ମୁମ୍ବାଇ: ଅଭିନେତ୍ରୀ ଡେଜି ଶାହ ନିଜ ବଲିଉଡ୍ ଡେବ୍ୟୁ ସମ୍ପର୍କରେ ଗୁରୁତ୍ୱପୂର୍ଣ୍ଣ କଥା ପ୍ରକାଶ କରିଛନ୍ତି। ସଲମାନ ଖାନଙ୍କ ସହ ୨୦୧୪ ମସିହାରେ ଆସିଥିବା ‘ଜୟ ହୋ’ ଫିଲ୍ମ ଜରିଆରେ ସେ ବଲିଉଡରେ ପ୍ରବେଶ କରିଥିଲେ। ତେବେ ଏହି ଫିଲ୍ମ ପୂର୍ବରୁ ସେ ସଲମାନଙ୍କ ଆଉ ଏକ ସୁପରହିଟ୍ ଫିଲ୍ମ ‘ବଡିଗାର୍ଡ’ର ଅଫରକୁ ମନା କରିଥିଲେ। ଡେଜି ଏକ ସାକ୍ଷାତ୍କାରରେ କହିଛନ୍ତି ଯେ ‘ବଡିଗାର୍ଡ’ ଅଫର ପ୍ରତ୍ୟାଖ୍ୟାନ କରିବା ପରେ ସଲମାନ ଖାନଙ୍କ ପ୍ରତିକ୍ରିୟା ଅତ୍ୟନ୍ତ ସାଧାରଣ ଥିଲା। ସେ କହିଥିଲେ, ପ୍ରାୟ ୫ ରୁ ୭ ମିନିଟ୍ ପର୍ଯ୍ୟନ୍ତ ଘରେ ନିରବତା ରହିଥିଲା ଏବଂ ପରେ ସଲମାନ କେବଳ “ଠିକ୍ ଅଛି” ବୋଲି କହିଥିଲେ।
ସବୁବେଳେ ସହକର୍ମୀମାନଙ୍କ ଧ୍ୟାନ ରଖନ୍ତି ସଲମାନ୍
ସେ ଆହୁରି କହିଛନ୍ତି ଯେ ସଲମାନ ରାଗି ନଥିଲେ, ବରଂ ପରିସ୍ଥିତିକୁ ବୁଝୁଥିଲେ। ଡେଜିଙ୍କ ମତାନୁସାରେ ସଲମାନ ବହୁତ ଯତ୍ନଶୀଳ ମଣିଷ ଏବଂ ସେ ସବୁବେଳେ ସହକର୍ମୀମାନଙ୍କ ଧ୍ୟାନ ରଖନ୍ତି। ଡେଜି ଏହା ମଧ୍ୟ କହିଛନ୍ତି ଯେ, ସେ ସଲମାନଙ୍କ ସହ କଥାହେବା ପୂର୍ବରୁ ବହୁତ ଚିନ୍ତିତ ଥିଲେ। ସେ ଏକ ସପ୍ତାହ ଧରି ଦର୍ପଣ ସମ୍ମୁଖରେ ଅଭ୍ୟାସ କରି ନିଜକୁ ମାନସିକ ଭାବେ ପ୍ରସ୍ତୁତ କରିଥିଲେ। ସେ ଏହା ମଧ୍ୟ କହିଥିଲେ ଯେ ସେ ପରେ ଭାବୁଥିଲେ ଆଉ ଭଲ ଉତ୍ତର ଦେଇପାରୁଥାନ୍ତି। ଶେଷରେ ପ୍ରାୟ ଦେଢ଼ ବର୍ଷ ପରେ ସଲମାନ ଖାନ ପୁଣି ଡେଜିଙ୍କୁ ‘ଜୟ ହୋ’ ପାଇଁ ଅଡିସନ ଦେବାକୁ କହିଥିଲେ। ଏହି ଫିଲ୍ମରେ ସେ ମୁଖ୍ୟ ଭୂମିକା ପାଇଥିଲେ ଏବଂ ୨୦୧୪ରେ ବଲିଉଡରେ ତାଙ୍କର ଡେବ୍ୟୁ ସଫଳ ହୋଇଥିଲା।
ସୌଜନ୍ୟ ସମ୍ବାଦ
