ନୂଆଦିଲ୍ଲୀ: ଆସାମରେ ବିଜେପି କ୍ଷମତା ବଜାୟ ରଖିଥିବା ବେଳେ ପଶ୍ଚିମବଙ୍ଗରେ ପ୍ରଥମ କରି ସରକାର ଗଢ଼ିବାକୁ ଯାଉଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାକୁ ପ୍ରଶଂସା କରିଛନ୍ତି। ସୋମବାର ନୂଆଦିଲ୍ଲୀସ୍ଥିତ ଭାରତୀୟ ଜନତା ପାର୍ଟି (ବିଜେପି) ମୁଖ୍ୟାଳୟରେ ଉଲ୍ଲସିତ ଦଳୀୟ କର୍ମୀମାନଙ୍କୁ ସମ୍ବୋଧିତ କରି ମୋଦୀ କହିଥିଲେ, ଶେଷରେ ବଙ୍ଗଳାରେ ପଦ୍ମ ଫୁଟିଛି। ମୋଦୀ କହିଛନ୍ତି, ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନ ସବୁଦିନ ପାଇଁ ସ୍ମରଣୀୟ ହୋଇ ରହିବ। ଜନଶକ୍ତି ବିଜୟୀ ହୋଇଛି।
ସେ ରାଜ୍ୟ ପାଇଁ ଏକ ନୂତନ ସକାଳର ପ୍ରତିଶ୍ରୁତି ଦେଇ ନୂତନ ବିଜେପି ସରକାରଙ୍କ ପ୍ରଥମ କ୍ୟାବିନେଟ୍ ବୈଠକରେ ଆୟୁଷ୍ମାନ ଭାରତ ଯୋଜନାକୁ ମଞ୍ଜୁରି ଦିଆଯିବ ବୋଲି ଘୋଷଣା କରିଛନ୍ତି। ବିଜେପି ସଭାପତି ନିତିନ ନବୀନ ତାଙ୍କ ଭାଷଣରେ କହିଛନ୍ତି, ପାଞ୍ଚଟି ରାଜ୍ୟରେ ଆମକୁ ମିଳିଥିବା ଐତିହାସିକ ସମର୍ଥନ ପାଇଁ ମୁଁ ଭାରତର ଲୋକଙ୍କୁ ହୃଦୟରୁ କୃତଜ୍ଞତା ଜଣାଉଛି। ପ୍ରଧାନମନ୍ତ୍ରୀ କହିଛନ୍ତି, ଜଣେ କାର୍ଯ୍ୟକର୍ତ୍ତା ଭାବରେ ମୁଁ ଏହି ଅବସରରେ ଅନ୍ୟ ବିଜେପି କର୍ମୀଙ୍କ ସହ ଯୋଗ ଦେଉଛି। ସେ ଏହି ଫଳାଫଳକୁ ଏକ ଭାରତ, ଶ୍ରେଷ୍ଠ ଭାରତ ପାଇଁ ଆଶା ବୋଲି କହିଛନ୍ତି। ତାମିଲନାଡୁ, ପଶ୍ଚିମବଙ୍ଗ, କେରଳମ୍, ପୁଡୁଚେରୀ ଓ ଆସାମର ଲୋକଙ୍କୁ ସେମାନଙ୍କ ଜନାଦେଶ ପାଇଁ ମୋଦୀ ଧନ୍ୟବାଦ ଜଣାଇଛନ୍ତି। ସେ ବିଜେପି କାର୍ଯ୍ୟକର୍ତ୍ତାଙ୍କୁ ମଧ୍ୟ କୃତଜ୍ଞତା ଜଣାଇଛନ୍ତି, ଯେଉଁମାନେ ଆଜି ଇତିହାସର ପୁନର୍ଲିଖନରେ ସାହାଯ୍ୟ କରିଛନ୍ତି।
‘ପଶ୍ଚିମବଙ୍ଗ ଓ ଆସାମରେ ବିଜୟ ଐତିହାସିକ’
ପଶ୍ଚିମବଙ୍ଗରେ ବିଜେପିର ପ୍ରଥମ ବିଜୟ ବିଷୟରେ ଉଲ୍ଲେଖ କରି ମୋଦୀ କହିଛନ୍ତି, ଶେଷରେ ପଦ୍ମ ଫୁଟିଛି। ସେ କହିଛନ୍ତି ଯେ ଜଗତ ପ୍ରକାଶ ନଡ୍ଡାଙ୍କ ପରେ ବିଜେପିର ନୂତନ ରାଷ୍ଟ୍ରୀୟ ସଭାପତି ହେବା ପରେ ଏହା ହେଉଛି ପ୍ରଥମ ବିଧାନସଭା ନିର୍ବାଚନ। ଆମେ ବିଶ୍ୱକୁ ଦେଖାଇଛୁ ଯେ ଆମେ କିପରି ଗଣତନ୍ତ୍ରର ଜନନୀ। କେବଳ ଭାରତର ଗଣତନ୍ତ୍ର ନୁହେଁ, ଭାରତର ସମ୍ବିଧାନ ମଧ୍ୟ ଜିତିଛି। ଆମର ଗଣତାନ୍ତ୍ରିକ ପ୍ରକ୍ରିୟା ମଧ୍ୟ ଜିତିଛି। ପଶ୍ଚିମବଙ୍ଗରେ ପ୍ରାୟ ୯୩% ମତଦାନ ଏକ ଐତିହାସିକ ଉପଲବ୍ଧି ବୋଲି ସେ କହିଛନ୍ତି। ସେ କହିଛନ୍ତି ଯେ ଆସାମ, ତାମିଲନାଡୁ, ପୁଡୁଚେରୀ ଓ କେରଳମ୍ରେ ମଧ୍ୟ ଏହି ନିର୍ବାଚନରେ ଐତିହାସିକ ମତଦାନ ହୋଇଛି। ଅଧିକ ମତଦାନ କରିବାରେ ପ୍ରମୁଖ ଭୂମିକା ଗ୍ରହଣ କରିଥିବାରୁ ମହିଳା ଭୋଟରଙ୍କୁ ମୋଦୀ ଶ୍ରେୟ ଦେବା ସହ ଏହାକୁ ‘ଭାରତୀୟ ଗଣତନ୍ତ୍ରର ଉଜ୍ଜ୍ୱଳ ଚିତ୍ର’ ବୋଲି କହିଛନ୍ତି। ନିର୍ବାଚନ ହେବାକୁ ଥିବା ରାଜ୍ୟରେ ନିୟୋଜିତ ସୁରକ୍ଷା ବାହିନୀକୁ ମଧ୍ୟ ସେ କୃତଜ୍ଞତା ଜଣାଇଛନ୍ତି।
ସୌଜନ୍ୟ ସମ୍ବାଦ
