ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ର୍ବତନ ରାଷ୍ଟ୍ରପତି ବାରାକ ଓବାମାଙ୍କ ଇରାନ ପରମାଣୁ ଚୁକ୍ତି ଜଏଣ୍ଟ୍ କମ୍ପ୍ରେହେନ୍ସିଭ ଆକ୍ସନ ପ୍ଲାନ୍(ଜେସିପିଓଏ)କୁ ଟାର୍ଗେଟ କରିଛନ୍ତି। ସେ ଏହାକୁ ଆମେରିକାର ସୁରକ୍ଷା ପାଇଁ ଏକ ଅତ୍ୟନ୍ତ ଖରାପ ଚୁକ୍ତି ବୋଲି କହିଛନ୍ତି ଏବଂ ଦାବି କରିଛନ୍ତି ଯେ, ତାଙ୍କ ନେତୃତ୍ୱରେ ପ୍ରସ୍ତୁତ ହେଉଥିବା ନୂତନ ଚୁକ୍ତି ବହୁତ ଭଲ ଏବଂ ଅଧିକ ସୁରକ୍ଷିତ ହେବ। ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ ଲେଖିଛନ୍ତି, ପୂର୍ବତନ ରାଷ୍ଟ୍ରପତି ବାରାକ ଓବାମା ଏବଂ ଜୋ ବାଇଡେନଙ୍କ ସମୟରେ ହୋଇଥିବା ଏହି ଚୁକ୍ତିନାମା ଆମେରିକାର ସୁରକ୍ଷା ପାଇଁ ସବୁଠାରୁ ବିପଜ୍ଜନକ ଚୁକ୍ତି ମଧ୍ୟରୁ ଗୋଟିଏ। ଏହି ଚୁକ୍ତିନାମା ଇରାନକୁ ପରମାଣୁ ଅସ୍ତ୍ରଶସ୍ତ୍ର ପାଇଁ ଆଗକୁ ବଢ଼ିବାକୁ ଏକ ପଥ ଦେଇଥିଲା। ଚୁକ୍ତିର ଅଂଶ ଭାବରେ ଇରାନକୁ ୧.୭ ବିଲିୟନ ଡଲାର ନଗଦ ଦିଆଯାଇଥିଲା ଏବଂ ଏହାକୁ ବିମାନ ମାଧ୍ୟମରେ ଇରାନକୁ ପଠାଯାଇଥିବା ଜଣାପଡ଼ିଛି। ଇରାନକୁ ଅନ୍ୟାନ୍ୟ ଅର୍ଥନୈତିକ ରିହାତି ଭାବରେ ଶହ ଶହ ବିଲିୟନ ଡଲାର ମଧ୍ୟ ଦିଆଯାଇଥିଲା।
ଟ୍ରମ୍ପଙ୍କ ଅନୁଯାୟୀ, ଯଦି ସେ ଚୁକ୍ତିନାମାକୁ ବାତିଲ କରିନଥାନ୍ତେ, ତେବେ ପଶ୍ଚିମ ଏସିଆର ପରିସ୍ଥିତି ଆହୁରି ଗମ୍ଭୀର ହୋଇଥାନ୍ତା। ଏପରିକି ଇସ୍ରାଏଲୀ ଏବଂ ଆମେରିକାର ସାମରିକ ଘାଟି ପ୍ରତି ପରମାଣୁ ବିପଦ ବୃଦ୍ଧି ପାଇଥାନ୍ତା। ସେ ଗଣମାଧ୍ୟମକୁ ମଧ୍ୟ ଟାର୍ଗେଟ କରି କହିଛନ୍ତି ଯେ, କିଛି ସାମ୍ବାଦିକ ଏବଂ ସଂସ୍ଥା ଚୁକ୍ତିନାମାକୁ ଯଥାର୍ଥ କରିବାକୁ ଚେଷ୍ଟା କରୁଛନ୍ତି, ଯଦିଓ ଏହା ଆମେରିକା ପାଇଁ ଲଜ୍ଜାଜନକ ଏବଂ ବିପଜ୍ଜନକ ଥିଲା। ସେ ଏହା ମଧ୍ୟ କହିଛନ୍ତି, ଯଦି ତାଙ୍କ ନେତୃତ୍ୱରେ ଏକ ନୂତନ ଚୁକ୍ତି ହୁଏ, ତେବେ ଏହା କେବଳ ପଶ୍ଚିମ ଏସିଆ ପାଇଁ ନୁହେଁ ବରଂ ୟୁରୋପ, ଆମେରିକା ଏବଂ ସମଗ୍ର ବିଶ୍ୱ ପାଇଁ ଶାନ୍ତି ଏବଂ ସ୍ଥିରତା ସୁନିଶ୍ଚିତ କରିବ। ତାଙ୍କ ଅନୁସାରେ, ଏହି ଚୁକ୍ତି ପୂର୍ବ ଚୁକ୍ତି ପରି ଦୁର୍ବଳ ହେବ ନାହିଁ, ବରଂ ଦୃଢ଼ ସୁରକ୍ଷା ଗ୍ୟାରେଣ୍ଟି ସହିତ ପ୍ରସ୍ତୁତ କରାଯିବ। ଟ୍ରମ୍ପଙ୍କ ଏହି ମନ୍ତବ୍ୟ ପୁଣି ଥରେ ଆମେରିକୀୟ ରାଜନୀତିରେ ଇରାନର ପରମାଣୁ ନୀତି ସମ୍ପର୍କରେ ବିତର୍କକୁ ପୁଣି ଥରେ ଇନ୍ଧନ ଯୋଗାଇଛି।
ସୌଜନ୍ୟ ସମ୍ବାଦ