Bhadrak Loan Fraud: ୧୨ ଲକ୍ଷ ଋଣର ଝଲକ ଦେଖାଇ ୪୦.୫୧ ଲକ୍ଷ ଟଙ୍କାର ଚୂନ ଲଗାଇଲେ
ଭଦ୍ରକରେ ୧୨ ଲକ୍ଷ ଟଙ୍କାର ଟପ୍-ଅପ୍ ଲୋନ୍ ଦେବା ନାଁରେ ସେବାନିବୃତ ସୈନିକଙ୍କ ପରିବାରକୁ ୪୦.୫୧ ଲକ୍ଷ ଟଙ୍କା ଠକେଇ ଅଭିଯୋଗ ହୋଇଛି। ଜାଲ୍ ଋଣ ପରିଶୋଧ ପ୍ରମାଣପତ୍ର ଓ ଅପହରଣ, ହତ୍ୟା ଧମକ ନେଇ ଭଦ୍ରକ ଟାଉନ୍ ଥାନାରେ ମାମଲା ରୁଜୁ ହୋଇଛି।
ଜାଲ୍ ଲୋନ୍ କ୍ଲୋଜର୍ ସାର୍ଟିଫିକେଟ୍ ଦେଇ ସୈନିକଙ୍କ ପରିବାରକୁ ଠକିଲେ, ପୁଅକୁ ଅପହରଣ ଓ ହତ୍ୟା ଧମକ ଅଭିଯୋଗ
ଭଦ୍ରକ( ହରିହର ନାୟକ) : ୧୨ ଲକ୍ଷ ଟଙ୍କାର ଟପ୍-ଅପ୍ ଲୋନ୍ ଦେବାର ପ୍ରଲୋଭନ ଦେଖାଇ ଜଣେ ସୈନିକଙ୍କ ପରିବାର ନାମରେ ୪୦ ଲକ୍ଷ ୫୧ ହଜାର ୩୯୫ ଟଙ୍କାର ଋଣ ସୃଷ୍ଟି କରିବା, ଜାଲ୍ ଋଣ ପରିଶୋଧ ପ୍ରମାଣପତ୍ର ଦେବା ଏବଂ ପ୍ରତିବାଦ କରିବାରୁ ହତ୍ୟା ଓ ଅପହରଣ ଧମକ ଦେବା ଭଳି ଘଟଣାକୁ ନେଇ ଭଦ୍ରକ ସହରରେ ଚର୍ଚ୍ଚା ଜୋର ଧରିଛି। ଏହି ଘଟଣାରେ ଘରୋଇ ଫାଇନାନ୍ସ କମ୍ପାନୀ ସହ ଜଡ଼ିତ କର୍ମଚାରୀ ଓ ଜଣେ ବ୍ୟାଙ୍କ ମିତ୍ରଙ୍କ ବିରୋଧରେ ଭଦ୍ରକ ଟାଉନ୍ ଥାନାରେ ମାମଲା ରୁଜୁ ହୋଇଛି।
ଅଭିଯୋଗ ଅନୁଯାୟୀ, ସମରାଇପୁର କେନାଲ ରୋଡ୍ର ବାସିନ୍ଦା ସିଗ୍ଧାରାଣୀ ମିଶ୍ରଙ୍କ ସ୍ୱାମୀ ପ୍ରକାଶ କୁମାର ମିଶ୍ର ଜଣେ ସେବାନିବୃତ ସୈନିକ। ପରିବାରର ଗୃହଋଣ ଉପରେ ଅତିରିକ୍ତ ଋଣ ନେବା ପାଇଁ ସେମାନେ ଭଦ୍ରକ ଏସ୍ବିଆଇ ମୁଖ୍ୟ ଶାଖାର ସହାୟତା ଲୋଡ଼ିଥିଲେ। ମାତ୍ର ସିବିଲ୍ ସ୍କୋର୍ ଅନୁକୂଳ ନଥିବାରୁ ଋଣ ମିଳିବା ସମ୍ଭବ ନୁହେଁ ବୋଲି ସେମାନଙ୍କୁ କୁହାଯାଇଥିଲା।
ପରେ ପରିବାର ପକ୍ଷରୁ ଶ୍ରୀରାମ ଫାଇନାନ୍ସ ଓ ପିରାମଲ୍ ଫାଇନାନ୍ସ ସହ ଯୋଗାଯୋଗ କରାଯାଇଥିଲା। ଏହି ସମୟରେ ମହେଶ କୁମାର ପାଢ଼ୀ ନାମକ ବ୍ୟାଙ୍କ ମିତ୍ର, ଅଶ୍ରୁମୋଚନ ଜେନା ଓ ରାଜୀବ ପାଣି ନାମକ ତିନିଜଣ ବ୍ୟକ୍ତି ସେମାନଙ୍କୁ ଋଣ କରାଇଦେବାର ପ୍ରତିଶ୍ରୁତି ଦେଇଥିଲେ। ୧୨ ଲକ୍ଷ ଟଙ୍କା ଋଣ ଯୋଗାଇଦେବା ନାଁରେ ତାଙ୍କ ପରିବାରଠାରୁ ଖାଲି ଦସ୍ତଖତ ଥିବା ଚେକ୍, ଜମିଜମା ସମ୍ପର୍କିତ ଆର୍ଓଆର୍, ଦରମା ପ୍ରମାଣପତ୍ର ଓ ଅନ୍ୟାନ୍ୟ ମୂଳ ଦଲିଲ ନିଆଯାଇଥିଲା। ପରବର୍ତ୍ତୀ ସମୟରେ ଏହି ଦଲିଲଗୁଡ଼ିକର ଅପବ୍ୟବହାର କରି ୪୦,୫୧,୩୯୫ ଟଙ୍କାର ଋଣ ସୃଷ୍ଟି କରାଯାଇଥିଲା।
ସୌଜନ୍ୟ ସମ୍ବାଦ
