Deep Depression: ଆନ୍ଧ୍ର ଛୁଇଁଲା, ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ଜାରି: ଆହୁରି ୪୮ ଘଣ୍ଟା ଅଜାଡ଼ିବ, ଆସିପାରେ ଆକସ୍ମିକ ବନ୍ୟା
ଭୁବନେଶ୍ୱର,୨୩/୯: ପବନ କମ୍, କିନ୍ତୁ ନିର୍ଧୁମ ବର୍ଷା । ଆହୁରି ଦୁଇଦିନ ଓଡ଼ିଶାକୁ ନୟାନ୍ତ କରିଦେବ ଏ ବର୍ଷା । କୋରାପୁଟ, ନବରଙ୍ଗପୁର, ରାୟଗଡ଼ା, ଗଞ୍ଜାମ, ଗଜପତି, କଳାହାଣ୍ଡି, ମାଲକାନଗିରିରେ ଅତ୍ୟନ୍ତ ପ୍ରବଳ ବର୍ଷା ଆଶଙ୍କା ରହିଛି । ପାଖ ଜିଲ୍ଲାରେ ବି ପ୍ରବଳ ବର୍ଷା ଢାଳିପାରେ । ୨୬ ଯାଏ ଲାଗି ରହିବ ବର୍ଷା ବିତ୍ପାତ । ଆସିପାରେ ଆକସ୍ମିକ ବନ୍ୟା । ହୋଇପାରେ ଭୂସ୍ଖଳନ । ମାଟି ଅତଡ଼ା ଓ ପଥର ଖସିବା ଭୟ ସବୁବେଳେ ରହିଛି । ପାଣିପାଗ ବିଭାଗ ଏମିତି ସର୍ତକ କରାଇଛି ।
ପ୍ରବଳରୁ ଅତି ପ୍ରବଳ ବର୍ଷା:
ଗତ ୨୪ ଘଣ୍ଟାରେ ଗଭୀର ଅବପାତ ପ୍ରଭାବରେ ଦକ୍ଷିଣ ଓ ଉପକୂଳ ଓଡ଼ିଶାର ଅଧିକାଂଶ ଅଂଚଳରେ ପ୍ରବଳରୁ ଅତି ପ୍ରବଳ ବର୍ଷା ହୋଇଛି । ଅନେକ ସ୍ଥାନରେ ଗଛ ପଡ଼ି ରାସ୍ତା ଅବରୋଧ ହୋଇଛି । କିଛି ଜାଗାରେ ପଥର ଧସିଛି ବି । ବୁଧବାର ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ୍ ବଧିନୂଆପଲ୍ଲୀ ନିକଟରେ ଗଛ ଭାଙ୍ଗି ରାସ୍ତା ଅବରୋଧ ହୋଇଥିଲା । ଜିଲ୍ଲାର ପାତ୍ରପୁର ବ୍ଲକ୍ ଚାରିଆବାଡ଼ା ଗ୍ରାମ ନିକଟରେ ପାହାଡ଼ରୁ ପଥର ଧସିବାରୁ ଆଙ୍କୁଲି- ତାଡ଼କା ସାହି ଯାତାୟାତ ବନ୍ଦ ରହିଥିଲା । ବାଘଲଟି ଡ୍ୟାମ୍ରେ ଜଳପତ୍ତନ ବୃଦ୍ଧି ଯୋଗୁ ଲୋକଙ୍କୁ ନଦୀ ନାଳରୁ ଦୂରରେ ରହିବାକୁ ପରାମର୍ଶ ଦିଆଯାଇଛି । ପୁରୁଷୋତ୍ତମପୁର ବ୍ଲକ୍ର ପ୍ରସିଦ୍ଧ ଶକ୍ତି ପୀଠ ତାରାତାରିଣୀ ମନ୍ଦିରକୁ ଲମ୍ବିଥିବା ଘାଟି ରାସ୍ତାରେ ଭୂସ୍ଖଳନ ହୋଇଛି । ଲୋହରାଖଣ୍ଡି, ବଡ଼ନଦୀ ଓ ଋଷିକୁଲ୍ୟା ନଦୀର ଜଳସ୍ତର ବୃଦ୍ଧି ପାଉଛି । ଧରାକୋଟ ବ୍ଲକ୍ ମାଣିପୁର ଗ୍ରାମ୍ୟ ରାସ୍ତାରେ ଥିବା ପୋଲ ଭାଙ୍ଗି ଯାଇଛି ।
ସୌଜନ୍ୟ ପ୍ରମେୟ
