ମସ୍କଙ୍କ ଷ୍ଟାରଲିଙ୍କ ଉପରେ ଆକ୍ରମଣ କରିବ କି ରୁଷ ? ବଡ଼ ଦାବି କଲା ନାଟୋ ଦେଶର ଗୁଇନ୍ଦା ସଂସ୍ଥା

ନୂଆଦିଲ୍ଲୀ: ରୁଷ ଆଣ୍ଟି-ସାଟେଲାଇଟ୍ ଯୁଦ୍ଧାସ୍ତ୍ର ନିର୍ମାଣ କରୁଛି । ଏଲନ ମସ୍କଙ୍କ ଷ୍ଟାରଲିଙ୍କ ଉପଗ୍ରହକୁ ଧ୍ବଂସ କରିବା ଲାଗି ରୁଷ ହୁଏତ ଏହି ଯୁଦ୍ଧାସ୍ତ୍ର ବିକଶିତ କରୁଛି ବୋଲି ନାଟୋ ଦେଶର ଗୁଇନ୍ଦା ସଂସ୍ଥା ଅନୁମାନ କରୁଛନ୍ତି । ୟୁକ୍ରେନ ଯୁଦ୍ଧରେ ଷ୍ଟାରଲିଙ୍କ କିଭ୍କୁ ସହାୟତା କରୁଥିବାରୁ ମସ୍କୋ ଏଭଳି କରିପାରେ । ଗୁଇନ୍ଦା ରିପୋର୍ଟ ଅନୁଯାୟୀ, ଏହି ନୂତନ ଅସ୍ତ୍ର ଜୋନ୍-ଇଫେକ୍ଟ ପ୍ରଯୁକ୍ତିବିଦ୍ୟା ଉପରେ ଆଧାରିତ ହୋଇପାରେ। ଏହା ଲକ୍ଷ ଲକ୍ଷ ଛୋଟ କିନ୍ତୁ ଭାରୀ ଧାତୁ ପେଲେଟ୍ ମହାକାଶକୁ ଛାଡ଼ିବ। ଏହି ପେଲେଟ୍ ଷ୍ଟାରଲିଙ୍କ୍ ସାଟେଲାଇଟର କକ୍ଷପଥରେ ବିସ୍ତାର କରିବ।

ଏହି ପେଲେଟ୍ଗୁଡ଼ିକ ଏକକାଳୀନ ଅନେକ ଉପଗ୍ରହକୁ କ୍ଷତି ପହଞ୍ଚାଇପାରେ । ଫଳରେ ଷ୍ଟାରଲିଙ୍କ୍ ନେଟୱାର୍କର ଏକ ବଡ଼ ଅଂଶ ନଷ୍ଟ ହୋଇପାରେ। ବିଶେଷଜ୍ଞମାନେ କହିଛନ୍ତି ଯେ, ଏପରି ଅସ୍ତ୍ର ବ୍ୟବହାର ଅତ୍ୟନ୍ତ ବିପଜ୍ଜନକ ହେବ। ଏହି ପେଲେଟ୍ ଦ୍ୱାରା ସୃଷ୍ଟି ହୋଇଥିବା ଭଗ୍ନାବଶେଷ କେବଳ ଷ୍ଟାରଲିଙ୍କ ଉପଗ୍ରହ ନୁହେଁ ବରଂ ମହାକାଶରେ ଥିବା ଅନ୍ୟ ଦେଶ ଏବଂ କମ୍ପାନୀଗୁଡ଼ିକର ମଧ୍ୟ କ୍ଷତି କରିପାରେ। ଏଥିରେ ରୁଷ ଏବଂ ଏହାର ସହଯୋଗୀ ଚୀନ୍ ଅନ୍ତର୍ଭୁକ୍ତ, ଯେଉଁମାନେ ଯୋଗାଯୋଗ, ପ୍ରତିରକ୍ଷା ଏବଂ ନିରୀକ୍ଷଣ ପାଇଁ ହଜାର ହଜାର ଉପଗ୍ରହ ଉପରେ ନିର୍ଭର କରନ୍ତି।

ମହାକାଶ ସୁରକ୍ଷା ବିଶେଷଜ୍ଞ ଭିକ୍ଟୋରିଆ ସାମସନ କହିଛନ୍ତି ଯେ, ସେ ଏପରି ଅସ୍ତ୍ର ଉପରେ ବିଶ୍ୱାସ କରନ୍ତି ନାହିଁ। ଏପରି ପଦକ୍ଷେପ ମହାକାଶରେ ଏକ ଅନିୟନ୍ତ୍ରିତ ପରିସ୍ଥିତି ସୃଷ୍ଟି କରିବ ଏବଂ ରୁଷ ପାଇଁ ମଧ୍ୟ କ୍ଷତିକାରକ ହେବ । କାନାଡିଆନ୍ ଫୋର୍ସେସ୍ ସ୍ପେସ୍ ଡିଭିଜନର ମୁଖ୍ୟ ବ୍ରିଗେଡିୟର ଜେନେରାଲ୍ କ୍ରିଷ୍ଟୋଫର ହର୍ଣ୍ଣର୍ କହିଛନ୍ତି, ଏହି ସମ୍ଭାବନାକୁ ସମ୍ପୂର୍ଣ୍ଣ ଭାବରେ ଅସ୍ୱୀକାର କରାଯାଇପାରିବ ନାହିଁ। ଯଦି ରୁଷ ମହାକାଶରେ ପରମାଣୁ ଅସ୍ତ୍ର ଭଳି ବିକଳ୍ପ ବିଷୟରେ ବିଚାର କରିପାରୁଛି, ତେବେ ଏକ କମ୍ ବିପଦପୂର୍ଣ୍ଣ ଅସ୍ତ୍ର ବିକଶିତ କରିବା ମଧ୍ୟ ସମ୍ଭବ। ରୁଷ ଏହି ଅଭିଯୋଗଗୁଡ଼ିକର ଆନୁଷ୍ଠାନିକ ଭାବରେ ପ୍ରତିକ୍ରିୟା ଦେଇନାହିଁ।

ପୂର୍ବରୁ ରୁଷ ମହାକାଶରେ ଅସ୍ତ୍ରଶସ୍ତ୍ର ନିୟୋଜନକୁ ରୋକିବା ପାଇଁ ଜାତିସଂଘକୁ ଆହ୍ୱାନ କରିଥିଲା । ରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ କହିଛନ୍ତି ଯେ, ରୁଷ ମହାକାଶରେ ପରମାଣୁ ଅସ୍ତ୍ର ନିୟୋଜନ କରିବାକୁ ଚାହୁଁନାହିଁ। ଗୁଇନ୍ଦା ରିପୋର୍ଟରୁ ଜଣାପଡ଼ିଛି ଯେ, ରୁଷ ଷ୍ଟାରଲିଙ୍କକୁ ଏକ ବିଶେଷ ବିପଦ ବୋଲି ଭାବୁଛି। ୟୁକ୍ରେନ୍ ଯୁଦ୍ଧ ସମୟରେ ଷ୍ଟାରଲିଙ୍କ ହାଇ-ସ୍ପିଡ୍ ଇଣ୍ଟରନେଟ୍ ଯୋଗାଇଥିଲା। ଏହାକୁ ସାମରିକ ଯୋଗାଯୋଗ, ଅସ୍ତ୍ରଶସ୍ତ୍ର ପରିବହନ ଏବଂ ସରକାରୀ କାର୍ଯ୍ୟ ପାଇଁ ବ୍ୟବହାର କରାଯାଇଛି। ରୁଷ ଅଧିକାରୀମାନେ ବାରମ୍ବାର କହିଛନ୍ତି ଯେ, ୟୁକ୍ରେନର ସାମରିକ ବାହିନୀକୁ ସମର୍ଥନ କରୁଥିବା ବାଣିଜ୍ୟିକ ଉପଗ୍ରହକୁ ଟାର୍ଗେଟ କରାଯାଇପାରେ ।

ସୌଜନ୍ୟ ସମ୍ବାଦ