ଭୁବନେଶ୍ବର: ଜାତୀୟ ଶିକ୍ଷା ନୀତି ମାଧ୍ୟମରେ ପିଲାମାନଙ୍କ ମଧ୍ୟରେ ଅନୁଭବ ଆଧାରିତ ଶିକ୍ଷାର ବିକାଶ ପାଇଁ ଶ୍ୟାମଳ ସୁବର୍ଣ୍ଣ ଆଗ୍ରୋ ଦ୍ୱାରା ବିଦ୍ୟାଳୟରେ କୃଷି କାର୍ଯ୍ୟକ୍ରମ ଆରମ୍ଭ କରାଯାଇଥିଲା । କୃଷି କେବଳ ଆଉ ସୀମିତ ପରିସର ଭିତରେ ନାହିଁ ବରଂ କୃଷିର ବୃହତ୍ତର ଦିଗକୁ ସମସ୍ତଙ୍କ ନିକଟରେ ପହଞ୍ଚିବା ଜରୁରୀ । ବିକଶିତ ଓଡ଼ିଶା ଗଠନରେ କୃଷି ହିଁ ପ୍ରମୁଖ ଭୂମିକା ଗ୍ରହଣ କରେ । ବର୍ତ୍ତମାନ ସମୟରେ ବୈଜ୍ଞାନିକ ଉପାୟରେ ଚାଷବାସ କରି ଅନେକ ଯୁବକ, ମହିଳା ଓ ଉଦ୍ୟୋଗୀ ମାନେ ବେଶ୍ ସଫଳତା ପାଉଛନ୍ତି । ତେବେ ପିଲାଦିନରୁ ଛାତ୍ରଛାତ୍ରୀ ମାନଙ୍କ ମଧ୍ୟରେ କୃଷିର ବିଭିନ୍ନ ସୋପାନକୁ ପହଞ୍ଚାଇବା ଦିଗରେ ବିଦ୍ୟାଳୟରେ କୃଷି କାର୍ଯ୍ୟକ୍ରମ ଶ୍ୟାମଳ ସୁବର୍ଣ୍ଣ ଆଗ୍ରୋ ଦ୍ୱାରା ଆରମ୍ଭ କରାଯାଇଥିଲା।

ସମ୍ୱଲପୁର ଲୋକସଭା ଅନ୍ତର୍ଗତ ଦେବଗଡ ଜିଲ୍ଲା ମରଡଙ୍ଗ ବିଦ୍ୟାଳୟରେ ପିଲା ମାନଙ୍କ ମଧ୍ୟରେ ଜୈବିକ ଚାଷକୁ ନେଇ ସଚେତନତା ସୃଷ୍ଟି କରିବା ପାଇଁ ସପ୍ତାହରେ ଗୋଟେ କ୍ଲାସ କୃଷି ପାଇଁ ରଖାଯାଇଥିଲା । ଯାହା ଦ୍ୱାରା ପିଲା ମାନେ ନିଜେ କେବଳ ପୁସ୍ତକ ପାଠ ନୁହେଁ ବରଂ ଦୈନନ୍ଦିନ ଜୀବନରେ ଜୈବିକ ଚାଷ ବି କେମିତି ପରିବେଶ ଆଉ ଜନଜୀବନକୁ ସୁସ୍ଥ ରଖିପାରିବ ସେ ଦିଗରେ ଜାଣି ପାରିବେ । ଏ ଦିଗରେ ବିଦ୍ୟାଳୟର ପିଲାମାନେ ଜାତୀୟ ଶିକ୍ଷା ନୀତିକୁ ବୁଝିବା ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପୋଷ୍ଟକାର୍ଡ ମାଧ୍ୟମରେ ଚିଠି ଲେଖି ସେମାନଙ୍କର ସଫଳତା ବିଷୟରେ ଜଣାଇଛନ୍ତି । ପାଠ ସହ ଓଡ଼ିଆ ଭାଷା ରେ learning by doing ଉପରେ ଗୁରୁତ୍ବ ଦେଇ ବିଦ୍ୟାଳୟରେ ଜୈବିକ ଉପାୟରେ ବିଭିନ୍ନ ଜୈବିକ ପନିପରିବା , ଜୈବିକ ଖତ ସାର ପ୍ରସ୍ତୁତି ବିଷୟରେ ଶିଖି ପାରୁଛନ୍ତି।

ସୌଜନ୍ୟ ସମ୍ବାଦ