Gujurat: ଗୁଜରାଟର ‘ଗଣିକାପଲ୍ଲୀ’ରେ ଜୀବିକାର ବିକଳ୍ପ ପାଇଁ ଉଦ୍ୟମ, ଯୌନ ବ୍ୟବସାୟରୁ ଦୂରେଇବା ପାଇଁ ଅଳ୍ପ ବୟସରେ ନିର୍ବନ୍ଧ

ଭାଡିଆ: ଗୁଜରାଟର ବନାସକାଣ୍ଠା ଜିଲ୍ଲାର ଭାଡିଆ ଗାଁକୁ ଦୀର୍ଘଦିନ ଧରି ‘ଗଣିକାପଲ୍ଲୀ’ ଭାବେ ଅପମାନଜନକ ଭାବେ ଚିହ୍ନଟ କରାଯାଇ ଆସୁଛି। ଏଠାରେ ପିଢ଼ି ପରେ ପିଢ଼ି ମହିଳାମାନେ ବାଧ୍ୟହୋଇ ଯୌନ ବ୍ୟବସାୟକୁ ଆସୁଥିବାବେଳେ ପୁରୁଷମାନେ ଗ୍ରାହକ ଯୋଗାଡ଼ କରୁଥିଲେ। ଏବେ ଏହି ପରମ୍ପରାରୁ ଝିଅମାନଙ୍କୁ ଦୂରେଇବା ପାଇଁ କିଛି ପରିବାର ଛୋଟ ବୟସରେ ସେମାନଙ୍କ ନିର୍ବନ୍ଧ କରାଉଛନ୍ତି।

ଅହମଦାବାଦଠାରୁ ପ୍ରାୟ ୨୦୦ କିମି ଦୂରରେ ଥିବା ଭାଡିଆରେ ପ୍ରାୟ ୭୫୦ ଲୋକ ରହନ୍ତି। ସେଥିରୁ ପ୍ରାୟ ୩୫୦ ଜଣ ମହିଳା। ଗାଁର ପୁରୁଷମାନେ ପ୍ରତିଦିନ ସକାଳେ ପାଲନପୁର-ଥରାଦ ରାଜପଥକୁ ଯାଇ ଟ୍ରକ୍‌ ଚାଳକ, ଯାତ୍ରୀ ଓ ଆଖପାଖ ଅଞ୍ଚଳର ପୁରୁଷଙ୍କୁ ଗ୍ରାହକ ଭାବେ ଯୋଗାଡ଼ କରୁଥିବା ଜଣାପଡ଼ିଛି। ଯୌନ ବ୍ୟବସାୟରେ ଜଡ଼ିତ ମହିଳାମାନେ ଅଧିକାଂଶ ସମୟରେ ଘର ଭିତରେ ରହନ୍ତି। ଏହି ପରିସ୍ଥିତିରୁ ଝିଅମାନଙ୍କୁ ବଞ୍ଚାଇବା ପାଇଁ କେତେକ ପରିବାର ଓ ସାମାଜିକ କର୍ମୀଙ୍କ ଉଦ୍ୟମରେ ୭ରୁ ୧୨ ବର୍ଷ ବୟସର ଝିଅଙ୍କ ନିର୍ବନ୍ଧ କରାଯାଉଛି। ଗାଁରେ ଏକ ଅଲିଖିତ ନିୟମ ହୋଇଛି ଯେ ନିର୍ବନ୍ଧ କିମ୍ବା ବିବାହ ହୋଇଥିବା ଝିଅମାନଙ୍କୁ ଯୌନ ବ୍ୟବସାୟକୁ ଠେଲାଯିବ ନାହିଁ।

୧୯ ବର୍ଷୀୟା ଜଣେ ଯୁବତୀଙ୍କ ମା’ ଓ ଜେଜେମା’ ଏହି ବ୍ୟବସାୟରେ ଥିଲେ। ଯୁବତୀ ଏବେ ନର୍ସିଂ ପଢ଼ୁଛନ୍ତି। ତାଙ୍କ ବିବାହ ପାଇଁ ୧୧ ବର୍ଷ ବୟସରେ ବର ଚୟନ ହୋଇଥିଲା ଏବଂ ୧୮ ବର୍ଷରେ ବିବାହ ହୋଇଥିଲା। ତାଙ୍କ ମା’ ଝିଅକୁ ଏହି ପରମ୍ପରାରୁ ଦୂରେଇବାକୁ ଚାହୁଥିଲେ। ଚନ୍ଦ୍ରା ସରଣିଆ ନାମକ ଜଣେ ମହିଳା ୧୫ ବର୍ଷ ବୟସରେ ଏହି ବ୍ୟବସାୟକୁ ଠେଲି ହୋଇଯାଇଥିଲେ। ପରେ ସେ ନିଜ ଝିଅକୁ ୧୨ ବର୍ଷ ବୟସରେ ନିର୍ବନ୍ଧ କରାଇ ୧୮ ବର୍ଷରେ ବିବାହ ଦେଇଥିଲେ। ୧୯୬୩ରେ ତାଙ୍କ ପରିବାରକୁ ସରକାର ଚାଷ ଜମି ଦେଇଥିଲେ ମଧ୍ୟ ଜଳସେଚନ ଅଭାବରୁ ତାଙ୍କୁ ଯୌନ ବ୍ୟବସାୟକୁ ଯିବାକୁ ପଡ଼ିଥିଲା। ଏବେ ସେ ଏକ ଛୋଟ ଦୁଗ୍ଧ ବ୍ୟବସାୟ କରୁଛନ୍ତି।

ସୌଜନ୍ୟ ସମ୍ବାଦ