Iran Conflict: ଇରାନ ଯୁଦ୍ଧ ନେଇ ଇସ୍ରାଏଲୀ ପ୍ରଧାନମନ୍ତ୍ରୀଙ୍କୁ ଚେତାବନୀ ଦେଲେ ଟ୍ରମ୍ପ
ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ବିରୋଧରେ ଯୁଦ୍ଧ ନକରିବାକୁ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କୁ ଅନୁରୋଧ କରିଛନ୍ତି। ଟ୍ରମ୍ପ ନେତାନ୍ୟାହୁଙ୍କୁ ଚେତାବନୀ ଦେଇଛନ୍ତି ଯେ, ଯଦି ଇରାନ ବିରୋଧରେ ଏକ ବଡ଼ ଧରଣର ସାମରିକ ଆକ୍ରମଣ କରାଯାଏ ତେବେ ଇସ୍ରାଏଲ ବିଶ୍ୱରେ ଏକୁଟିଆ ହୋଇଯାଇପାରେ। ଇସ୍ରାଏଲ ଏବଂ ଇରାନ ପରସ୍ପର ଉପରେ ଆକ୍ରମଣ କରିବା ଏବଂ ମଧ୍ୟପ୍ରାଚ୍ୟରେ ପୁଣି ଥରେ ଯୁଦ୍ଧ ପରି ପରିସ୍ଥିତି ସୃଷ୍ଟି ହେବା ପରେ ଟ୍ରମ୍ପଙ୍କ ଏହି ଚେତାବନୀ ଆସିଛି। ଟ୍ରମ୍ପ ବେଞ୍ଜାମିନ ନେତାନ୍ୟାହୁଙ୍କ ସହ ତାଙ୍କର ଆଲୋଚନା ବିଷୟରେ ଆକ୍ସିଓସ୍କୁ ସୂଚନା ଦେଇଛନ୍ତି। ଟ୍ରମ୍ପ କହିଛନ୍ତି ଯେ, ସେ କହିଛନ୍ତି, ବିବି (ବେଞ୍ଜାମିନ ନେତାନ୍ୟାହୁ), ତୁମେ ସତର୍କ ରହିବା ଉଚିତ୍। ଯଦି ତୁମେ ଇରାନ ଉପରେ ଏକ ବଡ଼ ଧରଣର ଆକ୍ରମଣ କର, ତେବେ ତୁମେ ଖୁବ୍ ଶୀଘ୍ର ଏକୁଟିଆ ହୋଇଯିବ। ଟ୍ରମ୍ପ ଏହି ଯୁଦ୍ଧକୁ ଆମେରିକା-ଇରାନ ଚୁକ୍ତିନାମା ପାଇଁ ଏକ ବିପଦ ବୋଲି ମଧ୍ୟ ଚେତାଇ ଦେଇଛନ୍ତି। ଏହା ଆମେରିକା ଏବଂ ତେହେରାନ ମଧ୍ୟରେ ହେବାକୁଥିବା ଚୁକ୍ତିକୁ ବିଳମ୍ବିତ କରୁଛି।
ଡୋନାଲ୍ଡ ଟ୍ରମ୍ପଙ୍କ ଚେତାବନୀ ଆସିଛି
ଇସ୍ରାଏଲ ଲେବାନନରେ ଏକ ବଡ଼ ଆକ୍ରମଣ କରିବା ପରେ ଡୋନାଲ୍ଡ ଟ୍ରମ୍ପଙ୍କ ଚେତାବନୀ ଆସିଛି। ଏହା ପରେ ଇରାନ ମଧ୍ୟ ଇସ୍ରାଏଲ ଉପରେ କ୍ଷେପଣାସ୍ତ୍ର ମାଡ଼ କରିଛି। ଫଳରେ ମଧ୍ୟପ୍ରାଚ୍ୟରେ ପୁଣି ଏକ ଯୁଦ୍ଧର ଆଶଙ୍କା ସୃଷ୍ଟି ହୋଇଛି। ପରବର୍ତ୍ତୀ ସମୟରେ ଟ୍ରମ୍ପ ଉଭୟ ପକ୍ଷକୁ ଶାନ୍ତି ପାଇଁ ନିବେଦନ କରିଥିଲେ। ସେ ନେତାନ୍ୟାହୁଙ୍କ ସହ ଫୋନ୍ ମାଧ୍ୟମରେ କଥା ହୋଇ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ଅନୁରୋଧ କରିଥିବା ଜଣାପଡ଼ିଛି। ଡୋନାଲ୍ଡ ଟ୍ରମ୍ପ ନେତାନ୍ୟାହୁଙ୍କ ସହ କଥାବାର୍ତ୍ତା ସମୟରେ ଇରାନ ବିରୋଧରେ ଏକ ବଡ଼ ଧରଣର ଆକ୍ରମଣ ଯୋଜନା ବନ୍ଦ କରିବା ପାଇଁ ଚାପ ପକାଇଥିଲେ। ଇସ୍ରାଏଲୀ ଅଧିକାରୀମାନେ କହିଛନ୍ତି ଯେ, ନେତାନ୍ୟାହୁ ପଛକୁ ହଟିବାକୁ ରାଜି ହୋଇଛନ୍ତି। ଇସ୍ରାଏଲ ଏବଂ ଇରାନ ବର୍ତ୍ତମାନ ପାଇଁ ପରସ୍ପର ଉପରେ ଆକ୍ରମଣ ବନ୍ଦ କରିଛନ୍ତି । ଉଭୟ ପକ୍ଷ ଘୋଷଣା କରିଛନ୍ତି ଯେ, ସେମାନେ ସେମାନଙ୍କର ସାମରିକ କାର୍ଯ୍ୟକଳାପକୁ ଅସ୍ଥାୟୀ ଭାବରେ ବନ୍ଦ କରୁଛନ୍ତି।
ଆକ୍ସିଓସ୍ ଅନୁଯାୟୀ, ଆମେରିକା ଏବଂ ଇସ୍ରାଏଲୀ ଅଧିକାରୀମାନେ ଦାବି କରିଛନ୍ତି ଯେ ଡୋନାଲ୍ଡ ଟ୍ରମ୍ପ ଏକ କଷ୍ଟକର ପରିସ୍ଥିତିର ସମ୍ମୁଖୀନ ହେଉଛନ୍ତି। ଗୋଟିଏ ପଟେ, ସେ ଇରାନର ଆକ୍ରମଣର ଜବାବ ଦେବା ପାଇଁ ଇସ୍ରାଏଲର ଆବଶ୍ୟକତାକୁ ବୁଝୁଛନ୍ତି, ଅନ୍ୟପଟେ, ସେ ଚିନ୍ତା କରୁଛନ୍ତି ଯେ, ପରସ୍ପର ଉପରେ ଆକ୍ରମଣ ଜାରି ରଖିବା ଦ୍ବାରା ଏକ ଆଞ୍ଚଳିକ ଯୁଦ୍ଧ ସୃଷ୍ଟି ହୋଇପାରେ।ରିପୋର୍ଟରେ ଦାବି କରାଯାଇଛି ଯେ, ଟ୍ରମ୍ପଙ୍କ ମନା ସତ୍ତ୍ୱେ ଇସ୍ରାଏଲୀ ସେନା ଲେବାନନରେ ସୀମିତ ଆକ୍ରମଣ ଜାରି ରଖିପାରେ। ତେବେ ବର୍ତ୍ତମାନ ପାଇଁ, ଟ୍ରମ୍ପଙ୍କ ଚାପ ନେତାନ୍ୟାହୁଙ୍କ ଉପରେ କାମ କରିଥିବା ପରି ମନେ ହେଉଛି। ବିଶେଷଜ୍ଞମାନଙ୍କ ଅନୁସାରେ ଏହା ଆମେରିକା-ଇସ୍ରାଏଲ ଏବଂ ଟ୍ରମ୍ପ ତଥା ନେତାନ୍ୟାହୁଙ୍କ ମଧ୍ୟରେ ମତଭେଦ ବଢ଼ିବାର ସଙ୍କେତ ଦେଉଛି।
ସୌଜନ୍ୟ Prameya News7
