ୱାସିଂଟନ: ଆମେରିକା ଏବଂ ଇରାନ ମଧ୍ୟରେ ଆଲୋଚନାକୁ ନେଇ ଅନିଶ୍ଚିତତା ମଧ୍ୟରେ, ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏକ ବିବୃତି ଦେଇଛନ୍ତି ଯାହା ପ୍ରମାଣିତ କରିଛି ଯେ, ଆମେରିକା ଯେତେ ଭଲ ବନ୍ଧୁର ଅଭିନୟ କଲେ ମଧ୍ୟ ଭାରତ-ପାକିସ୍ତାନ ବିବାଦକୁ ନିଜ ଲାଭ ପାଇଁ ବ୍ୟବହାର କରିବା ଜାରି ରଖିଛି। ପୁଣିଥରେ, ଭାରତ-ପାକିସ୍ତାନ ସାମରିକ ମୁକାବିଲାକୁ ଏକ ଉଦାହରଣ ଭାବରେ ଉଲ୍ଲେଖ କରି ରୁବିଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦାବିକୁ ଦୋହରାଇଛନ୍ତି। ଟ୍ରମ୍ପ ପ୍ରଶାସନର କୂଟନୈତିକ ସଫଳତା ଲମ୍ବା ତାଲିକା ସାମ୍ବାଦିକଙ୍କ ଆଗରେ ଶୁଣାଇଛନ୍ତି। ସେ ଦାବି କରିଛନ୍ତି ଯେ, ଆମେରିକା ବିଶ୍ୱର ଅନେକ ଉତ୍ତେଜନାପୂର୍ଣ୍ଣ କ୍ଷେତ୍ରରେ ସଂଘର୍ଷ ହ୍ରାସ କରିବାରେ ପ୍ରମୁଖ ଭୂମିକା ଗ୍ରହଣ କରିଛି।

ହ୍ୱାଇଟ୍ ହାଉସରେ ଏକ କ୍ୟାବିନେଟ୍ ବୈଠକ ଏବଂ ପରବର୍ତ୍ତୀ ଗଣମାଧ୍ୟମ ଆଲୋଚନା ସମୟରେ, ରୁବିଓ କହିଛନ୍ତି, ଟ୍ରମ୍ପଙ୍କ ପ୍ରଶାସନ ବିଶ୍ୱବ୍ୟାପୀ ସକ୍ରିୟ କୂଟନୀତିରେ ନିରନ୍ତର ନିୟୋଜିତ ରହିଛି। ଆମେ ଆଜରବାଇଜାନ ଏବଂ ଆର୍ମେନିଆ ମଧ୍ୟରେ ଏକ ଶାନ୍ତି ଚୁକ୍ତିନାମା ମଧ୍ୟସ୍ଥତା କରିବାରେ ସାହାଯ୍ୟ କରିଥିଲୁ। ଆଉ ଏକ ଉଦାହରଣ ହେଉଛି ଭାରତ ଏବଂ ପାକିସ୍ତାନ। ଆମେ ସେହି ସାମରିକ ବିବାଦ ସମାପ୍ତ କରିଥିଲୁ ଏବଂ ଏଥିରେ ଏକ ବଡ଼ ଭୂମିକା ଗ୍ରହଣ କରିଥିଲୁ। ଏପର୍ଯ୍ୟନ୍ତ, କେବଳ ଡୋନାଲ୍ଡ ଟ୍ରମ୍ପ ଏହି କଥା କହିଆସୁଥିଲେ। ପ୍ରଥମ ଥର ପାଇଁ ବୈଦେଶିକ ସଚିବ ମାର୍କୋ ରୁବିଓ ସମାନ କଥା ଦୋହରାଇଛନ୍ତି।
ଭାରତ ଛାଡିବା ପରେ ମାର୍କୋ ରୁବିଓଙ୍କ ଆଚରଣ ବଦଳିଯାଇଛି। ମାର୍କୋ ରୁବିଓଙ୍କ ଏହି ମନ୍ତବ୍ୟ ଏପରି ସମୟରେ ଆସିଛି ଯେତେବେଳେ ଇରାନ ସହିତ ଆମେରିକାର କୂଟନୈତିକ ପ୍ରୟାସ ଉପରେ ପ୍ରଶ୍ନ ଉଠାଯାଉଛି। ଏହି ସମୟରେ ସେ ଟ୍ରମ୍ପ ପ୍ରଶାସନର ବୈଦେଶିକ ନୀତିକୁ ସମର୍ଥନ କରି କହିଛନ୍ତି ଯେ, ବର୍ତ୍ତମାନର ସରକାର କେବଳ ଆମେରିକୀୟ ସ୍ୱାର୍ଥ ଉପରେ ଧ୍ୟାନ ଦେଉଛି। ନିଜ ସରକାରଙ୍କୁ ସୁରକ୍ଷା ଦେବାକୁ ଯାଇ ରୁବିଓ ଦାବି କରିଛନ୍ତି ଯେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅନେକ ଆନ୍ତର୍ଜାତୀୟ ବିବାଦ ସମାଧାନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସେ ଆଜରବାଇଜାନ ଏବଂ ଆର୍ମେନିଆ, ଥାଇଲ୍ୟାଣ୍ଡ ଏବଂ କାମ୍ବୋଡିଆ, ଏବଂ କଙ୍ଗୋ ଏବଂ ରୱାଣ୍ଡା ମଧ୍ୟରେ ଉତ୍ତେଜନା ହ୍ରାସ କରିବା ବିଷୟରେ ମଧ୍ୟ ଉଲ୍ଲେଖ କରିଛନ୍ତି।

ସୌଜନ୍ୟ ସମ୍ବାଦ