍ସଇର ପରିସର ଉପକୂଳବର୍ତ୍ତୀ ଅଞ୍ଚଳରେ ୫୦ କିମି ଓ ସମୁଦ୍ର ଭିତରକୁ ୫୦ କିମି ପର୍ଯ୍ୟନ୍ତ ବିସ୍ତୃତ । ଏହି କାରଣରୁ ଏଠାରେ ତୋପ, ଗୁଳିଗୋଳା, ରକେଟ୍ ଏବଂ ସାମରିକ ସୁରକ୍ଷା କବଚ କ୍ଷମତା ଓ କାର୍ଯ୍ୟଦକ୍ଷତା ପରୀକ୍ଷା କରାଯାଏ । ଏହାକୁ ଦୃଷ୍ଟିରେ ରଖି କ୍ୱାଣ୍ଟମ୍ ଲକ୍ର ଉନ୍ନତ ସଂସ୍କରଣକୁ ଏଠାରେ ପରୀକ୍ଷା କରାଯିବାକୁ ଡିଆର୍ଡିଓ ପକ୍ଷରୁ ନିଷ୍ପତ୍ତି ନିଆଯାଇଥିଲା । ପରୀକ୍ଷଣ ସମୟରେ ସମସ୍ତ ପାରାମିଟର୍କୁ ଏହା ପୂରଣ କରିଥିଲା । ସାମରିକ ନେଟୱର୍କଗୁଡ଼ିକୁ କ୍ୱାଣ୍ଟମ୍-ପ୍ରୁଫ୍ ବା କ୍ୱାଣ୍ଟମ୍ ଆକ୍ରମଣରୁ ସୁରକ୍ଷିତ କରିବା ପାଇଁ ବିଶ୍ୱସ୍ତରୀୟ ପ୍ରତିଯୋଗିତା ଚାଲିଛି । ଏଥିପାଇଁ ଭାରତ ୬ ହଜାର ୩ କୋଟି ଟଙ୍କାରେ ‘ଜାତୀୟ କ୍ୱାଣ୍ଟମ୍ ମିଶନ୍’ କରିଛି । ୨୦୩୦-୩୧ ସୁଦ୍ଧା ଦୁଇ ହଜାର କିମି ପର୍ଯ୍ୟନ୍ତ ଉପଗ୍ରହ-ଆଧାରିତ ସୁରକ୍ଷିତ କ୍ୱାଣ୍ଟମ୍ ଲ’ ପ୍ରସ୍ତୁତ କରିବାକୁ ଲକ୍ଷ୍ୟ ରଖାଯାଇଛି । ଏହିକ୍ରମରେ ଭାରତୀୟ ପ୍ରତିରକ୍ଷା ବିଭାଗ ପକ୍ଷରୁ ମଧ୍ୟ ଏହା ଉପରେ ଗୁରୁତ୍ୱ ଦିଆଯିବା ସହ ଉକ୍ତ ପ୍ରଦକ୍ଷେପ ହାତକୁ ନିଆଯାଇଛି ।
ସୌଜନ୍ୟ ପ୍ରମେୟ
