ନୂଆଦିଲ୍ଲୀ: ଭାରତୀୟ କୂଟନୀତିଜ୍ଞ ଭିପୁଲଙ୍କୁ ସାଉଦି ଆରବରେ ଭାରତର ପରବର୍ତ୍ତୀ ରାଷ୍ଟ୍ରଦୂତ ଭାବରେ ନିଯୁକ୍ତ କରାଯାଇଛି। ଭାରତ ସରକାର ସାଉଦି ଆରବ ସହିତ ଏହାର ରଣନୈତିକ ସମ୍ପର୍କକୁ ଆହୁରି ମଜବୁତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ନିଯୁକ୍ତି ଦେଇଛନ୍ତି। ଭିପୁଲ ବିହାରର ମୂଳ ବାସିନ୍ଦା। ସେ ବର୍ତ୍ତମାନ ରିୟାଦରେ ରାଷ୍ଟ୍ରଦୂତ ଭାବରେ କାର୍ଯ୍ୟ କରୁଥିବା ସୁହେଲ ଅଜାଜ ଖାନଙ୍କ ସ୍ଥାନ ନେବେ। ୨୦୨୩ ମସିହାରୁ ସେଠାରେ କାର୍ଯ୍ୟ କରୁଥିବା ମଧ୍ୟ ପ୍ରଦେଶର ବାସିନ୍ଦା ସୁହେଲ ଖାନ ତାଙ୍କର କାର୍ଯ୍ୟକାଳ ସମାପ୍ତ କରିବା ପରେ ଶୀଘ୍ର ଭାରତ ଫେରିବେ।
ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିଛନ୍ତି
କୂଟନୀତିଜ୍ଞ ଭିପୁଲ ୧୯୯୮ ବ୍ୟାଚର ଭାରତୀୟ ବୈଦେଶିକ ସେବା (ଆଇଏଫ୍ଏସ୍) ଅଧିକାରୀ । ତାଙ୍କର ବ୍ୟାପକ କୂଟନୈତିକ ଅଭିଜ୍ଞତା ଅଛି। ସାଉଦି ଆରବର ଦାୟିତ୍ୱ ଗ୍ରହଣ କରିବା ପୂର୍ବରୁ, ସେ ୧୭ ଅଗଷ୍ଟ ୨୦୨୩ ରୁ କାତାରରେ ଭାରତର ରାଷ୍ଟ୍ରଦୂତ ଭାବରେ କାର୍ଯ୍ୟ କରିଥିଲେ। ତାଙ୍କ କ୍ୟାରିୟରରେ, ସେ କାଇରୋ, କଲମ୍ବୋ, ଜେନେଭା ଏବଂ ଦୁବାଇରେ ଥିବା ଭାରତୀୟ ଦୂତାବାସରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ଭିପୁଲଙ୍କର ଏକ ପ୍ରଭାବଶାଳୀ ଶିକ୍ଷାଗତ ଏବଂ ବୃତ୍ତିଗତ ରେକର୍ଡ ଅଛି। ସେ ୧୯୯୪ ମସିହାରେ ଦିଲ୍ଲୀର ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି)ରୁ ମେକାନିକାଲ୍ ଇଞ୍ଜିନିୟରିଂରେ ସ୍ନାତକ ହାସଲ କରିଥିଲେ ଏବଂ ପରବର୍ତ୍ତୀ ସମୟରେ ହାଇଦ୍ରାବାଦର ଇଣ୍ଡିଆନ୍ ସ୍କୁଲ୍ ଅଫ୍ ବିଜନେସ୍ (ଆଇଏସ୍ବି)ରୁ ଏମବିଏ ଡିଗ୍ରୀ ହାସଲ କରିଥିଲେ।
ସେ ବୈଦେଶିକ ମନ୍ତ୍ରଣାଳୟରେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିଛନ୍ତି:
୨୦୧୪-୨୦୧୭: ବୈଦେଶିକ ବ୍ୟାପାର ମନ୍ତ୍ରଣାଳୟରେ ନିର୍ଦ୍ଦେଶକ/ଯୁଗ୍ମ ସଚିବ
୨୦୧୭-୨୦୨୦: ଦୁବାଇରେ ଭାରତର କନସଲ ଜେନେରାଲ
୨୦୨୦-୨୦୨୩: ବୈଦେଶିକ ବ୍ୟାପାର ମନ୍ତ୍ରଣାଳୟରେ ଯୁଗ୍ମ ସଚିବ (ଉପସାଗରୀୟ କ୍ଷେତ୍ର)
ତାଙ୍କର ରାଜନୀତି, ବାଣିଜ୍ୟ, ବିକାଶ, ନିରସ୍ତ୍ରୀକରଣ ଏବଂ ଅନ୍ତର୍ଜାତୀୟ ସୁରକ୍ଷା ସମେତ ବିଭିନ୍ନ ପ୍ରସଙ୍ଗରେ ବିଶେଷ ଅଭିଜ୍ଞତା ରହିଛି। ଭାରତ-ସାଉଦି ଆରବ ସମ୍ପର୍କ ଏକ ଐତିହାସିକ ଏବଂ ରଣନୈତିକ ମୋଡ଼ରେ ଥିବା ସମୟରେ ବିପୁଲଙ୍କ ନିଯୁକ୍ତି ଆସିଛି । ଶକ୍ତି, ପ୍ରତିରକ୍ଷା, ଆତଙ୍କବାଦ ବିରୋଧୀ ପ୍ରୟାସ ଏବଂ ପ୍ରଯୁକ୍ତିବିଦ୍ୟା ଭଳି କ୍ଷେତ୍ରରେ ଦୁଇ ଦେଶ ମଧ୍ୟରେ ସହଯୋଗ ନିରନ୍ତର ବୃଦ୍ଧି ପାଉଛି। ସାଉଦି ଆରବ ଭାରତର ପ୍ରମୁଖ ଶକ୍ତି ଅଂଶୀଦାରମାନଙ୍କ ମଧ୍ୟରୁ ଗୋଟିଏ, ଯେଉଁଠାରୁ ଭାରତ ଏହାର ତେଲ ଏବଂ ଗ୍ୟାସ୍ ଆବଶ୍ୟକତାର ଏକ ବଡ଼ ଅଂଶ ଆମଦାନି କରେ। ୨୦୧୦ ମସିହାରେ ରଣନୈତିକ ସହଭାଗୀତା ପ୍ରତିଷ୍ଠା ଏବଂ ପରବର୍ତ୍ତୀ ସମୟରେ ରଣନୈତିକ ସହଭାଗୀତା ପରିଷଦ ସ୍ଥାପନା ଦ୍ବାରା ଦୁଇଦେଶର ଦ୍ୱିପାକ୍ଷିକ ସହଯୋଗ ପାଇଁ ଏକ ଦୃଢ଼ ସାଂସ୍ଥାଗତ ଭିତ୍ତିଭୂମି ସୃଷ୍ଟି କରି ପାରିଛି। ନୂତନ ରାଷ୍ଟ୍ରଦୂତ ଭାବରେ, ଭିପୁଲ ଏହି ବହୁମୁଖୀ ସମ୍ପର୍କକୁ ଆହୁରି ଉଚ୍ଚତାକୁ ନେବାର ଦାୟିତ୍ୱ ତୁଲାଇବେ।
ସୌଜନ୍ୟ ସମ୍ବାଦ