SIR Controversy: ଏସ୍‌ଆଇଆର୍ ବିବାଦ : ସିଇସିଙ୍କୁ ନିଲମ୍ବନ କରିବାକୁ ମନାକଲେ ସୁପ୍ରିମ୍‌କୋର୍ଟ

ଆବେଦନକାରୀ ରାକେଶ କୁମାର ସିଂହଙ୍କ ପକ୍ଷରୁ ହାଜର ହୋଇ ବରିଷ୍ଠ ଆଇନଜୀବୀ ବିକାଶ ସିଂହ ଯୁକ୍ତି ବାଢ଼ିଥିଲେ ଯେ, ସିଇସି ଆଇନର ନିଯୁକ୍ତି ପ୍ରକ୍ରିୟା ବୃହତ୍ତର ଖଣ୍ଡପୀଠରେ ବିଚାରାଧୀନ ଥିଲେ ହେଁ, ବର୍ତ୍ତମାନ ପ୍ରତ୍ୟେକ ନାଗରିକ ନିଜର ମତାଧିକାରକୁ ନେଇ ଅସୁରକ୍ଷିତ ମନେ କରୁଥିବାରୁ ତୁରନ୍ତ କିଛି ଅନ୍ତରୀଣ ପଦକ୍ଷେପ ଆବଶ୍ୟକ। ସେ କେନ୍ଦ୍ରୀୟ ନିର୍ବାଚନ କମିସନର ଅଧିନିୟମର ଧାରା ୧୮ର ଉଲ୍ଲେଖ କରି କହିଥିଲେ ଯେ, ଆୟୋଗଙ୍କ ନିଷ୍ପତ୍ତି ଯଥାସମ୍ଭବ ସର୍ବସମ୍ମତ କିମ୍ବା ବହୁମତ ଆଧାରରେ ହେବା ଉଚିତ। ଏଥିସହ ଧାରା ୧୬ ମାଧ୍ୟମରେ ସିଇସିଙ୍କୁ ମିଳିଥିବା ଆଇନଗତ ସୁରକ୍ଷା ସୁପ୍ରିମ୍‌କୋର୍ଟର ବିଚାରପତିଙ୍କ ପାଖରେ ମଧ୍ୟ ନାହିଁ ବୋଲି ସେ ଦର୍ଶାଇଥିଲେ। ଯେତେବେଳେ ଖଣ୍ଡପୀଠ କହିଥିଲେ ଯେ ସିଇସିଙ୍କୁ ନିଲମ୍ବନ କଲେ ଆୟୋଗର କାର୍ଯ୍ୟ ସ୍ଥଗିତ ହୋଇଯିବ ଏବଂ ନିର୍ବାଚନ କିଏ କରାଇବ, ସେତେବେଳେ ବିକାଶ ସିଂହ କହିଥିଲେ, ‘ଏଥିପାଇଁ କୋର୍ଟଙ୍କୁ ତୁରନ୍ତ ଆଦେଶ ଦେବାକୁ ହେବ, ନଚେତ୍ ଦେଶ ଜଳିଯିବ’ । ତେବେ ଏହି ଯୁକ୍ତିକୁ ଖଣ୍ଡପୀଠ ଅଗ୍ରାହ୍ୟ କରିବା ସହ କୌଣସି ଅନ୍ତରୀଣ ଆଦେଶ ଦେବାକୁ ମନା କରିଦେଇଥିଲେ।

ବିଚାରପତି ବାଗଚି ପ୍ରଶ୍ନ କରିଥିଲେ ଯେ, ଅନ୍ୟ ପକ୍ଷର ଶୁଣାଣି ନକରି କୋର୍ଟ କେମିତି ଏକପାଖିଆ ଭାବେ ନିଷ୍ପତ୍ତି ନେବେ ଯେ ସିଇସିଙ୍କ ସମସ୍ତ ନିଷ୍ପତ୍ତି ମନମୁଖୀ ଥିଲା। ଯଦି ପ୍ରାଥମିକ ରେକର୍ଡରୁ ପ୍ରମାଣିତ ହୁଏ ଯେ ନିଷ୍ପତ୍ତି ସର୍ବସମ୍ମତ ନଥିଲା, ତେବେ କୋର୍ଟ ସେଗୁଡ଼ିକକୁ ବେଆଇନ ବା ସାମ୍ବିଧାନିକ ବ୍ୟବସ୍ଥା ବାହାରେ ବୋଲି ଘୋଷଣା କରି ରଦ୍ଦ କରିପାରିବେ। ସିଜେଆଇ ମଧ୍ୟ ସ୍ପଷ୍ଟ କରିଛନ୍ତି ଯେ କୋର୍ଟ କେବଳ ଖବରକାଗଜ ରିପୋର୍ଟ ଉପରେ ନିର୍ଭର କରି ଆଦେଶ ଦେଇପାରିବେ ନାହିଁ।