Nepal: କାଠମାଣ୍ଡୁ ବିମାନବନ୍ଦରରେ କାହିଁକି ରୁହନ୍ତି ଭାରତୀୟ ସୁରକ୍ଷାକର୍ମୀ? ଜାଣନ୍ତୁ ୧୯୯୯ର କାନ୍ଦାହାର ଅପହରଣ କାହାଣୀ

ନୂଆଦିଲ୍ଲୀ: ନେପାଳର ରାଜଧାନୀ କାଠମାଣ୍ଡୁସ୍ଥିତ ତ୍ରିଭୁବନ ଆନ୍ତର୍ଜାତୀୟ ବିମାନବନ୍ଦରରୁ ଯେତେବେଳେ ମଧ୍ୟ ଭାରତ ଅଭିମୁଖେ କୌଣସି ବିମାନ ଉଡ଼ାଣ ଭରେ, ସେତେବେଳେ ଯାତ୍ରୀମାନଙ୍କୁ ଏକ ସ୍ୱତନ୍ତ୍ର ଏବଂ ଅତିରିକ୍ତ ସୁରକ୍ଷା ଯାଞ୍ଚ ପ୍ରକ୍ରିୟା ଦେଇ ଗତି କରିବାକୁ ପଡ଼େ। ନେପାଳ ପୁଲିସ ବ୍ୟତୀତ ସେଠାରେ ମୁତୟନ ଥିବା ଭାରତୀୟ ସୁରକ୍ଷାକର୍ମୀମାନେ ଏକ ସ୍ୱତନ୍ତ୍ର ସ୍କ୍ରିନିଂ ପଏଣ୍ଟରେ ଏହି ଯାଞ୍ଚ କରିଥାନ୍ତି। ବିଶ୍ୱସ୍ତରରେ ନେପାଳ ହେଉଛି ଏପରି ଏକମାତ୍ର ଦେଶ, ଯେଉଁଠାରେ ଅନ୍ୟ ଏକ ଦେଶର ଅଧିକାରୀମାନଙ୍କୁ ନିଜ ବିମାନବନ୍ଦରରେ ସ୍ୱତନ୍ତ୍ର ସୁରକ୍ଷା ଯାଞ୍ଚ କରିବାର ଅନୁମତି ମିଳିଛି। ଗତ ୨୬ ବର୍ଷ ଧରି ଜାରି ରହିଥିବା ଏହି ବ୍ୟବସ୍ଥା ଭାରତୀୟ ବିମାନଗୁଡ଼ିକର ସୁରକ୍ଷା ନିଶ୍ଚିତ କରିବାର ଏକ ଅପରିହାର୍ଯ୍ୟ ଅଙ୍ଗ ପାଲଟିଛି।

୧୯୯୯ କାନ୍ଦାହାର ବିମାନ ଅପହରଣ
ଏହି ଅସାଧାରଣ ବ୍ୟବସ୍ଥାର ମୂଳଦୁଆ ପଡ଼ିଥିଲା ୨୪ ଡିସେମ୍ବର ୧୯୯୯ରେ ଘଟିଥିବା ସେହି ଭୟଙ୍କର ଘଟଣା ପରେ, ଯାହା ସମଗ୍ର ଭାରତକୁ ହଲ୍‌ଚଲ୍ କରିଦେଇଥିଲା। ସେହିଦିନ ଇଣ୍ଡିଆନ୍ ଏୟାରଲାଇନ୍ସର ଫ୍ଲାଇଟ୍ IC-814 ପ୍ରାୟ ୧୯୦ ଜଣ ଯାତ୍ରୀଙ୍କୁ ନେଇ କାଠମାଣ୍ଡୁରୁ ଦିଲ୍ଲୀ ଅଭିମୁଖେ ଉଡ଼ାଣ ଭରିଥିଲା। ତେବେ ଆକାଶ ମାର୍ଗରେ ୫ ଜଣ ସଶସ୍ତ୍ର ଆତଙ୍କବାଦୀ ଏହି ବିମାନକୁ ଅପହରଣ କରି ଅମୃତସର, ଲାହୋର ଓ ଦୁବାଇ ଦେଇ ଆଫଗାନିସ୍ତାନର କାନ୍ଦାହାରକୁ ନେଇଯାଇଥିଲେ। ପ୍ରାୟ ଏକ ସପ୍ତାହ ଧରି ଚାଲିଥିବା ଏହି ଉତ୍ତେଜନାପୂର୍ଣ୍ଣ ସ୍ଥିତି ପରେ ଭାରତ ସରକାରଙ୍କୁ ଜେଲରେ ଥିବା ମୌଲାନା ମସୁଦ ଅଝର ସମେତ ତିନିଜଣ କୁଖ୍ୟାତ ଆତଙ୍କବାଦୀଙ୍କୁ ମୁକ୍ତ କରିବାକୁ ପଡ଼ିଥିଲା।

ସୌଜନ୍ୟ ସମ୍ବାଦ