Bharat Jodo: ଭାରତ ଯୋଡ଼ ଯାତ୍ରା ଥିଲା ଭାରତୀୟ ରାଜନୀତିର ନିର୍ଣ୍ଣାୟକ ମୋଡ଼: କଂଗ୍ରେସ

ନୂଆଦିଲ୍ଲୀ: ରାହୁଲ ଗାନ୍ଧୀଙ୍କ ନେତୃତ୍ୱରେ ଆୟୋଜିତ ‘ଭାରତ ଯୋଡ଼ ଯାତ୍ରା’ ଭାରତୀୟ ରାଜନୀତିରେ ଏକ ନିର୍ଣ୍ଣାୟକ ମୋଡ଼ ଥିଲା ବୋଲି କଂଗ୍ରେସ କହିଛି। ଯାତ୍ରା ଆରମ୍ଭର ଚତୁର୍ଥ ବାର୍ଷିକୀ ଅବସରରେ ଦଳ କହିଛି, ଏହା ନୂଆ ଆଶା, ନୂଆ ଶକ୍ତି ଓ ନୂଆ ସଂକଳ୍ପ ସୃଷ୍ଟି କରିଥିଲା।

କଂଗ୍ରେସ ମହାସଚିବ ଜୟରାମ ରମେଶ କହିଛନ୍ତି, ଏହି ପଦଯାତ୍ରା ‘ମନ୍‌ କୀ ବାତ୍‌’ ପ୍ରବଚନ ଦେବା ପାଇଁ ନୁହେଁ, ବରଂ ‘ଜନତାଙ୍କ ଚିନ୍ତା’ ଶୁଣିବା ପାଇଁ ଉଦ୍ଦିଷ୍ଟ ଥିଲା। ୨୦୨୨ ସେପ୍ଟେମ୍ବର ୭ରେ କନ୍ୟାକୁମାରୀର ବିବେକାନନ୍ଦ ସ୍ମାରକୀ ପରିଦର୍ଶନ ପରେ ରାହୁଲ ଗାନ୍ଧୀ ପ୍ରାୟ ୧୨୦ ଜଣ ‘ଭାରତ ଯାତ୍ରୀ’ଙ୍କ ସହ ଏହି ଯାତ୍ରା ଆରମ୍ଭ କରିଥିଲେ। ୧୪୫ ଦିନ ଧରି ଚାଲିଥିବା ଏହି ପଦଯାତ୍ରାରେ ୧୨ଟି ରାଜ୍ୟ ଓ ୨ଟି କେନ୍ଦ୍ରଶାସିତ ଅଞ୍ଚଳ ଦେଇ ୪,୦୮୦ କିଲୋମିଟର ଦୂରତା ଅତିକ୍ରମ କରାଯାଇଥିଲା।

ଶ୍ରୀନଗରରେ ଏକ ବିଶାଳ ରାଲି ସହ ଏହାର ସମାପ୍ତି ହୋଇଥିଲା। ରମେଶ କହିଛନ୍ତି, ବଢ଼ୁଥିବା ଆର୍ଥିକ ଅସମାନତା, ସାମାଜିକ ଧ୍ରୁବୀକରଣ ଓ ରାଜନୈତିକ ସ୍ୱେଚ୍ଛାଚାରିତାକୁ ନେଇ ଚିନ୍ତିତ ଲକ୍ଷ ଲକ୍ଷ ଭାରତୀୟଙ୍କଠାରୁ ଯାତ୍ରାକୁ ସମର୍ଥନ ମିଳିଥିଲା। ଏହା ସମ୍ବିଧାନର ନୀତି, ବ୍ୟବସ୍ଥା ଓ ପ୍ରଥା ବିରୋଧରେ ଆରଏସ୍‌ଏସ୍‌-ବିଜେପିର ବ୍ୟବସ୍ଥିତ ଆକ୍ରମଣ ବିରୋଧରେ ଏକ ବିଚାରଧାରାତ୍ମକ ଆହ୍ୱାନ ମଧ୍ୟ ଥିଲା ବୋଲି ସେ କହିଛନ୍ତି।

ସୌଜନ୍ୟ ସମ୍ବାଦ