Italy: ବିନା ଆପ୍ରବାସନ ଯାଞ୍ଚରେ ଦିଲ୍ଲୀ ଛାଡ଼ିଲେ ୩ ଇଟାଲୀୟ ନାଗରିକ, ଏୟାର୍ ଇଣ୍ଡିଆକୁ କାରଣ ଦର୍ଶାଅ ନୋଟିସ୍
ଆପ୍ରବାସନ ଯାଞ୍ଚ ବିନା ୩ ଜଣ ଇଟାଲୀୟ ନାଗରିକ ଦିଲ୍ଲୀରୁ ମୁନୀଚ ଯାତ୍ରା କରିଥିବା ଘଟଣାରେ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଏୟାର୍ ଇଣ୍ଡିଆକୁ କାରଣ ଦର୍ଶାଅ ନୋଟିସ୍ ଜାରି କରିଛି।
ନୂଆଦିଲ୍ଲୀ: ଆପ୍ରବାସନ ଯାଞ୍ଚ ବିନା ୩ ଜଣ ଇଟାଲୀୟ ନାଗରିକ ଦିଲ୍ଲୀରୁ ମୁନୀଚ ଯାତ୍ରା କରିଥିବା ଘଟଣାରେ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଏୟାର୍ ଇଣ୍ଡିଆକୁ କାରଣ ଦର୍ଶାଅ ନୋଟିସ୍ ଜାରି କରିଛି। ଏହାକୁ ଗୁରୁତର ତ୍ରୁଟି ଦର୍ଶାଇ ମନ୍ତ୍ରାଳୟ ୭ ଦିନ ମଧ୍ୟରେ ଜବାବ ମାଗିଛି। ଘଟଣାଟି ସେପ୍ଟେମ୍ବର ୪ ତାରିଖରେ ଘଟିଥିଲା।
୩ ଜଣ ଯାତ୍ରୀ ଏୟାର୍ ଇଣ୍ଡିଆର ଏଆଇ-୧୧୧୫ ବିମାନରେ ଅମୃତସରରୁ ଦିଲ୍ଲୀରେ ରାତି ପ୍ରାୟ ୧୨ଟା ୫୦ରେ ପହଞ୍ଚିଥିଲେ। ଏହାର ପ୍ରାୟ ଏକ ଘଣ୍ଟା ପରେ, ରାତି ୧ଟା ୪୫ରେ ସେମାନେ ଲୁଫ୍ଥାନ୍ସାର ଏଲ୍ଏଚ୍-୭୬୩ ବିମାନରେ ମୁନୀଚ ଯାତ୍ରା କରିଥିଲେ। ତେବେ ଭାରତ ଛାଡ଼ିବା ପୂର୍ବରୁ ସେମାନଙ୍କର ଆପ୍ରବାସନ ଯାଞ୍ଚ ହୋଇନଥିଲା। ମନ୍ତ୍ରାଳୟ ଅନୁଯାୟୀ, ଏୟାର୍ ଇଣ୍ଡିଆର ‘ହବ୍ ଆଣ୍ଡ ସ୍ପୋକ୍’ ବ୍ୟବସ୍ଥାରେ ଯାତ୍ରା କରୁଥିବା ଏହି ଯାତ୍ରୀମାନଙ୍କୁ ଅମୃତସରରେ ଦିଲ୍ଲୀ ପାଇଁ ‘ଡି’ ଅର୍ଥାତ୍ ଘରୋଇ ବୋର୍ଡିଂ ପାସ୍ ସହ ମୁନୀଚ ଯାଉଥିବା ଲୁଫ୍ଥାନ୍ସା ବିମାନର ବୋର୍ଡିଂ ପାସ୍ ମଧ୍ୟ ଦିଆଯାଇଥିଲା। ଏହି ଅତିରିକ୍ତ ବୋର୍ଡିଂ ପାସ୍ କାହିଁକି ଜାରି କରାଗଲା ବୋଲି ମନ୍ତ୍ରାଳୟ ପ୍ରଶ୍ନ ଉଠାଇଛି।
ଦିଲ୍ଲୀରେ ପହଞ୍ଚିବା ପରେ ଯାତ୍ରୀମାନଙ୍କର ଆପ୍ରବାସନ ଯାଞ୍ଚ ହେବା କଥା। କିନ୍ତୁ ସେମାନେ ସିଧାସଳଖ ଡିପାର୍ଚର ଅଞ୍ଚଳକୁ ଯାଇ ଅନ୍ତର୍ଜାତୀୟ ବିମାନରେ ଚଢ଼ିଥିଲେ। ମନ୍ତ୍ରାଳୟ ଏୟାର୍ ଇଣ୍ଡିଆର ଘରୋଇ-ଅନ୍ତର୍ଜାତୀୟ ଅପରେସନ୍ର ୫ଟି ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ଘରୋଇ ଓ ଅନ୍ତର୍ଜାତୀୟ ବୋର୍ଡିଂ ପାସ୍ ଏକାସାଙ୍ଗେ ଦେବା, ଯାତ୍ରୀଙ୍କୁ ପୃଥକ୍ ନ କରିବା ଏବଂ ‘ଡି’ ବୋର୍ଡିଂ ପାସ୍ ଥିବା ଯାତ୍ରୀଙ୍କୁ ଅନ୍ତର୍ଜାତୀୟ ଟ୍ରାନ୍ସଫର ଡେସ୍କକୁ କିପରି ଯିବାକୁ ଦିଆଗଲା, ସେନେଇ ମନ୍ତ୍ରାଳୟ ସ୍ପଷ୍ଟୀକରଣ ମାଗିଛି। ଏହି ଘଟଣାରେ ମନିଟରିଂ ବ୍ୟବସ୍ଥା ବିଫଳ ହୋଇଥିବା ମନ୍ତ୍ରାଳୟ କହିଛି।
ସୌଜନ୍ୟ ସମ୍ବାଦ
