Iran Attack: ପୁଣି ବାରୁଦରେ ଜଳିଲା ମଧ୍ୟପ୍ରାଚ୍ୟ: ଆମେରିକୀୟ ଘାଟି ଉପରେ କ୍ଷେପଣାସ୍ତ୍ର ମାଡ଼ କଲା ଇରାନ

ତେହେରାନ:ଇରାନ ଜୋର୍ଡାନରେ ଥିବା ଏକ ଆମେରିକୀୟ ସାମରିକ ଘାଟିକୁ ଲକ୍ଷ୍ୟ କରି ଇରାନ ଅନେକ ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିବା ପରେ ମଧ୍ୟପ୍ରାଚ୍ୟରେ ଶାନ୍ତି ଫେରାଇ ଆଣିବାର ପ୍ରୟାସକୁ ଏକ ବଡ଼ ଝଟକା ଲାଗିଛି। ଏହି ଆକ୍ରମଣ ସେହି ସମୟରେ ହୋଇଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତେହେରାନ ସହିତ କୂଟନୈତିକ ଆଲୋଚନା ପାଇଁ ପଥ ପ୍ରଶସ୍ତ କରିବା ପାଇଁ ସାମରିକ କାର୍ଯ୍ୟକଳାପ ଉପରେ ଅସ୍ଥାୟୀ ରୋକ ଲଗାଇଥିଲେ।ଆମେରିକାର କେନ୍ଦ୍ରୀୟ କମାଣ୍ଡ ସେଣ୍ଟକମ୍ ଅନୁଯାୟୀ,ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ(ଆଇଆରଜିସି) ସ୍ଥାନୀୟ ସମୟରେ ମଙ୍ଗଳବାର ସନ୍ଧ୍ୟା ପ୍ରାୟ ୫ଟା ୪୫ରେ ଜୋର୍ଡାନର ଏକ ଆମେରିକୀୟ ଘାଟି ଉପରେ ଏକ କ୍ଷେପଣାସ୍ତ୍ର ଆକ୍ରମଣ କରିଥିଲା। ଆମେରିକୀୟ ପ୍ରତିରକ୍ଷା ପ୍ରଣାଳୀର ସତର୍କତା ଯୋଗୁଁ,ସମସ୍ତ କ୍ଷେପଣାସ୍ତ୍ରକୁ ମଝି ଆକାଶରେ ସଫଳତାର ସହ ନଷ୍ଟ କରାଯାଇଥିଲା।

୩୦ରୁ ଅଧିକ ଡ୍ରୋନ୍ ଆକ୍ରମଣ

ଆମେରିକା ଏବଂ ସାଉଦି ଆରବ ସେନା ଇରାକ ଭିତରେ ମିଳିତ ବିମାନ ଆକ୍ରମଣ କରିଛନ୍ତି। ଆମେରିକୀୟ ସେନା କହିଛି ଯେ ଏହି ବିମାନ ଆକ୍ରମଣ ଇରାକ ଭିତରେ ଇରାନ ସମର୍ଥିତ ମିଲିସିଆ ଗୋଷ୍ଠୀଗୁଡ଼ିକୁ ଟାର୍ଗେଟ କରି କରାଯାଇଛି। ଏହି ମିଳିତ ଆକ୍ରମଣ ଏପରି ଏକ ସମୟରେ ହୋଇଛି ଯେତେବେଳେ ଇରାକ ଭିତରୁ ମିଲିସିଆ ଗୋଷ୍ଠୀଗୁଡ଼ିକ ଆମେରିକୀୟ ସେନା ଏବଂ ସାଉଦି ଆରବର ଶକ୍ତି ଭିତ୍ତିଭୂମିକୁ ଟାର୍ଗେଟ କରି ୩୦ ରୁ ଅଧିକ ଡ୍ରୋନ୍ ଆକ୍ରମଣ କରିଛନ୍ତି। ଫଳରେ ମଧ୍ୟପ୍ରାଚ୍ୟରେ ପୁଣି ଯୁଦ୍ଧର ନିଆଁ ଜଳିବାରେ ଲାଗିଛି।

ଇରାନର କାର୍ଯ୍ୟାନୁଷ୍ଠାନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ମଧ୍ୟରେ ହ୍ୱାଇଟ୍ ହାଉସରେ ଏକ ଉଚ୍ଚସ୍ତରୀୟ ବୈଠକର ମାତ୍ର କିଛି ଘଣ୍ଟା ପରେ କରାଯାଇଛି। ଯେଉଁଠାରେ ଦୁଇ ନେତା ଇରାନର ବର୍ଦ୍ଧିତ କାର୍ଯ୍ୟକଳାପ ଏବଂ ଆଞ୍ଚଳିକ ସୁରକ୍ଷା ବିଷୟରେ ବିସ୍ତୃତ ଭାବରେ ଆଲୋଚନା କରିଥିଲେ। ବିଡ଼ମ୍ବନାର ବିଷୟ ହେଉଛି,ମାତ୍ର ଗୋଟିଏ ଦିନ ପୂର୍ବରୁ,ଟ୍ରମ୍ପ ତେହେରାନ ସହିତ ଆଲୋଚନାକୁ ସକାରାତ୍ମକ ବୋଲି ବର୍ଣ୍ଣନା କରିଥିଲେ ଏବଂ ଏକ ପ୍ରମୁଖ ଚୁକ୍ତି ପାଇଁ ଆଶା ପ୍ରକାଶ କରିଥିଲେ। ତଥାପି,ସେ ସ୍ପଷ୍ଟ ଭାବରେ ଚେତାବନୀ ମଧ୍ୟ ଦେଇଥିଲେ ଯେ ଯଦି କୂଟନୀତି ବିଫଳ ହୁଏ, ତେବେ ଆମେରିକା ସାମରିକ କାର୍ଯ୍ୟାନୁଷ୍ଠାନରୁ ପଛଘୁଞ୍ଚା ଦେବ ନାହିଁ।

ଜୋର୍ଡାନରେ କ୍ଷେପଣାସ୍ତ୍ର ପଡ଼ିଥିବା ବେଳେ,ୟେମେନର ଇରାନ-ସମର୍ଥିତ ହୁତି ବିଦ୍ରୋହୀମାନେ ଲୋହିତ ସାଗରରେ ବିନାଶ ଘଟାଇଛନ୍ତି। ହୁତିମାନେ ସାଉଦି ଆରବର ଏକ ତୈଳ ଟ୍ୟାଙ୍କର ଉପରେ ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିଥିବା ଦାବି କରିଛନ୍ତି।

ସୌଜନ୍ୟ ସମ୍ବାଦ