Prasid-Suthar: ପ୍ରସିଦ୍ଧ-ସୂଥାରଙ୍କୁ ୬ ୱିକେଟ୍: ଫଲୋଅନ୍ ଏଡ଼ାଇବାକୁ ଶ୍ରୀଲଙ୍କାର ସଂଘର୍ଷ
ଭାରତ ବିପକ୍ଷ ଦ୍ବିତୀୟ ଟେଷ୍ଟ୍ରେ ଘରୋଇ ଶ୍ରୀଲଙ୍କା ଫଲୋଅନ୍ ଏଡ଼ାଇବାକୁ ସଂଘର୍ଷ ଜାରି ରଖିଛି। ଭାରତର ପ୍ରଥମ ପାଳିର ସ୍କୋର୍ ୫୦୩/୯ (ଘୋଷିତ) ଜବାବରେ ସିଂହଳୀ ଦଳ ତୃତୀୟ ଦିନର ଖେଳ ଶେଷ ସୁଦ୍ଧା ୨୬୫/୮ କରି ୨୩୮ ରନ୍ ପଛରେ ରହିଛି।
କଲମ୍ବୋ: ଭାରତ ବିପକ୍ଷ ଦ୍ବିତୀୟ ଟେଷ୍ଟ୍ରେ ଘରୋଇ ଶ୍ରୀଲଙ୍କା ଫଲୋଅନ୍ ଏଡ଼ାଇବାକୁ ସଂଘର୍ଷ ଜାରି ରଖିଛି। ଭାରତର ପ୍ରଥମ ପାଳିର ସ୍କୋର୍ ୫୦୩/୯ (ଘୋଷିତ) ଜବାବରେ ସିଂହଳୀ ଦଳ ତୃତୀୟ ଦିନର ଖେଳ ଶେଷ ସୁଦ୍ଧା ୨୬୫/୮ କରି ୨୩୮ ରନ୍ ପଛରେ ରହିଛି। ବର୍ଷା ହେବାରୁ ୧୦ ଓଭର ପୂର୍ବରୁ ଅମ୍ପାୟାର ଷ୍ଟମ୍ପ୍ସ ଡାକିଥିଲେ। ନ ହେଲେ ଶ୍ରୀଲଙ୍କାର ପ୍ରଥମ ପାଳି ମଙ୍ଗଳବାର ହିଁ ଶେଷ ହୋଇଯିବାର ଯଥେଷ୍ଟ ସମ୍ଭାବନା ଥିଲା। ତେବେ ଦଳକୁ ଫଲୋଅନ୍ରୁ ବଞ୍ଚାଇବାକୁ ସୋନାଲ ଦିନୁଶା (୮୫* ରନ୍) ଓ ଲାହିରୁ କୁମାରା (୫୦ ବଲ୍ରୁ ୮) ନବମ ୱିକେଟ୍ରେ ୩୫ ରନ୍ ଯୋଡ଼ି ଲଢ଼େଇ ଜାରି ରଖିଛନ୍ତି। ଚଳିତ ୨ ମ୍ୟାଚ୍ ବିଶିଷ୍ଟ ଟେଷ୍ଟ୍ ଶୃଙ୍ଖଳାରେ ଦିନୁଶା ତୃତୀୟ ଥର ଲାଗି ୫୦+ ରନ୍ କରି ଶ୍ରୀଲଙ୍କାକୁ ଉଦ୍ଧାର କରିବାକୁ ସଂଗ୍ରାମ ଜାରି ରଖିଛନ୍ତି। ଅନ୍ୟପକ୍ଷରେ ଭାରତର ପ୍ରସିଦ୍ଧ କୃଷ୍ଣ ଓ ମାନବ ସୂଥାର ୩-୩ ୱିକେଟ୍ ନେଇ ଶ୍ରୀଲଙ୍କାର ବଡ଼ କ୍ଷତି ଘଟାଇଛନ୍ତି।
ମଙ୍ଗଳବାର ୮/୨ରୁ ଖେଳ ଆରମ୍ଭ କରିଥିବା ଶ୍ରୀଲଙ୍କାକୁ ପ୍ରସିଦ୍ଧ କୃଷ୍ଣ ପ୍ରଥମ ଝଟ୍କା ଦେଇଥିଲେ। ସୋମବାରର ଅପରାଜିତ ବ୍ୟାଟର୍ କାମିଲ ମିଶରା (୧୯)ଙ୍କୁ ସେ ସଅଳ ପ୍ୟାଭିଲିୟନ୍ ଫେରାଇ ଦେଇଥିଲେ। ଏହାପରେ କିନ୍ତୁ ପସିନ୍ଦୁ ସୂରିୟାବନ୍ଦରା ଓ କାମିନ୍ଦୁ ମେଣ୍ଡିସ୍ (୩୨) ଚତୁର୍ଥ ୱିକେଟ୍ରେ ୮୭ ରନ୍ ଯୋଡ଼ି ପାଳି ସମ୍ଭାଳି ନେଇଥିଲେ। ମେଣ୍ଡିସ୍ (୩୨)ଙ୍କୁ ପ୍ରସିଦ୍ଧ ଦ୍ବିତୀୟ ଶିକାର କରିବାରୁ ଦଳ ମଧ୍ୟାହ୍ନ ବିରତି ବେଳକୁ ୧୩୦/୪ରେ ସଂଘର୍ଷ କରିଥିଲା। ମଧ୍ୟାହ୍ନ ଭୋଜନ ପରେ ପରେ ଧନଞ୍ଜୟ ଡି’ସିଲ୍ଭା (୮)ଙ୍କୁ ସୂଥାର ଚତୁରତାର ସହ ଆଉଟ୍ କରି ଦେଇଥିଲେ। ସେହିଭଳି ଦିନୁଶା ଦଳୀୟ ସ୍କୋର୍ ଆଗକୁ ନେଉଥିଲା ବେଳେ ରବୀନ୍ଦ୍ର ଜାଡ଼େଜାଙ୍କ ସ୍ପିନ୍ରେ ଫସି ସୂରିୟାବନ୍ଦରା (୮୦) ବୋଲ୍ଡ ହୋଇ ପ୍ୟାଭିଲିୟନ୍ ଫେରିଥିଲେ। ଏହା ପର ଓଭରରେ ନିରୋଶାନ ଡିକ୍ୱେଲା (୦)ଙ୍କୁ ମହମ୍ମଦ ସିରାଜ ଆଉଟ୍ କରି ଦେଇଥିଲେ। ଏହାପରେ ଅଷ୍ଟମ ୱିକେଟ୍ରେ ଦିନୁଶାଙ୍କୁ କେଶରା ନୁୱାନ୍ଥା (୭୪ ବଲ୍ରୁ ୧୮) ଭଲ ସହଯୋଗ କରିବାରୁ ଶ୍ରୀଲଙ୍କା ୨୦୦ ରନ୍ ପାର୍ କରିଥିଲା।
ସଂକ୍ଷିପ୍ତ ସ୍କୋର: ଭାରତ ପ୍ରଥମ ପାଳି-୫୦୩/୯, ଘୋଷଣା (ଦେବଦତ୍ତ ପଡ଼ିକଲ-୧୧୭, ଧ୍ରୁବ ଜୁରେଲ ୧୧୫*, ଋଷଭ ପନ୍ତ ୬୩, ଶୁବମନ ଗିଲ୍-୫୦, ଅସିଥ ଫର୍ଣ୍ଣାଣ୍ଡୋ-୪/୧୦୬, ପ୍ରବଥ ଜୟସୂରିୟା ୨/୧୩୨)। ଶ୍ରୀଲଙ୍କା ପ୍ରଥମ ପାଳି-୮୩.୪ ଓଭରରେ ୨୬୫/୮ (ସୋନାଲ ଦିନୁଶା ୮୫*, ପସିନ୍ଦୁ ସୂରିୟାବନ୍ଦରା ୮୦, କାମିନ୍ଦୁ ମେଣ୍ଡିସ ୩୨, ପ୍ରସିଦ୍ଧ କ୍ରିଷ୍ଣା ୩/୪୭, ମାନବ ସୂଥାର ୩/୮୩)।
ସୌଜନ୍ୟ ସମ୍ବାଦ
