Maa Biraja: ୨୨ ବର୍ଷ ଧରି ଅସମାହିତ ମା’ ବିରଜାଙ୍କ ମୂର୍ତ୍ତି ବଦଳ ରହସ୍ୟ: ୧୫ ଦିନ ମଧ୍ୟରେ ପ୍ରକାଶ ନକଲେ ହାଇକୋର୍ଟ ଯିବେ ଆବେଦନକାରୀ

୨୦୦୬ରେ ସରିଥିଲା ଆର୍‌ଡିସି ତଦନ୍ତ, ସାର୍ବଜନୀନ ହେଲାନି ରିପୋର୍ଟ
୧୫ ଦିନ ମଧ୍ୟରେ ପ୍ରକାଶ ନକଲେ ହାଇକୋର୍ଟ ଯିବେ ଆବେଦନକାରୀ

୨୦୦୪ ସେପ୍ଟେମ୍ବରରେ ମା’ ବିରଜାଙ୍କ ମୂର୍ତ୍ତିକୁ ନେଇ ଏହି ବିବାଦ ଆରମ୍ଭ ହୋଇଥିଲା। ମନ୍ଦିରର ମରାମତି କାର୍ଯ୍ୟ ସମୟରେ ମୂଳ ମୂର୍ତ୍ତି ସ୍ଥାନାନ୍ତର ପରେ ପୁନଃସ୍ଥାପନ ବେଳେ ମୂର୍ତ୍ତି ବଦଳ କରାଯାଇଥିବା ଅଭିଯୋଗ ଆସିଥିଲା। ଯେଉଁଥିରେ ଯାଜପୁର ଜିଲ୍ଲାର ଜଣେ ବରିଷ୍ଠ ନେତା ତଥା ତତ୍କାଳୀନ ଅର୍ଥମନ୍ତ୍ରୀ ଓ ତାଙ୍କ ପରିବାର ବିବାଦଘେରକୁ ଆସିଥିଲେ। ସମ୍ପୃକ୍ତ ପୂର୍ବତନ ମନ୍ତ୍ରୀ ସେତେବେଳେ ମା’ଙ୍କ ପୀଠରେ ତନ୍ତ୍ର ସାଧନା କରିବା ସହିତ ମା’ଙ୍କ ମୂର୍ତ୍ତିକୁ ବଦଳ କରାଇ ସେଠାରେ ଏକ ତାମ୍ର ଯନ୍ତ୍ର ସ୍ଥାପନ କରାଇଥିଲେ ଏବଂ ଉକ୍ତ ଯନ୍ତ୍ରରେ ପ୍ର-ପ୍ର-ପ୍ରୀ ଲେଖା ଯାଇଥିବା କୁହାଯାଇଥିଲା। ଯାହାକୁ ନେଇ ଯାଜପୁର ସମେତ ସମଗ୍ର ଓଡ଼ିଶାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ଘଟଣାର ନିରପେକ୍ଷ ତଦନ୍ତ ଓ ପ୍ରକୃତ ତଥ୍ୟ ସାମ୍ନାକୁ ଆଣିବାକୁ ବିଭିନ୍ନ ମହଲରୁ ଦାବି ହୋଇଥିଲା। ପରେ ସରକାରଙ୍କ ପକ୍ଷରୁ ଆର୍‌ଡିସିଙ୍କ ନେତୃତ୍ୱରେ ତଦନ୍ତ କରାଯାଇଥିଲା। ଏହି ତଦନ୍ତ ୨୦୦୬ରେ ଶେଷ ହୋଇଥିଲା। ତେବେ ତଦନ୍ତ ରିପୋର୍ଟରେ କ’ଣ ରହିଛି ଏବଂ ରିପୋର୍ଟ ଆଧାରରେ ସରକାର କି ପଦକ୍ଷେପ ନେଇଛନ୍ତି, ତାହା ୨୦ ବର୍ଷ ଧରି ସାର୍ବଜନୀନ ହୋଇନଥିବା ଅଭିଯୋଗ ହୋଇଛି। ଏପରିକି ପୂର୍ବରୁ ମଧ୍ୟ ରିପୋର୍ଟ ପ୍ରକାଶ ଓ ଏହା ଉପରେ ସରକାରୀ କାର୍ଯ୍ୟାନୁଷ୍ଠାନ ନେଇ ପ୍ରଶ୍ନ ଉଠିଥିଲା।