ବାରିପଦା: ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅଞ୍ଚଳରେ ଘଟିଥିବା ଏକ ନାବାଳିକା ଦୁଷ୍କର୍ମ ଘଟଣାରେ ମାନ୍ୟବର ଅଦାଲତ ଆଜି ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ମୟୂରଭଞ୍ଜ ଜିଲ୍ଲା ସ୍ୱତନ୍ତ୍ର ଫାଷ୍ଟଟ୍ରାକ କୋର୍ଟର ବିଚାରପତି ସନ୍ତୋଷ କୁମାର ନାୟକ ୪ ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ସହ ଭିନ୍ନ ଭିନ୍ନ ଦଣ୍ଡାଦେଶ ପ୍ରଦାନ କରିଛନ୍ତି।
- ମୁଖ୍ୟ ଅଭିଯୁକ୍ତ ରୋହିଦାସ ସିଂ ଓ ନାରାୟଣ ହେମ୍ବ୍ରମଙ୍କୁ ମାନ୍ୟବର କୋର୍ଟ ଆଜୀବନ କାରାଦଣ୍ଡ ଶୁଣାଇଛନ୍ତି।
- ଘଟଣାରେ ସଂପୃକ୍ତ ଥିବା ଅନ୍ୟ ଦୁଇ ସହଯୋଗୀ ପ୍ରକାଶ ସୋରେନ୍ ଓ ସାଇବୁ ସୋରେନ୍ଙ୍କୁ ୩ ବର୍ଷ ଲେଖାଏଁ ଜେଲ ଦଣ୍ଡ ମିଳିଛି।
- ଦୋଷୀମାନଙ୍କୁ କାରାଦଣ୍ଡ ସହ ଆର୍ଥିକ ଜରିମାନା ମଧ୍ୟ କରାଯାଇଛି।
ମୁଖ୍ୟ ଅଭିଯୁକ୍ତଙ୍କୁ କଠୋର ଦଣ୍ଡ
ଅଦାଲତର ରାୟ ଅନୁଯାୟୀ, ଦୁଇ ମୁଖ୍ୟ ଅଭିଯୁକ୍ତ ରୋହିଦାସ ସିଂ ଓ ନାରାୟଣ ହେମ୍ବ୍ରମଙ୍କୁ ଆଜୀବନ କାରାଦଣ୍ଡ ସହ ପ୍ରତ୍ୟେକଙ୍କୁ ୧୦ ହଜାର ଟଙ୍କା ଲେଖାଏଁ ଜରିମାନା କରାଯାଇଛି। ଜରିମାନା ଅନାଦେୟ କ୍ଷେତ୍ରରେ ସେମାନଙ୍କୁ ଅଧିକ ୬ ମାସ କାରାଦଣ୍ଡ ଭୋଗିବାକୁ ପଡ଼ିବ। ସେହିପରି ଅନ୍ୟ ଦୁଇ ଅଭିଯୁକ୍ତ ପ୍ରକାଶ ସୋରେନ୍ ଓ ସାଇବୁ ସୋରେନ୍ଙ୍କୁ ୩ ବର୍ଷ ଲେଖାଏଁ କାରାଦଣ୍ଡାଦେଶ ସହ ୩ ହଜାର ଟଙ୍କା ଲେଖାଏଁ ଜରିମାନା ଏବଂ ଜରିମାନା ନଦେଲେ ଅଧିକ ୩ ମାସ ଜେଲ ଦଣ୍ଡାଦେଶ ଶୁଣାଯାଇଛି।
୨୦୨୧ ମସିହାର ଘଟଣା
ସୂଚନାଯୋଗ୍ୟ ଯେ, ୨୦୨୧ ମସିହାରେ ବିଶୋଇ ଥାନା ଅଞ୍ଚଳରେ ଏହି ଅଭାବନୀୟ ଘଟଣା ଘଟିଥିଲା। ଜଣେ ନାବାଳିକାଙ୍କୁ ଦୁଷ୍କର୍ମ କରାଯାଇଥିବା ନେଇ ଅଭିଯୋଗ ହେବା ପରେ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏହି ମାମଲାକୁ ଏଡହକ୍ କୋର୍ଟ ସ୍ପେଶାଲ ପି.ପି ପ୍ରଭାତ ବେହେରା ପରିଚାଳନା କରୁଥିଲେ। ଦୀର୍ଘ ଦିନର ଶୁଣାଣି ଏବଂ ସାକ୍ଷ୍ୟ ପ୍ରମାଣକୁ ଆଧାର କରି ମାନ୍ୟବର କୋର୍ଟ ଆଜି ଏହି କଠୋର ଦଣ୍ଡାଦେଶ ଶୁଣାଇଛନ୍ତି।
ନ୍ୟାୟିକ ପ୍ରକ୍ରିୟାରେ ଏକ ବଡ଼ ସଫଳତା
ମୟୂରଭଞ୍ଜ ଜିଲ୍ଲା ସ୍ୱତନ୍ତ୍ର ଫାଷ୍ଟଟ୍ରାକ କୋର୍ଟର ଏହି ରାୟ ନାବାଳିକାଙ୍କୁ ନ୍ୟାୟ ପ୍ରଦାନ କରିବା ଦିଗରେ ଏକ ବଡ଼ ପଦକ୍ଷେପ। ସମାଜରେ ନାବାଳିକାଙ୍କ ପ୍ରତି ହେଉଥିବା ଜଘନ୍ୟ ଅପରାଧ ରୋକିବା ପାଇଁ ଏଭଳି ଦଣ୍ଡାଦେଶ ଅନ୍ୟ ଅପରାଧୀଙ୍କ ପାଇଁ ଏକ ଚେତାବନୀ ସାଜିବ ବୋଲି ଚର୍ଚ୍ଚା ହେଉଛି। ମାନ୍ୟବର ବିଚାରପତି ସାକ୍ଷ୍ୟ ପ୍ରମାଣକୁ ତନ୍ନତନ୍ନ କରି ଯାଞ୍ଚ କରିବା ପରେ ଏହି ରାୟ ଶୁଣାଇଛନ୍ତି।
ସୌଜନ୍ୟ Prameya News7