କୋଲକାତା: ଗତବର୍ଷ ନଭେମ୍ବରରେ ଏନ୍ଡିଏର ବିହାର ବିଜୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ, ଗଙ୍ଗା ନଦୀ ବିହାର ଦେଇ ବଙ୍ଗଳାକୁ ପ୍ରବାହିତ ହେଉଛି। ଏହା ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ଲକ୍ଷ୍ୟ କରି କୁହାଯାଇଥିଲା, ଯାହା ମମତା ବାନାର୍ଜୀଙ୍କୁ ଏକ ସ୍ପଷ୍ଟ ବାର୍ତ୍ତା ଦେଇଥିଲା। ପାଞ୍ଚ ମାସ ପରେ ବିଜେପି ଦୀର୍ଘଦିନ ଧରି ଟାର୍ଗେଟ୍ କରି ଆସୁଥିବା ପୂର୍ବ ରାଜ୍ୟକୁ ଦଖଲ କରିଥିଲା। ଦଳ ୨୦୦ ଆସନ ପାଖାପାଖି ଥିବାବେଳେ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ ଦୁଇ ଅଙ୍କରେ ସୀମିତ ରହିଛି। ଏହି ଫଳାଫଳ ବିଜେପି ପାଇଁ ଏକ ଐତିହାସିକ ବିଜୟ ଏବଂ ଟିଏମ୍ସିର ୧୫ ବର୍ଷ ଶାସନର ଅନ୍ତ ଘଟାଇଛି।
ଏକ୍ଜିଟ୍ ପୋଲ୍ ବିଜେପି ଜିତିବ ବୋଲି ପୂର୍ବାନୁମାନ କରିଥିଲା। ପାଞ୍ଚଟି ସଂସ୍ଥା ବିଜେପି ୧୪୬ରୁ ୧୯୨ଟି ଭିତରେ ଆସନ ପାଇବ ବୋଲି କହିଥିଲେ। ଅନ୍ୟପକ୍ଷରେ, ଦୁଇଟି ସଂସ୍ଥା ମମତା ବାନାର୍ଜୀଙ୍କ ପ୍ରତ୍ୟାବର୍ତ୍ତନର ପୂର୍ବାନୁମାନ କରିଥିଲେ। ଟିଏମ୍ସି ୨୨୦ରୁ ଅଧିକ ଆସନ ଜିତିବ ବୋଲି ବାହୁସ୍ଫୋଟ ମାରିଥିଲା। ତେବେ ମମତା ବାନାର୍ଜୀଙ୍କ ଆଶା ଧୂଳିସାତ୍ ହୋଇଯାଇଛି। ତାଙ୍କର ଦମ୍ଭ ଭାଙ୍ଗିଯାଇଛି।
ଉତ୍ତର ବଙ୍ଗଳାରେ ବିଜେପି ଆଗୁଆ ଅଛି, ଯାହା ନିକଟ ଅତୀତରେ ଦଳର ଗଡ଼ ଭାବରେ ଉଭା ହୋଇଛି। ତଥାପି, ଏହା ଅନେକ ଗୁରୁତ୍ୱପୂର୍ଣ୍ଣ ଟିଏମ୍ସି ଗଡ଼ରେ ମଧ୍ୟ ପ୍ରବେଶ କରିଥିଲା। ମେଦିନୀପୁରରେ ବିଜେପି ଆଦିବାସୀ ଭୋଟ୍ ପାଇଛି। ତା’ପରେ ଟିଏମ୍ସିର ଅନ୍ୟ ଏକ ଗଡ଼ ବର୍ଦ୍ଧମାନରେ ଗୈରିକ ଦଳ ଜିତିବାକୁ ଯାଉଛି।
କୋଲକାତା ଓ ହାୱଡାର ପ୍ରମୁଖ ସହରାଞ୍ଚଳ ପକେଟ୍ ମଧ୍ୟ ଟିଏମ୍ସିକୁ ଝଟକା ଦେଇ ନିର୍ବାଚନକୁ ବିଜେପି ସପକ୍ଷରେ ନେଇଥିବା ଜଣାପଡିଛି। ପ୍ରେସିଡେନ୍ସି ଅଂଚଳରେ ମଧ୍ୟ ବିଜେପିର ଜୁଆର ଉଠିଛି। ଭୋଟର ତାଲିକାର ସ୍ବତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ପରେ ଅନେକ ଭୋଟର ତାଲିକାରୁ କଟିଥିବା ଅଞ୍ଚଳ ମଧ୍ୟରୁ ମାଲଦା ଅନ୍ୟତମ, ଯେଉଁଠି ଟିଏମ୍ସି ଜିତିବାକୁ ଯାଉଛି। ଦକ୍ଷିଣ କୋଲକତାରେ ମମତା ବାନାର୍ଜୀଙ୍କ ଗଡ଼ ଭବାନୀପୁରରେ ମୁଖ୍ୟମନ୍ତ୍ରୀ ୧୭,୦୦୦ରୁ ଅଧିକ ଭୋଟ୍ ପାଇ ଆଗୁଆ ଅଛନ୍ତି।
ବଙ୍ଗଳା ଲଢ଼େଇ ଉପରେ ମନ୍ତବ୍ୟ ଦେଇ ବିଜେପିର ରାଜ୍ୟ ସଭାପତି ଶମିକ ଭଟ୍ଟାଚାର୍ଯ୍ୟ ରବିବାର କହିଛନ୍ତି ଯେ, ଚଳିତ ବର୍ଷ ପ୍ରତ୍ୟାଖ୍ୟାନର ନିର୍ବାଚନ ହୋଇଛି। ସେ କହିଛନ୍ତି, ଶିକ୍ଷକ ନିଯୁକ୍ତି ଦୁର୍ନୀତିଠାରୁ ଆରମ୍ଭ କରି ବେକାରୀ ପର୍ଯ୍ୟନ୍ତ ସମସ୍ତ କାରଣ ତୃଣମୂଳ କଂଗ୍ରେସର ଦୁର୍ଗତିରେ ସହାୟକ ହେଉଛି।
ବଙ୍ଗଳାର ହିନ୍ଦୁମାନଙ୍କୁ କ୍ଷତି ପହଞ୍ଚାଇଛି
ମମତା ବାନାର୍ଜୀଙ୍କ ମୁସଲମାନ ତୁଷ୍ଟୀକରଣ ରାଜନୀତି କାଳ ହେଲା। ବିଜେପି ଦାବି କରିଛି ଯେ ଏହା ବଙ୍ଗଳାର ହିନ୍ଦୁମାନଙ୍କୁ କ୍ଷତି ପହଞ୍ଚାଇଛି। ସାଂସ୍କୃତିକ ଭାବନା ଜାଗ୍ରତ କରିବା ପାଇଁ ତୃଣମୂଳ କଂଗ୍ରେସ ‘ବଙ୍ଗାଳୀ ପରିଚୟ’ ଏବଂ ‘ବାଂଲା ନିଜେର ମେୟେକେ ଚାୟ’ (ବଙ୍ଗଳା ନିଜର ଝିଅକୁ ଚାହୁଛି)’ ଉପରେ ଧ୍ୟାନ ଦେଇଥିଲା। ବିଜେପି ଜିତିଲେ ମାଛ ସମେତ ଆମିଷ ଖାଦ୍ୟ ଉପରେ ପ୍ରତିବନ୍ଧକ ଲଗାଯିବ ବୋଲି ମମତା କହିଥିଲେ। ଏହି କାହାଣୀକୁ ଦମନ କରିବା ପାଇଁ, ଗେରୁଆ ଦଳ ସେମାନଙ୍କ ନେତାମାନଙ୍କୁ କ୍ୟାମେରା ଆଗରେ ମାଛ ଖାଇବା ପାଇଁ ବଙ୍ଗଳାକୁ ପଠାଇଥିଲା।
କିନ୍ତୁ ବଙ୍ଗଳାର ଲୋକମାନେ ପରିବର୍ତ୍ତନ ଚାହୁଥିଲେ। ତେଣୁ ମମତାଙ୍କ ନ୍ୟାରେଟଇଭ୍ ସେମାନଙ୍କ ଉପରେ କିଛି ପ୍ରଭାବ ପକାଇଲା ନାହିଁ। ବିଜେପି ଦାବି କରିଛି ଯେ ବେରୋଜଗାରୀ, ଲୋକଙ୍କୁ ଭୟଭୀତ କରିବା, ଗୁଣ୍ଡା ସଂସ୍କୃତି ଓ ଦୁର୍ନୀତି ଲୋକଙ୍କୁ ତୃଣମୂଳ କଂଗ୍ରେସକୁ ବରଖାସ୍ତ କରିବାକୁ ବାଧ୍ୟ କରିଛି। ଯାହାଫଳରେ ପାଖପାଖି ୨୦୦ରୁ ଅଧିକ ଆସନ ହାସଲ କରି ବିଜେପି ବିଶାଳ ବିଜୟ ସହ ସରକାର ଗଢ଼ିବାକୁ ଯାଉଛି।
ସୌଜନ୍ୟ ସମ୍ବାଦ
