ଚେନ୍ନାଇ: କେନ୍ଦ୍ର ସରକାରଙ୍କ ପ୍ରସ୍ତାବିତ ସୀମା ପୁନଃ ନିର୍ଦ୍ଧାରଣ ବିଲ୍ ବିରୋଧରେ ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନ୍ ଗୁରୁବାର ପ୍ରତିବାଦ ଆରମ୍ଭ କରିଛନ୍ତି। ଷ୍ଟାଲିନ ଚେନ୍ନାଇଠାରେ ପ୍ରସ୍ତାବିତ ବିଲ୍ର ଏକ କପିକୁ ପୋଡ଼ି ଦେବା ସହିତ କଳାପତାକା ପ୍ରଦର୍ଶନ କରି ରାଜ୍ୟବ୍ୟାପୀ ପ୍ରତିବାଦ ଆନ୍ଦୋଳନ ଆରମ୍ଭ କରିଛନ୍ତି। ସରକାର ଗୁରୁବାରଠାରୁ ସଂସଦର ଏକ ସ୍ୱତନ୍ତ୍ର ତିନି ଦିନିଆ ଅଧିବେଶନ ଡାକିଛନ୍ତି। ଭାରତର ନିର୍ବାଚନ ଢାଞ୍ଚା ଓ ପ୍ରତିନିଧିତ୍ୱ ବ୍ୟବସ୍ଥାକୁ ପୁନଃଆକୃତି ଦେବା ପାଇଁ ସରକାର ଏହି ଅଧିବେଶନରେ ତିନୋଟି ପ୍ରମୁଖ ବିଲ୍ ଉପସ୍ଥାପନ କରିବାକୁ ଯାଉଛନ୍ତି। ତେବେ ବିଲ୍କୁ ନେଇ ଅଧିବେଶନ ଝଡ଼ମୟ ହୋଇପାରେ।
ଗୁରୁବାର ତାମିଲନାଡ଼ୁ ମୁଖ୍ୟମନ୍ତ୍ରୀ କଳା ପୋଷାକ ପିନ୍ଧି ସମ୍ବିଧାନ (ଏକତ୍ରିଶତମ ସଂଶୋଧନ) ବିଲ୍, ୨୦୨୬ କୁ କଳା ପତାକା ଦେଖାଇଥିଲେ। ଏହି ବିଲ୍ ରାଜ୍ୟ ବିଧାନସଭା ଏବଂ ଲୋକସଭାର ଆକାର ଏବଂ ଗଠନକୁ ପରିବର୍ତ୍ତନ କରିବା ପାଇଁ ଏକ ସୀମା ନିର୍ଦ୍ଧାରଣ ପ୍ରକ୍ରିୟା ପାଇଁ ପ୍ରସ୍ତାବ ଦେଇଛି। ସେ ଏହାକୁ କଳା ଆଇନ ବୋଲି ବର୍ଣ୍ଣନା କରିଥିବାର ଏକ କପି ମଧ୍ୟ ପୋଡ଼ି ଦେଇଛନ୍ତି।
ଏକ ପୋଷ୍ଟରେ ଷ୍ଟାଲିନ୍ ରାଜ୍ୟବାସୀଙ୍କୁ ସୀମା ପୁନଃ ନିର୍ଦ୍ଧାରଣ ବିଲ୍ ବିରୋଧରେ ବ୍ୟାପକ ପ୍ରଦର୍ଶନ କରିବାକୁ କହିଛନ୍ତି। ଅତୀତର ହିନ୍ଦୀ ବିରୋଧୀ ଆନ୍ଦୋଳନ ପରି ଏହି ଆନ୍ଦୋଳନକୁ ଜୋରଦାର କରାଯାଉ ଯେପରିକି ଏକଛତ୍ରବାଦୀ ବିଜେପିର ଅହଙ୍କାର ଭାଙ୍ଗିଯିବ ବୋଲି ଷ୍ଟାଲିନ କହିଛନ୍ତି। ଲୋକମାନଙ୍କୁ ପ୍ରତିବାଦ ସ୍ବରୂପେ ଘରେ କଳା ପତାକା ପ୍ରଦର୍ଶନ କରିବାକୁ ଷ୍ଟାଲିନ ଆହ୍ବାନ ଦେଇଛନ୍ତି। ସଂସଦର ସ୍ବତନ୍ତ୍ର ଅଧିବେଶନ ଏପ୍ରିଲ ୧୬ରୁ ୧୮ ତାରିଖ ପର୍ଯ୍ୟନ୍ତ ଚାଲିବ।
ସୌଜନ୍ୟ ସମ୍ବାଦ