Bangladesh: ଗଜୱା-ଏ-ହିନ୍ଦ୍ର ଦୁଃସାହସ: ବାଂଲାଦେଶରେ ୫୦ ଫୁଟ ଉଚ୍ଚ କୃଷ୍ଣ ପ୍ରତିମା ବିପଦରେ
ଢାକା: ବାଂଲାଦେଶରେ ସାଧାରଣ ନିର୍ବାଚନ ପରେ ଗଣତାନ୍ତ୍ରିକ ସରକାର ଫେରିବା ସହିତ ଯେଉଁ ଶାନ୍ତି ଏବଂ ଧର୍ମନିରପେକ୍ଷବାଦର ଆଶା କରାଯାଉଥିଲା ତାହାକୁ ମୌଳବାଦୀ ଶକ୍ତିମାନେ ପୁଣି ଥରେ ବିଫଳ କରିଛନ୍ତି। ସଦ୍ୟତମ ସୂଚନା ଅନୁଯାୟୀ, ମୌଳବାଦୀ ଇସଲାମିକ ସଂଗଠନଗୁଡ଼ିକ ବାଂଲାଦେଶର ଗାଇବନ୍ଧା ଜିଲ୍ଲାର ପଳାଶବାରୀରେ ଅବସ୍ଥିତ ଏକ ଭବ୍ୟ ଏବଂ ଐତିହାସିକ ସନାତନ ଧାର୍ମିକ ପରିସରକୁ ଟାର୍ଗେଟ କରି ଏକ ବଡ଼ ଅଭିଯାନ ଆରମ୍ଭ କରିଛନ୍ତି। ପ୍ରାରମ୍ଭରେ ଯାହା ସ୍ଥାନୀୟ ବିବାଦ ପରି ମନେ ହେଉଥିଲା, ତାହା ଏବେ ହିନ୍ଦୁ ଧାର୍ମିକ ପ୍ରତୀକ ଏବଂ ବିଶ୍ୱାସ କେନ୍ଦ୍ର ବିରୋଧରେ ଏକ ଦେଶବ୍ୟାପୀ ଆଦର୍ଶଗତ ଏବଂ ସାମ୍ପ୍ରଦାୟିକ ଆନ୍ଦୋଳନର ରୂପ ନେଇଛି।
ହୁସେନପୁର ୟୁନିଅନର ରାମଚନ୍ଦ୍ରପୁର ଗ୍ରାମରେ ଅବସ୍ଥିତ ଏକ ବିଶାଳ ଧାର୍ମିକ କମ୍ପ୍ଲେକ୍ସ ଉପରେ ଏହି ବିବାଦ କେନ୍ଦ୍ରିତ, ଯାହା ଭାରତ ଏବଂ ବିଦେଶରୁ ଆସିଥିବା ଭକ୍ତ ଏବଂ ପର୍ଯ୍ୟଟକଙ୍କ ପାଇଁ ଏକ ପ୍ରମୁଖ ବିଶ୍ୱାସ କେନ୍ଦ୍ର ପାଲଟିଛି। ଏହି କମ୍ପ୍ଲେକ୍ସର ସବୁଠାରୁ ପ୍ରମୁଖ ବୈଶିଷ୍ଟ୍ୟ ହେଉଛି ଭଗବାନ କୃଷ୍ଣଙ୍କର ଏକ ଚମତ୍କାର ପ୍ରାୟ ୫୦ ଫୁଟ ଉଚ୍ଚ କଳା ପ୍ରତିମା, ଯାହାକୁ ୨୫ ନଭେମ୍ବର ୨୦୨୫ରେ ରାଜଶାହୀରେ ଭାରତର ସହାୟକ ଉଚ୍ଚାୟୁକ୍ତ ମନୋଜ କୁମାର ଆନୁଷ୍ଠାନିକ ଭାବରେ ଉଦ୍ଘାଟନ କରିଥିଲେ। ମନ୍ଦିର କମିଟିର ତତ୍ତ୍ୱାବଧାରକ ହରିଦାସ ବାବୁଙ୍କ ତତ୍ତ୍ୱାବଧାନରେ ଏହା ରହିଛି। ଏଥିରେ ଭଗବାନ ରାମ ଏବଂ ଭଗବାନ ଶିବଙ୍କ ସମେତ ବିଭିନ୍ନ ହିନ୍ଦୁ ଦେବତାଙ୍କୁ ଚିତ୍ରିତ ୧୪୪ ଟି ଭିନ୍ନ ଭିନ୍ନ ପ୍ରତିମା ଏବଂ କଳାକୃତି ସ୍ଥାପନ କରିବା ପାଇଁ ଯୋଜନା ରହିଛି। ତେବେ କଠୋରପନ୍ଥୀମାନେ ବର୍ତ୍ତମାନ ଏହି ମହାନ କଳାତ୍ମକ ଏବଂ ଧାର୍ମିକ ଐତିହ୍ୟକୁ ନଷ୍ଟ କରିବାକୁ ଲାଗିପଡ଼ିଛନ୍ତି।
ପ୍ରମାଣ ବିନା ସୋସିଆଲ ମିଡିଆରେ ଗୁଜବ ପ୍ରସାର କରାଯାଉଛି
ଏହି ବିବାଦକୁ ଇନ୍ଧନ ଯୋଗାଇବା ପାଇଁ ପାକିସ୍ତାନ ସମର୍ଥକ ଏବଂ ତୁର୍କୀ ସମର୍ଥକ ଅନଲାଇନ୍ କର୍ମୀଙ୍କ ଏକ ବଡ଼ ନେଟୱାର୍କ ବ୍ୟବହାର କରାଯାଉଛି। କୌଣସି ଠୋସ୍ ପ୍ରମାଣ ବିନା ସୋସିଆଲ ମିଡିଆରେ ଗୁଜବ ପ୍ରସାର କରାଯାଉଛି ଯେ, ମନ୍ଦିରଟି ଭାରତର ଗୁପ୍ତଚର ସଂସ୍ଥା, ‘ର’ ରୁ ପାଣ୍ଠି ପାଉଛି। ଫ୍ରାନ୍ସ ଏବଂ ଆମେରିକାରୁ ପରିଚାଳିତ ଏହି ଡିଜିଟାଲ ପ୍ରଚାର ବାଂଲାଦେଶୀ ମୁସଲମାନମାନଙ୍କୁ ଭାରତ ବିରୋଧରେ ଜିହାଦ କରିବାକୁ, ଗଜୱା-ଏ-ହିନ୍ଦ୍କୁ ବାସ୍ତବରେ ପରିଣତ କରିବାକୁ ଏବଂ ହିନ୍ଦୁମାନଙ୍କର ଏକ ନରସଂହାର କରିବାକୁ ଉସୁକାଉଛି। ଏହି ନେଟୱାର୍କ ପୂର୍ବରୁ ଇସକନ ବିରୋଧରେ ଘୃଣା ପ୍ରସାର ଏବଂ ହିନ୍ଦୁ ସନ୍ୟାସୀ ଚିନ୍ମୟ କୃଷ୍ଣ ଦାସଙ୍କ ଗିରଫଦାରୀରେ ପ୍ରମୁଖ ଭୂମିକା ଗ୍ରହଣ କରିଥିଲା। ହେଫାଜତ-ଏ-ଇସଲାମ ମନ୍ଦିର ଭାଙ୍ଗିବା ଦାବିକୁ ଖୋଲାଖୋଲି ସମର୍ଥନ କରିବା ପରେ ଏହି ଅନଲାଇନ୍ ଘୃଣା ଅଭିଯାନ ବିପଜ୍ଜନକ ହୋଇଯାଇଥିଲା।
ରାଜନୈତିକ ବିଶ୍ଳେଷକମାନଙ୍କ ଅନୁସାରେ ଏହି ଆକ୍ରମଣ କେବଳ ଗୋଟିଏ ହିନ୍ଦୁ ମନ୍ଦିର ଉପରେ ନୁହେଁ, ବରଂ ବାଂଲାଦେଶର ଧର୍ମନିରପେକ୍ଷ ଏବଂ ଗଣତାନ୍ତ୍ରିକ ଗଠନ ଉପରେ, କରାଯାଉଛି। ଯାହା ଦେଶର ସାମ୍ବିଧାନିକ ବ୍ୟବସ୍ଥାର ଉଲ୍ଲଂଘନ କରୁଛି । ଯଦି ସମୟ ମଧ୍ୟରେ ଏହି ଉଗ୍ରବାଦୀ ଏବଂ ଘୃଣା ପ୍ରସାରକାରୀଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ, ତେବେ ବାଂଲାଦେଶ ପୁଣି ଥରେ ସାମ୍ପ୍ରଦାୟିକ ହିଂସାରେ ବୁଡ଼ିଯିବ ଯେଉଁଠାରୁ ବାହାରିବା ଅସମ୍ଭବ ହେବ।
ସୌଜନ୍ୟ ସମ୍ବାଦ
