Kathajodi: କାଠଯୋଡ଼ିରେ ଭାସିଗଲା ୫୦ କୋଟି: ରିଂବନ୍ଧ ସଂପ୍ରସାରଣ ପ୍ରକଳ୍ପ ଅଧାରୁ ବନ୍ଦ, ଆଉ ରେଳ ପୋଲ ତଳେ ଯିବନି ରାସ୍ତା

ଏଭଳି ପ୍ରକ୍ରିୟାରେ କିନ୍ତୁ ସରକାରୀ ରାଜକୋଷକୁ ୫୦ କୋଟିରୁ ଅଧିକ ଟଙ୍କାର କ୍ଷତି ହେବାକୁ ଯାଉଛି। କାଠଯୋଡ଼ି ଭିତରେ ପୂର୍ବ ଯୋଜନା ଅନୁଯାୟୀ ଯେଉଁ ପିଲାର ଅଥବା ନିର୍ମାଣ କାର୍ଯ୍ୟ ହୋଇଛି, ସେଥିରୁ ଅନେକ ଅଂଶ ସଂପୂର୍ଣ୍ଣ ଅକାମୀ ହୋଇଯିବ। ଅନ୍ୟପଟେ ପରିବର୍ତ୍ତିତ ନୂଆ ଯୋଜନାରେ ଅଧିକ ୨୦ରୁ ୨୫ କୋଟି ଟଙ୍କା ଖର୍ଚ୍ଚ ହେବ। ଏଥିରେ ଗୋଟିଏ କଥା ସ୍ପଷ୍ଟ ହୋଇଛି ଯେ ଯଦିଓ କାଠଯୋଡ଼ି ରିଂବନ୍ଧ ବର୍ତ୍ତମାନର ସ୍ଥିତି ତୁଳନାରେ ଅଧିକ ଚଉଡ଼ା ହେବ କିନ୍ତୁ ରେଳ ପୋଲ ତଳେ ପୂର୍ବ ଭଳି ଅଣଓସାରିଆ ରାସ୍ତା ରହିବା ସହିତ ଟ୍ରାଫିକ ସମସ୍ୟା ଜାରି ରହିବ। ସେହି ଅଞ୍ଚଳରେ ପାଖାପାଖି ୨ଶହ ମିଟର ରାସ୍ତା ଅଣଓସାରିଆ ରହିବା ଫଳରେ ଆଗକୁ ଯଦି ଟ୍ରାଫିକ ଅଥବା ଦୁର୍ଘଟଣାଜନିତ ସମସ୍ୟା ସୃଷ୍ଟି ହେବ। ବାସ୍ତବ ସ୍ଥିତି ଦେଖି ତାହାର ମୁକାବିଲା ପାଇଁ ପଦକ୍ଷେପ ନିଆଯିବ।

ଆଉ ରେଳ ପୋଲ ତଳେ ଯିବନି ରାସ୍ତା
ଖାନନଗର ଡ୍ରେନ୍‌ ନିକଟରେ ମିଶିବ ନଈ ଭିତରେ ନିର୍ମିତ ସଂପ୍ରସାରିତ ସେତୁ

୨୦୨୩ରେ କଟକ ନେତାଜୀ ବସ୍‌ ଟର୍ମିନାଲର ଲୋକାର୍ପଣ ସହିତ ନୂଆ ବସ୍‌ ଚଳାଚଳ ମାର୍ଗ ପାଇଁ ୧୩୫ କୋଟିରୁ ଅଧିକ ଟଙ୍କା ବ୍ୟୟରେ ଏହି ସଂପ୍ରସାରିତ ରିଂବନ୍ଧ ପ୍ରକଳ୍ପର ପରିକଳ୍ପନା କରାଯାଇଥିଲା। ସେତେବେଳେ କଟକ ସାଂସଦ ଭର୍ତ୍ତୃହରି ମହତାବ ଏହାର ବାସ୍ତବତାକୁ ନେଇ ପ୍ରଶ୍ନ ଉଠାଇଥିଲେ। କିନ୍ତୁ ପ୍ରକଳ୍ପ ଆଗକୁ ବଢ଼ିବା ବେଳେ ଏଥିପାଇଁ ରେଳ ବିଭାଗ ଅଥବା ଜଳ ସଂପଦ ବିଭାଗର ଏନ୍‌ଓସି ମିଳି ନଥିବା ସ୍ପଷ୍ଟ ହୋଇଥିଲା। ୨୦୨୬ ଏପ୍ରିଲ ୨୭ରେ ରେଳ ବିଭାଗ କାଠଯୋଡ଼ିରେ ରେଳପୋଲ ତଳେ ଏଭଳି ରାସ୍ତା ଯିବା ସୁରକ୍ଷା ଦୃଷ୍ଟିରୁ ଅସମ୍ଭବ ବୋଲି ଲିଖିତ ଭାବେ ଆର ଆଣ୍ଡ୍‌ ବି ନିର୍ବାହୀ ଯନ୍ତ୍ରୀ-୧ଙ୍କୁ ଜଣାଇ ଦେଇଥିଲା।