Jayaram Ramesh: ମୋଦୀ ସରକାରଙ୍କ ନିଷ୍ପତ୍ତି ଯୋଗୁ ଆରାବଳୀ ପ୍ରତି ବିପଦ: ଜୟରାମ ରମେଶ

ନୂଆଦିଲ୍ଲୀ: ମୋଦୀ ସରକାରଙ୍କ ଆରାବଳୀ ପର୍ବତମାଳାର ପୁନଃ ପରିଭାଷିତ ନିଷ୍ପତ୍ତି ଯୋଗୁଁ ଏହା ବର୍ତ୍ତମାନ ସବୁଠାରୁ ଗମ୍ଭୀର ବିପଦର ସମ୍ମୁଖୀନ ହୋଇଛି ବୋଲି ବରିଷ୍ଠ କଂଗ୍ରେସ ନେତା ତଥା ପୂର୍ବତନ ପରିବେଶ ମନ୍ତ୍ରୀ ଜୟରାମ ରମେଶ ରବିବାର ଦାବି କରିଛନ୍ତି। ସୁପ୍ରିମକୋର୍ଟଙ୍କ ଦ୍ୱାରା ଗଠିତ ଉଚ୍ଚସ୍ତରୀୟ କମିଟି କେନ୍ଦ୍ର ସରକାରଙ୍କ ଏହି ପଦକ୍ଷେପକୁ ପ୍ରତ୍ୟାଖ୍ୟାନ କରିବେ ବୋଲି ସେ ଆଶା ପ୍ରକାଶ କରିଛନ୍ତି। ଖନନ, ରିଅଲ ଇଷ୍ଟେଟ୍ ଏବଂ ଅନ୍ୟାନ୍ୟ ପ୍ରକଳ୍ପକୁ ଅନୁମତି ଦେବା ପାଇଁ ମୋଦୀ ସରକାର ଆରାବଳୀର ସଂଜ୍ଞା ବଦଳାଇବାକୁ ଜିଦ୍ ଧରିଛନ୍ତି ବୋଲି ସାମାଜିକ ଗଣମାଧ୍ୟମ ‘ଏକ୍ସ’ରେ ସେ ଅଭିଯୋଗ କରିଛନ୍ତି। ଆରାବଳୀରେ ଖନନର ପରିବେଶଗତ ପ୍ରଭାବ ଉପରେ କେତେକ ରିପୋର୍ଟକୁ ନେଇ ସେ ଏହି ମନ୍ତବ୍ୟ ଦେଇଛନ୍ତି।

ସୁପ୍ରିମକୋର୍ଟଙ୍କ ଦ୍ୱାରା ଗଠିତ ଉଚ୍ଚସ୍ତରୀୟ କମିଟିକୁ ନିଜର ରିପୋର୍ଟ ଦାଖଲ କରିବା ପାଇଁ ୨୦୨୬ ନଭେମ୍ବର ୩୦ ତାରିଖ ସମୟସୀମା ଦିଆଯାଇଛି। ଏହି କମିଟି ମୋଦୀ ସରକାରଙ୍କ ପଦକ୍ଷେପକୁ ନାକଚ କରିବ ବୋଲି ସେ ଆଶା ପ୍ରକାଶ କରିଛନ୍ତି। ଦଶନ୍ଧି ଧରି ଚାଲିଥିବା ଚୂନାପଥର ଓ ମାର୍ବଲ ଭଳି ପଥରର ଖନନ ଯୋଗୁଁ ନଦୀଶଯ୍ୟା ଏବଂ ଜଳାଶୟ ନିକଟରେ ଅନେକ ପଥର ଖାଦାନ ଓ କ୍ରସର ଗଢ଼ିଉଠିଛି। ଏହା ଆରାବଳୀ ଯୋଗାଉଥିବା ଜଳ ନିରାପତ୍ତାକୁ ବିପନ୍ନ କରିଛି।

ସୌଜନ୍ୟ ସମ୍ବାଦ