Keralam Government: ଜନତାଙ୍କୁ ଖୁସି ରଖିବାକୁ କେରଳ ସରକାରଙ୍କ ନୂଆ ଯୋଜନା, ଗଠନ ହେବ ‘ଆନନ୍ଦମ୍’ ବିଭାଗ
ନୂଆଦିଲ୍ଲୀ, ୧୫।୧୦: କେରଳ ସରକାରଙ୍କ ଅନନ୍ୟ ପଦକ୍ଷେପ । ଜନସାଧାରଣଙ୍କୁ ଖୁସି ରଖିବା ପାଇଁ ଗଠନ ହେବ ‘ଆନନ୍ଦମ’ ବିଭାଗ । ଭୁଟାନର ଚତୁର୍ଥ ରାଜା ଜିଗ୍ମେ ସିଙ୍ଗୱାଙ୍ଗଚୁକ୍ ୧୯୭୨ ମସିହାରେ ପ୍ରଥମେ ‘ଗ୍ରସ୍ ନ୍ୟାସନାଲ ହାପିନେସ୍’ (GNH) ଇଣ୍ଡେକ୍ସର ପରିକଳ୍ପନା କରିଥିଲେ । ବର୍ତ୍ତମାନ ଏହି ଚିନ୍ତାଧାରାକୁ କେରଳରେ ମଧ୍ୟ ଆପଣାଯାଉଛି, ଯେଉଁଠାରେ ରାଜ୍ୟ ସରକାର ଏକ ‘ହ୍ୟାପିନେସ୍ ଡିପାର୍ଟମେଣ୍ଟ’ ବା ଖୁସି ବିଭାଗ ଗଠନ କରିବାକୁ ଯୋଜନା କରିଛନ୍ତି । ବିଶ୍ୱସ୍ତରୀୟ ମଡ଼େଲଗୁଡ଼ିକରୁ ଶିକ୍ଷା ଗ୍ରହଣ କରି ପ୍ରଗତିକୁ ମାପିବାରେ ‘ହ୍ୟାପିନେସ୍ ଇଣ୍ଡେକ୍ସ’ ଏକ ପ୍ରମୁଖ ଭୂମିକା ଗ୍ରହଣ କରୁଥିବାରୁ ଏହାକୁ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର ସମସ୍ତ ପ୍ରସ୍ତୁତି ସାରିଛନ୍ତି ।
‘ଜୀବନରେ ଖୁସି ପାଇବା ହେଉଛି ମଣିଷର ଚରମ ଲକ୍ଷ୍ୟ’:
ଏହି ପ୍ରସଙ୍ଗରେ ମତଦେଇ କୁହାଯାଇଛି ଯେ, ବର୍ତ୍ତମାନ ସମଗ୍ର ବିଶ୍ୱରେ ଏପରି ଏକ ଚିନ୍ତାଧାରା ଗଢ଼ିଉଠୁଛି ଯେ କୌଣସି ଦେଶର ପ୍ରଗତିକୁ ମାପିବାର ମାନଦଣ୍ଡ କେବଳ ମୋଟ୍ ଆଭ୍ୟନ୍ତରୀଣ ଉତ୍ପାଦ (GDP) ହେବା ଉଚିତ୍ ନୁହେଁ । ଏହା ବଦଳରେ ‘ସକଳ ଜାତୀୟ ଖୁସି ସୂଚକାଙ୍କ’ (Gross National Happiness Index) କୁ ଆଧାର କରାଯିବା ଉଚିତ୍ । ଜୀବନରେ ଖୁସି ପାଇବା ହିଁ ମଣିଷର ଚରମ ଲକ୍ଷ୍ୟ ହୋଇଥିବାରୁ, ଏହି ଅବଧାରଣାକୁ ଆଧାର କରି ଖୁସି ସହ ଜଡ଼ିତ ଏକ ନୂତନ ବିଭାଗ ଗଠନ କରିବାକୁ ନିଷ୍ପତ୍ତି ନିଆଯାଇଛି । ଏହି ବିଭାଗ କେବଳ କଲ୍ୟାଣକାରୀ ଯୋଜନାଗୁଡ଼ିକ ଉପରେ ଧ୍ୟାନ ଦେବ ନାହିଁ, ବରଂ ବିକାଶମୂଳକ ପଦକ୍ଷେପ ମାଧ୍ୟମରେ ମଧ୍ୟ ଖୁସି ଏବଂ ସମୃଦ୍ଧିକୁ ପ୍ରୋତ୍ସାହିତ କରିବ । ଏହି ବିଭାଗ ଅଧୀନରେ ‘ହ୍ୟାପିନେସ୍ ସେଣ୍ଟର’ ସ୍ଥାପନ ଭଳି ବିଭିନ୍ନ ଅଂଶ ରହିବ ଏବଂ ବର୍ତ୍ତମାନ ଏହି ନୂତନ ୱିଙ୍ଗକୁ ପ୍ରସ୍ତୁତ କରିବାର କାର୍ଯ୍ୟ ଜାରି ରହିଛି ।
ସୌଜନ୍ୟ ପ୍ରମେୟ
