Death case: ତ୍ବିଷାଙ୍କ ଚରିତ୍ରକୁ ବଦନାମ କରିବା ପାଇଁ କୌଣସି ସୁଯୋଗ ଛାଡ଼ି ନାହାନ୍ତି ଗିରିବାଳା: ସିବିଆଇ
ନୂଆଦିଲ୍ଲୀ: ତ୍ୱିଷା ଶର୍ମାଙ୍କ ମୃତ୍ୟୁ ମାମଲାରେ ପୂର୍ବତନ ବିଚାରପତି ଗିରିବାଳା ସିଂହଙ୍କ ବିରୋଧରେ ସିବିଆଇ ଅଦାଲତରେ କେତେକ ଗମ୍ଭୀର ତଥ୍ୟ ଉପସ୍ଥାପନ କରିଛି। ଏଜେନ୍ସି ଗିରିବାଳାଙ୍କ ବିରୋଧରେ ଯୌତୁକ ନିର୍ଯାତନା, ବଳପୂର୍ବକ ଗର୍ଭପାତ କରାଇବା ଏବଂ ପ୍ରମାଣ ନଷ୍ଟ କରିବାକୁ ଚେଷ୍ଟା କରୁଥିବା ଅଭିଯୋଗ କରିଛି। କୋର୍ଟରେ ସିବିଆଇ କହିଛି ଯେ, ଗିରିବାଳା ସିଂହ ତ୍ବିଷାଙ୍କ ଚରିତ୍ରକୁ ବଦନାମ କରିବା ପାଇଁ କୌଣସି ସୁଯୋଗ ହାତଛଡ଼ା କରିନାହାନ୍ତି।
ସିବିଆଇ ହାଇକୋର୍ଟଙ୍କୁ କହିଛି ଯେ ତ୍ବିଷା ଶର୍ମାଙ୍କ ହାତ, ଗୋଡ଼ ଓ କହୁଣୀରେ ଆଘାତ ଲାଗିଛି, କିନ୍ତୁ ସେହି ଆଘାତ କିପରି ହେଲା ସେ ବିଷୟରେ ତାଙ୍କ ଶାଶୂଘର କୌଣସି ସ୍ପଷ୍ଟୀକରଣ ଦାଖଲ କରିନାହାନ୍ତି। ସିବିଆଇ କୋର୍ଟଙ୍କୁ ଆହୁରି ସୂଚନା ଦେଇଛି ଯେ, ଅନୁସନ୍ଧାନ ସମୟରେ ମିଳିଥିବା ହ୍ୱାଟ୍ସଆପ୍ ଚାଟ୍ରୁ ଜଣାପଡିଛି ଯେ ଗିରିବାଳା ସିଂହ ଏବଂ ତ୍ବିଷାଙ୍କ ସ୍ୱାମୀ ସମର୍ଥ ସିଂହ ଗର୍ଭବତୀ ଥିବା ଜଣାପଡ଼ିବା ପରେ ତାଙ୍କ ଚରିତ୍ର ଉପରେ ସନ୍ଦେହ କରିଥିଲେ ଏବଂ ତ୍ବିଷାଙ୍କୁ ଗର୍ଭପାତ ପାଇଁ ବାଧ୍ୟ କରାଯାଇଥିଲା। ଏଜେନ୍ସି ସାକ୍ଷୀଙ୍କ ବିବୃତିକୁ ମଧ୍ୟ ଦର୍ଶାଇ ଦାବି କରିଛି ଯେ, ଏକାଧିକ ଥର ଯୌତୁକ ମଗାଯାଇଥିଲା, ବିବାହ ସମୟରେ ଦିଆଯାଇଥିବା ଯୌତୁକ ସେମାନଙ୍କ ମାନକ ଅନୁଯାୟୀ ନ ଥିଲା ବୋଲି ଅଭିଯୋଗ ହୋଇଛି।
ଗିରିବାଳା ସିଂହ ସୋସିଆଲ ମିଡିଆରେ ଆଂଶିକ ଭିଡିଓ କ୍ଲିପ୍ ପ୍ରଚାର କରି ପ୍ରମାଣ ନଷ୍ଟ କରିବାକୁ ଚେଷ୍ଟା କରିଥିବା ସିବିଆଇ ଅଭିଯୋଗ କରିଛି। ସିବିଆଇ କୋର୍ଟଙ୍କୁ କହିଛି ଯେ ଏହି ମାମଲାକୁ ଘେରି ରହିଥିବା କାହାଣୀକୁ ପ୍ରଭାବିତ କରିବା ପାଇଁ ସେ ଅନଲାଇନରେ ଏକ ଭିଡିଓ ରେକର୍ଡିଂର ଏକ ସଂକ୍ଷିପ୍ତ, ନିର୍ବାଚିତ ଅଂଶ ଲିକ୍ କରିଛନ୍ତି।
ଏହାପରେ ମଧ୍ୟପ୍ରଦେଶ ହାଇକୋର୍ଟ ଗିରିବାଳା ସିଂହଙ୍କୁ ଦିଆଯାଇଥିବା ଆଗୁଆ ଜାମିନକୁ ଖାରଜ କରିଦେଇଛନ୍ତି। ଭୋପାଳର ଦଶମ ଅତିରିକ୍ତ ସେସନ୍ସ ଜଜଙ୍କ ଦ୍ୱାରା ମେ ୧୫ ତାରିଖରେ ଦିଆଯାଇଥିବା ଆଦେଶକୁ ଅବକାଶକାଳୀନ ବିଚାରପତି ଦେବନାରାୟଣ ମିଶ୍ର ଏହାର ୧୭ ପୃଷ୍ଠାର ଆଦେଶରେ ଖାରଜ କରିଦେଇଛନ୍ତି। ତ୍ବିଷାଙ୍କ ପରିବାର ପକ୍ଷରୁ ହାଜର ହୋଇଥିବା ବରିଷ୍ଠ ଓକିଲ ଅନୁରାଗ ଶ୍ରୀବାସ୍ତବ ଏହି ଆଦେଶକୁ ସ୍ୱାଗତ କରିଛନ୍ତି। ଏହା ପୂର୍ବରୁ ବୁଧବାର ଭୋପାଳର ଏକ କୋର୍ଟ ତ୍ବିଷା ଶର୍ମାଙ୍କ ସ୍ୱାମୀ ସମର୍ଥ ସିଂହଙ୍କୁ ସିବିଆଇ ହେପାଜତକୁ ପଠାଇଥିଲେ। ବୁଧବାର ହାଇକୋର୍ଟ ଗିରିବାଳା ସିଂହଙ୍କ ଜାମିନ ରଦ୍ଦ କରିବା ପରେ ଗୁରୁବାର ସିବିଆଇ ତାଙ୍କୁ ଗିରଫ କରି ହେପାଜତକୁ ନେଇଛି।
ସୌଜନ୍ୟ Prameya News7
