Social Media: ସୋସିଆଲ ମିଡିଆ ପୋଷ୍ଟରୁ ଲିକ୍ ହୋଇପାରେ ଆପଣଙ୍କ ଲୋକେସନ୍ ! ଜାଣନ୍ତୁ କିପରି ରହିବେ ସୁରକ୍ଷିତ

ନୂଆଦିଲ୍ଲୀ, ୧୮।୮: ଆଜିର ଡିଜିଟାଲ ଯୁଗରେ ସୋସିଆଲ ମିଡିଆରେ ଫଟୋ ଏବଂ ଭିଡିଓ ସେୟାର କରିବା ଏକ ସାଧାରଣ କଥା ହୋଇଯାଇଛି । ବିଶେଷ କରି ଯୁବପିଢ଼ିଙ୍କ ମଧ୍ୟରେ ଇନଷ୍ଟାଗ୍ରାମ, ଫେସବୁକ୍ ଏବଂ ଅନ୍ୟାନ୍ୟ ପ୍ଲାଟଫର୍ମର ପ୍ରବଳ କ୍ରେଜ୍ ଦେଖିବାକୁ ମିଳେ । ଲୋକମାନେ ପ୍ରାୟତଃ ବୁଲିବାକୁ ଯିବା, ଘର, ଅଫିସ୍, ରେଷ୍ଟୁରାଣ୍ଟ କିମ୍ବା କୌଣସି ସ୍ୱତନ୍ତ୍ର ସ୍ଥାନର ଫଟୋକୁ ତୁରନ୍ତ ସୋସିଆଲ ମିଡିଆରେ ଅପଲୋଡ୍ କରିଦିଅନ୍ତି । କିନ୍ତୁ ଆପଣ ଜାଣିଛନ୍ତି କି, ଆପଣଙ୍କର ଏକ ସାଧାରଣ ସୋସିଆଲ ମିଡିଆ ପୋଷ୍ଟ ମଧ୍ୟ ଆପଣଙ୍କ ଗୋପନୀୟତାକୁ ନଷ୍ଟ କରି ଆପଣଙ୍କ ଲୋକେସନ୍ ଲିକ୍ କରିପାରେ ?

ଫଟୋରୁ କିପରି ଜଣାପଡ଼ିଥାଏ ଲୋକେସନ୍ ?

ମିଡିଆ ରିପୋର୍ଟ ଅନୁଯାୟୀ, ସୋସିଆଲ ମିଡିଆରେ ସେୟାର ହୋଇଥିବା ଫଟୋରେ ଏପରି କିଛି ଜିନିଷ ଥାଏ ଯାହାଦ୍ୱାରା ସ୍ଥାନଟି ସହଜରେ ଚିହ୍ନିହୁଏ । ଯେପରିକି ରାସ୍ତା କଡ଼ର ସାଇନ୍ ବୋର୍ଡ, ଦୋକାନର ନାମ, ବଡ଼ କୋଠା, ପାହାଡ଼, ସମୁଦ୍ର, ମେଟ୍ରୋ ଷ୍ଟେସନ୍, ଗାଡ଼ିର ନମ୍ବର ପ୍ଲେଟ୍ କିମ୍ବା କୌଣସି ନିର୍ଦ୍ଦିଷ୍ଟ ସ୍ଥାନର ଚିହ୍ନ । ଏହା ବ୍ୟତୀତ କିଛି ଫଟୋରେ କ୍ୟାମେରା କିମ୍ବା ଆପ୍ ସହିତ ଜଡିତ ମେଟାଡେଟା ମଧ୍ୟ ରହିଥାଏ, ଯେଉଁଥିରେ ଫଟୋ ଉଠାଯାଇଥିବା ସ୍ଥାନର ସଠିକ୍ ସୂଚନା ସାମିଲ ଥାଏ । ଯଦିଓ ଅଧିକାଂଶ ସୋସିଆଲ ମିଡିଆ ପ୍ଲାଟଫର୍ମ ଫଟୋ ଅପଲୋଡ୍ ହେବା ସମୟରେ ଏହି ମେଟାଡେଟାକୁ ହଟାଇ ଦିଅନ୍ତି, ତଥାପି ଫଟୋରେ ଦୃଶ୍ୟମାନ ବିଭିନ୍ନ ସୂଚନା ମାଧ୍ୟମରେ ଲୋକେସନ୍ ଠାବ କରିବା ସହଜ ହୋଇଯାଇଥାଏ ।

AI ବଢ଼ାଇ ଦେଇଛି ଟ୍ରାକିଂର କ୍ଷମତା:

ପୂର୍ବରୁ କୌଣସି ଫଟୋରୁ ସ୍ଥାନ ଚିହ୍ନିବା ପାଇଁ ବହୁତ ସମୟ ଏବଂ ପରିଶ୍ରମ ଲାଗୁଥିଲା । କିନ୍ତୁ, ଆର୍ଟିଫିସିଆଲ ଇଣ୍ଟେଲିଜେନ୍ସ ଏହି କାମକୁ ଅତି ସହଜ କରିଦେଇଛି । ଏଆଇ କୌଣସି ଫଟୋରେ ଥିବା ଅତି କ୍ଷୁଦ୍ର ଜିନିଷକୁ ମଧ୍ୟ ଖୁବ୍ ଶୀଘ୍ର ଚିହ୍ନି ସେହି ସ୍ଥାନ ବିଷୟରେ ସଠିକ୍ ଅନୁମାନ କରିପାରେ । ଏହା ଫଟୋରେ ଥିବା ସମସ୍ତ ସୂଚନାକୁ ଯାଞ୍ଚ କରି ସେହି ଅଞ୍ଚଳକୁ ଠାବ କରିଥାଏ । ଯଦି ଜଣେ ବ୍ୟକ୍ତିଙ୍କ ବିଭିନ୍ନ ସୋସିଆଲ ମିଡିଆ ପୋଷ୍ଟକୁ ଏକାଠି ଅଧ୍ୟୟନ କରାଯାଏ, ତେବେ ତାଙ୍କ କାର୍ଯ୍ୟକଳାପର ପ୍ୟାଟର୍ନ ମଧ୍ୟ ସହଜରେ ବାରିହୋଇଯାଏ ।

ଏକାଧିକ ପୋଷ୍ଟ ପାଲଟିପାରେ ବିପଦ:

ସବୁଠାରୁ ବଡ଼ ବିପଦ ସେତେବେଳେ ସୃଷ୍ଟି ହୁଏ ଯେତେବେଳେ ଜଣେ ବ୍ୟକ୍ତି ନିୟମିତ ଭାବରେ ସୋସିଆଲ ମିଡିଆରେ ପୋଷ୍ଟ କରୁଥାଆନ୍ତି । ଏପରି ପରିସ୍ଥିତିରେ, ଭିନ୍ନ ଭିନ୍ନ ପୋଷ୍ଟରେ ନଜର ଆସୁଥିବା ସ୍ଥାନ ଏବଂ ସମୟକୁ ଯୋଡ଼ି ଯେକେହି ମଧ୍ୟ ସହଜରେ ଅନୁମାନ କରିପାରିବେ ଯେ ସେହି ବ୍ୟକ୍ତି କେଉଁଠାରେ ରୁହନ୍ତି, କେଉଁ କାର୍ଯ୍ୟାଳୟରେ କାମ କରନ୍ତି କିମ୍ବା ବାରମ୍ବାର କେଉଁ ସବୁ ସ୍ଥାନକୁ ଯାଆନ୍ତି । ଏହାର ସିଧାସଳଖ ଅର୍ଥ ହେଉଛି, ଗୋଟିଏ ମାତ୍ର ପୋଷ୍ଟରୁ ଅଧିକ ସୂଚନା ନ ମିଳିଲେ ବି, ଅନେକଗୁଡ଼ିଏ ପୋଷ୍ଟକୁ ଏକାଠି ମିଶାଇ ଦେଖିଲେ ଜଣେ ବ୍ୟକ୍ତିଙ୍କ ସମ୍ପୂର୍ଣ୍ଣ ଗତିବିଧି ବିଷୟରେ ସହଜରେ ଜଣାପଡ଼ିଯାଇଥାଏ ।

ସୋସିଆଲ ମିଡିଆରେ କିପରି ସୁରକ୍ଷିତ ରହିବେ ?

ଆପଣଙ୍କ ଲୋକେସନ୍ ଏବଂ ବ୍ୟକ୍ତିଗତ ଗୋପନୀୟତାକୁ ସୁରକ୍ଷିତ ରଖିବା ପାଇଁ ସୋସିଆଲ ମିଡିଆ ବ୍ୟବହାର କରିବା ସମୟରେ ନିମ୍ନଲିଖିତ ସତର୍କତା ଅବଲମ୍ବନ କରିବା ଅତ୍ୟନ୍ତ ଜରୁରୀ । ଘରର ପ୍ରବେଶପଥ, ପ୍ଲେଟ୍ ନମ୍ବର କିମ୍ବା ଘର ଆଖପାଖର ସ୍ପଷ୍ଟ ପରିଚୟ ଦେଉଥିବା ଫଟୋ ପୋଷ୍ଟ କରନ୍ତୁ ନାହିଁ । ରାସ୍ତା କଡ଼ର ସାଇନ୍ ବୋର୍ଡ, ନିଜ କାର୍ଯ୍ୟାଳୟର ନାମ କିମ୍ବା ଅନ୍ୟାନ୍ୟ ପରିଚୟପୂର୍ଣ୍ଣ ସୂଚନା ଥିବା ଫଟୋ ସେୟାର କରିବାରୁ ବିରତ ରୁହନ୍ତୁ । ଘରୁ ବାହାରିବା ମାତ୍ରେ କୌଣସି ପବ୍ଲିକ ପ୍ଲାଟଫର୍ମରେ ନିଜର ଲାଇଭ୍ ଲୋକେସନ୍ କିମ୍ବା ଭ୍ରମଣ ସମ୍ବନ୍ଧୀୟ ସୂଚନା ତୁରନ୍ତ ସେୟାର କରନ୍ତୁ ନାହିଁ ।

ସୌଜନ୍ୟ ପ୍ରମେୟ