PM Modi on oil crisis: ପଶ୍ଚିମ ଏସିଆରେ ଚାଲିଥିବା ସଙ୍କଟ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର (୧୦ ମଇ,୨୦୨୬) ସମସ୍ତ ଭାରତୀୟ ନାଗରିକଙ୍କୁ ପେଟ୍ରୋଲିୟମ ଉତ୍ପାଦଗୁଡ଼ିକୁ କମ୍ ବ୍ୟବହାର କରିବାକୁ ଅନୁରୋଧ କରିଛନ୍ତି। ସେ କହିଛନ୍ତି ଯେ ଭାରତ ବହୁ ପରିମାଣରେ ଇନ୍ଧନ ଆମଦାନୀ କରେ,ତେଣୁ ପେଟ୍ରୋଲ,ଡିଜେଲ ଏବଂ ଗ୍ୟାସକୁ ଭାବିଚିନ୍ତି ବ୍ୟବହାର କରିବା ଖୁବ୍ ଗୁରୁତ୍ୱପୂର୍ଣ୍ଣ।
ତେଲେଙ୍ଗାନାର ରାଜଧାନୀ ହାଇଦ୍ରାବାଦରେ୯,୩୭୭ କୋଟି ଟଙ୍କାର ବିକାଶ ପ୍ରକଳ୍ପ ଉଦଘାଟନ କରିବା ପରେ,ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ବର୍ତ୍ତମାନ ସମୟରେ ପେଟ୍ରୋଲ,ଡିଜେଲ ଏବଂ ଗ୍ୟାସ ଭଳି ସାମଗ୍ରୀକୁ ସଞ୍ଜମତାର ସହ ବ୍ୟବହାର କରିବାର ଆବଶ୍ୟକତା ରହିଛି। ଆମେ କେବଳ ଆବଶ୍ୟକତା ଅନୁସାରେ ଆମଦାନୀ ହୋଇଥିବା ପେଟ୍ରୋଲିୟମ ଉତ୍ପାଦ ବ୍ୟବହାର କରିବା ଉଚିତ। ଏହା କେବଳ ବୈଦେଶିକ ମୁଦ୍ରା ସଞ୍ଚୟ କରିବ ନାହିଁ ବରଂ ଯୁଦ୍ଧର ନକାରାତ୍ମକ ପ୍ରଭାବକୁ ମଧ୍ୟ ହ୍ରାସ କରିବ।”
ପ୍ରଧାନମନ୍ତ୍ରୀ ଆହୁରି କହିଥିଲେ ଯେ କୋଭିଡ-୧୯ ମହାମାରୀ ସମୟରେ,ଆମେ ଘରୁ କାମ, ଅନଲାଇନ୍ ବୈଠକ,ଭିଡିଓ କନଫରେନ୍ସ ପରି ଅନେକ ବ୍ୟବସ୍ଥା ଆପଣାଇଥିଲୁ। ଆମେ ସେଗୁଡ଼ିକରେ ଅଭ୍ୟସ୍ତ ହୋଇଗଲୁଣି। ଏବେ ସେହି ଅଭ୍ୟାସଗୁଡ଼ିକୁ ପୁଣି ଥରେ ଆରମ୍ଭ କରିବାର ସମୟ ଆସିଛି,କାରଣ ଏହା ଦେଶର ସର୍ବୋତ୍ତମ ହିତରେ ହେବ,ଏବଂ ଆମେ ସେଗୁଡ଼ିକୁ ପୁଣି ଥରେ ପ୍ରାଥମିକତା ଦେବା ଉଚିତ।
ବିଦେଶରେ ବିବାହ ଏବଂ ସୁନା କିଣିବା ବିଷୟରେ କ’ଣ କହିଲେ ପ୍ରଧାନମନ୍ତ୍ରୀ ?
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପେଟ୍ରୋଲ,ଡିଜେଲ,ଗ୍ୟାସ ଏବଂ ସାରର ମୂଲ୍ୟ ବହୁତ ବୃଦ୍ଧି ପାଇଛି। ନାଗରିକମାନଙ୍କ ଉପରେ ଯେପରି ଏହାର ବୋଝ ନ ପଡ଼େ ଏଥିପାଇଁ ସରକାର ସମ୍ପୂର୍ଣ୍ଣ ବୋଝ ବହନ କରୁଛନ୍ତି। ଯେତେବେଳେ ସପ୍ଲାଏ ଚେନ ବାଧାପ୍ରାପ୍ତ ହୁଏ, ତେବେ ଯାହା କଲେ ବି ସଙ୍କଟ ଆସେ। ଦେଶ ସଙ୍କଟର ସମ୍ମୁଖୀନ ହେଲେ ଆମକୁ ଆମ କର୍ତ୍ତବ୍ୟର ପାଳନ କରିବା ପାଇଁ ସଂକଳ୍ପ ନେବାକୁ ପଡ଼ିବ। ଏବେ ସବୁଠାରୁ ବଡ଼ ସଂକଳ୍ପ ହେଲା ଆମକୁ ସୁଚିନ୍ତିତ ଭାବରେ ଇନ୍ଧନ ବ୍ୟବହାର କରିବାକୁ ପଡିବ। ଯେଉଁ ସହରରେ ମେଟ୍ରୋ ଅଛି,ଏହାକୁ ବ୍ୟବହାର କରିବାକୁ ନିଷ୍ପତ୍ତି ନେବାକୁ ପଡିବ। ଯଦି ଆପଣଙ୍କୁ କାରରେ ଯିବାକୁ ଅଛି ତେବେ କାରପୁଲିଂ ବାଛିବା ଉଚିତ।
ପ୍ରଧାନମନ୍ତ୍ରୀ କହିଛନ୍ତି ଯେ ଯଦି ସାମଗ୍ରୀ ପଠାଇବାକୁ ଅଛି,ତେବେ ରେଳ ଦ୍ୱାରା ପଠାଇବାକୁ ଚେଷ୍ଟା କରିବା ଉଚିତ,କାରଣ ବିଦ୍ୟୁତ୍ ଟ୍ରେନଗୁଡ଼ିକରେ ପେଟ୍ରୋଲ ଏବଂ ଡିଜେଲର ଆବଶ୍ୟକତା ପଡ଼େ ନାହିଁ। ସେ ଆହୁରି ମଧ୍ୟ କହିଛନ୍ତି ଯେ ମଧ୍ୟବିତ୍ତ ବର୍ଗଙ୍କ ମଧ୍ୟରେ ବିବାହ ପାଇଁ ବିଦେଶ ଯାତ୍ରା କରିବାର ସଂସ୍କୃତି ବଢ଼ୁଛି। ଏହା ଏକ ସଙ୍କଟର ସମୟ। ଯଦି ଦେଶପ୍ରେମ ଆହ୍ୱାନ କରୁଛି,ତେବେ ଆମେ ଆମର ବିଦେଶ ଯାତ୍ରାକୁ ଗୋଟିଏ ବର୍ଷ ପାଇଁ ସ୍ଥଗିତ ରଖିପାରିବା।
ସେହିପରି ବିଦେଶୀ ମୁଦ୍ରା ସଞ୍ଚୟ କରିବା ପାଇଁ ଆମକୁ ଛୋଟ ଛୋଟ ପଦକ୍ଷେପ ନେବାକୁ ପଡିବ ବୋଲି ପ୍ରଧାନମନ୍ତ୍ରୀ କହିଛନ୍ତି। ସୁନା କିଣିବା ପାଇଁ ମଧ୍ୟ ବହୁତ ବୈଦେଶିକ ମୁଦ୍ରା ଖର୍ଚ୍ଚ ହୁଏ। ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି,ଆମକୁ ଗୋଟିଏ ବର୍ଷ ପାଇଁ କୌଣସି କାର୍ଯ୍ୟକ୍ରମ ପାଇଁ ସୁନା ନ କିଣିବାକୁ ନିଷ୍ପତ୍ତି ନେବାକୁ ପଡିବ। ଏହି ସମସ୍ତ ପ୍ରୟାସ ମାଧ୍ୟମରେ, ଆମକୁ ବୈଦେଶିକ ମୁଦ୍ରା ସଞ୍ଚୟ କରିବାକୁ ପଡିବ ବୋଲି ମୋଦୀ ଆହ୍ୱାନ ଦେଇଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, “ଖାଇବା ତେଲ ପାଇଁ ମଧ୍ୟ ସମାନ କଥା। ଆମକୁ ଏହାର ଆମଦାନୀ ପାଇଁ ବିଦେଶୀ ମୁଦ୍ରା ଖର୍ଚ୍ଚ କରିବାକୁ ପଡ଼େ। ଯଦି ପ୍ରତ୍ୟେକ ପରିବାର ଖାଦ୍ୟ ତେଲର ବ୍ୟବହାର ହ୍ରାସ କରେ, ତେବେ ଏହା ଦେଶପ୍ରେମ ପାଇଁ ଏକ ବଡ଼ ଅବଦାନ ହେବ। ଏହା ଦେଶର ରାଜକୋଷ ଏବଂ ପରିବାରର ପ୍ରତ୍ୟେକ ସଦସ୍ୟଙ୍କ ସ୍ୱାସ୍ଥ୍ୟରେ ଉନ୍ନତି ଆଣିବ।”
ସେହିପରି ବିଦେଶୀ କରେନ୍ସି ଖର୍ଚ୍ଚ ହେବାର ଅନ୍ୟ ଏକ ଦିଗ ଉପରେ ବି ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ। ସେ କହିଛନ୍ତି ଯେ ବିଦେଶୀ ମୁଦ୍ରା ବ୍ୟବହାର କରୁଥିବା ଅନ୍ୟ ଏକ କ୍ଷେତ୍ର ହେଉଛି କୃଷି। ଆମେ ବିଦେଶରୁ ପ୍ରଚୁର ପରିମାଣରେ ରାସାୟନିକ ସାର ଆମଦାନୀ କରୁ। ଆମକୁ ରାସାୟନିକ ସାର ବ୍ୟବହାରକୁ ଅଧା ହ୍ରାସ କରିବା ଉଚିତ ଏବଂ ପ୍ରାକୃତିକ କୃଷି ଆଡକୁ ଆଗେଇ ଆସିବା ଉଚିତ। ଏହିପରି ଭାବରେ, ଆମେ ବିଦେଶୀ ମୁଦ୍ରା ଏବଂ ଆମ କ୍ଷେତ ଓ ମାତା ପୃଥିବୀକୁ ସୁରକ୍ଷା ଦେଇପାରିବା।
ଶକ୍ତି ସୁରକ୍ଷା ଉପରେ ପ୍ରଧାନମନ୍ତ୍ରୀ ମୋଦିଙ୍କ ଗୁରୁତ୍ୱ
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ବିଶ୍ୱ ଏକ ବଡ଼ ସପ୍ଲାଏ ଚେନ ସଙ୍କଟ ଦେଇ ଗତି କରୁଛି। ୟୁକ୍ରେନ ଯୁଦ୍ଧ ସାରା ବିଶ୍ୱରେ ଅସୁବିଧାକୁ ଆହୁରି ବଢ଼ାଇ ଦେଇଛି। ଗତ ପାଞ୍ଚରୁ ଛଅ ବର୍ଷ ମଧ୍ୟରେ, ଆମ ସରକାର ଏହି ସଙ୍କଟର ସମାଧାନ ପାଇଁ ଅକ୍ଲାନ୍ତ ପରିଶ୍ରମ କରିଛି। ସାରା ବିଶ୍ୱରେ, ଗୋଟିଏ ସାର ବ୍ୟାଗ ପ୍ରାୟ ୩ ହଜାର ଟଙ୍କାରେ ବିକ୍ରି ହେଉଛି, କିନ୍ତୁ ଭାରତର ଚାଷୀମାନଙ୍କୁ ସେହି ସାର ବ୍ୟାଗ ୩୦୦ ଟଙ୍କାରୁ କମ୍ ମୂଲ୍ୟରେ ଦିଆଯାଉଛି।
ପ୍ରଧାନମନ୍ତ୍ରୀ ଶକ୍ତି ସୁରକ୍ଷାର ଗୁରୁତ୍ୱ ଉପରେ ମଧ୍ୟ ଆଲୋକପାତ କରି କହିଛନ୍ତି, “ଆଜି ବିଶ୍ୱର ପ୍ରତ୍ୟେକ ବ୍ୟକ୍ତି ଶକ୍ତି ସୁରକ୍ଷାର ଗୁରୁତ୍ୱକୁ ଅନୁଭବ କରୁଛନ୍ତି। ସେଥିପାଇଁ ଆମର କେନ୍ଦ୍ର ସରକାର ଭାରତର ଶକ୍ତି ସୁରକ୍ଷାରେ ପ୍ରଚୁର ପରିମାଣରେ ନିବେଶ କରୁଛନ୍ତି। ସାମ୍ପ୍ରତିକ ବର୍ଷଗୁଡ଼ିକରେ, ଭାରତ ସୌରଶକ୍ତି କ୍ଷେତ୍ରରେ ବିଶ୍ୱର ଦେଶମାନଙ୍କ ମଧ୍ୟରେ ଶୀର୍ଷ ସ୍ଥାନରେ ପହଞ୍ଚିଛି।”
ବିଶ୍ୱ ଶକ୍ତି ସଙ୍କଟକୁ ଏଡାଇବା ପାଇଁ ପ୍ରଧାନମନ୍ତ୍ରୀଙ୍କ ମନ୍ତ୍ର
ପ୍ରଧାନମନ୍ତ୍ରୀ କହିଛନ୍ତି ଯେ କେନ୍ଦ୍ର ସରକାର ପ୍ରଥମେ ୟୁନିଭର୍ସାଲ ଏଲପିଜି କଭରେଜ ହାସଲ କରିବା ଉପରେ ଧ୍ୟାନ ଦେଇଥିଲେ ଏବଂ ବର୍ତ୍ତମାନ ସୁଲଭ ପାଇପ୍ ଗ୍ୟାସ ଯୋଗାଣ ବୃଦ୍ଧି କରିବା ଏବଂ ସିଏନଜି-ଆଧାରିତ ପରିବହନ ବ୍ୟବସ୍ଥାକୁ ପ୍ରୋତ୍ସାହିତ କରିବା ପାଇଁ କାର୍ଯ୍ୟ କରୁଛନ୍ତି। ଏହି ପ୍ରୟାସଗୁଡ଼ିକ ଭାରତକୁ ଚଳିତ ବିଶ୍ୱ ଶକ୍ତି ସଙ୍କଟକୁ ଅଧିକ ପ୍ରଭାବଶାଳୀ ଭାବରେ ସମାଧାନ କରିବାରେ ସାହାଯ୍ୟ କରିଛି ବୋଲି ପିଏମ୍ କହିଛନ୍ତି।
ମୋଦୀ ଆହୁରି କହିଛନ୍ତି ଯେ ଦେଶ ସୁଧାର ଏବଂ ଭିତ୍ତିଭୂମି ବିକାଶ ଦିଗରେ ଦ୍ରୁତ ଗତିରେ ଆଗକୁ ବଢ଼ୁଛି, ଏବଂ ତେଲେଙ୍ଗାନାର ବିକାଶ ପାଇଁ ନିରନ୍ତର ସମର୍ଥନ ରହିବ ବୋଲି ମୋଦୀ ପ୍ରତିଶ୍ରୁତି ଦେଇଛନ୍ତି। ରବିବାର ହାଇଦ୍ରାବାଦରେ ବିଭିନ୍ନ ପ୍ରକଳ୍ପ ଉନ୍ମୋଚନ ବେଳେ ପ୍ରଧାନମନ୍ତ୍ରୀ ଏହିସବୁ ଗୁରୁତ୍ୱପୂର୍ଣ୍ଣ ଆହ୍ୱାନ ଜଣାଇଥିଲେ।
ଉନ୍ମୋଚିତ ହୋଇଥିବା ପ୍ରକଳ୍ପଗୁଡ଼ିକ ମଧ୍ୟରେ ରାସ୍ତା, ରେଳ, ପେଟ୍ରୋଲିୟମ୍ ଏବଂ ବୟନ ଭିତ୍ତିଭୂମି ରହିଛି। ପ୍ରମୁଖ ପଦକ୍ଷେପଗୁଡ଼ିକ ମଧ୍ୟରେ ହାଇଦ୍ରାବାଦ-ପାଣଜୀ ଅର୍ଥନୈତିକ କରିଡରର ଗୁଡେବେଲୁର ଏବଂ ମହବୁବନଗର ମଧ୍ୟରେ ଜାତୀୟ ରାଜପଥ-୧୬୭କୁ ଚାରି ଲେନ କରିବା ଏବଂ ସାଙ୍ଗାରେଡ୍ଡି ଜିଲ୍ଲାର ଜାହିରାବାଦ ଶିଳ୍ପ କ୍ଷେତ୍ରରେ ଭିତ୍ତିଭୂମି ବିକାଶ ଆଦି ରହିଛି।
କେବଳ ଏତିକି ନୁହେଁ, ପ୍ରଧାନମନ୍ତ୍ରୀ ମୋଦୀ କାଜିପେଟ-ବିଜୟୱାଡା ରେଳ ମଲ୍ଟି-ଟ୍ରାକିଂ ପ୍ରକଳ୍ପର କିଛି ଅଂଶ, ହାଇଦ୍ରାବାଦରେ ଏକ ଗ୍ରୀନଫିଲ୍ଡ ପେଟ୍ରୋଲିୟମ, ତୈଳ ଏବଂ ଲୁବ୍ରିକେଣ୍ଟ ଟର୍ମିନାଲ, କାଜିପେଟ ରେଳ ଅଣ୍ଡର ରେଳ ବାଇପାସ ଏବଂ ୱାରାଙ୍ଗଲରେ ପିଏମ ମିତ୍ର ପାର୍କ ଆଦିର ଉଦଘାଟନ କରିଥିଲେ।
ସୌଜନ୍ୟ Prameya News7
