୧୬ ଦେଶରେ ବ୍ୟାପିଲା ନୂଆ ସଂକ୍ରାମକ ଭୂତାଣୁ: ଚୀନ୍‌ରେ ୭ ହଜାର ମାମଲା,ଆମେରିକାରେ ଯାତ୍ରା ସତର୍କତା ଜାରି

ୱାଶିଂଟନ/ବେଜିଂ: ବିଶ୍ୱର ଅନେକ ସ୍ଥାନରେ ଚିକନଗୁନିଆ ଭାଇରସ ପୁଣି ଥରେ ମୁଣ୍ଡ ଟେକିବାରେ ଲାଗିଛି। ଏହାର ବର୍ଦ୍ଧିତ ମାମଲାକୁ ଦୃଷ୍ଟିରେ ରଖି, ଆମେରିକାର ରୋଗ ନିୟନ୍ତ୍ରଣ ଏବଂ ନିବାରଣ କେନ୍ଦ୍ର (ସିଡିସି) ଚୀନ୍ ଏବଂ ଅନ୍ୟାନ୍ୟ ଦେଶ ପାଇଁ ଏକ ଯାତ୍ରା ସତର୍କତା ଜାରି କରିଛି।

ସିଡିସି ଆମେରିକୀୟ ଯାତ୍ରୀମାନଙ୍କୁ ବିପଦ ବିଷୟରେ ସତର୍କ କରାଇ ଦେଇଛି, ଯେଉଁ ସ୍ଥାନରେ  ଭାଇରସ ସଂକ୍ରମଣ ଦ୍ରୁତ ଗତିରେ ବ୍ୟାପୁଛି ସେସବୁ ସ୍ଥାନକୁ ନଯିବାକୁ ସିଡିସି କହିଛି। ଚୀନ୍ ଚିକନଗୁନିଆ ମାମଲା ଦ୍ୱାରା ଅଧିକ ପ୍ରଭାବିତ ହୋଇଛି। ସେଠାରେ ୭ ହଜାରରୁ ଅଧିକ ମାମଲା ରିପୋର୍ଟ ହୋଇଛି।

ଗଣମାଧ୍ୟମ ରିପୋର୍ଟ ଅନୁଯାୟୀ, ଚଳିତ ବର୍ଷ ଏପର୍ଯ୍ୟନ୍ତ ମଧ୍ୟ ଏବଂ ଦକ୍ଷିଣ ଆମେରିକା, ଆଫ୍ରିକା, ଭାରତ ମହାସାଗର ଅଞ୍ଚଳ ଏବଂ ଏସିଆର ଅନେକ ସ୍ଥାନରେ ପ୍ରାୟ ୨.୪ ଲକ୍ଷ ଚିକନଗୁନିଆ ମାମଲା ପଞ୍ଜିକୃତ ହୋଇଛି। ଯେଉଁଥିରେ ୯୦ ଜଣଙ୍କର ମୃତ୍ୟୁ ମଧ୍ୟ ଘଟିଛି। ଚୀନ୍‌ର ଦକ୍ଷିଣ ପ୍ରଦେଶ ଗୁଆଙ୍ଗଡୋଙ୍ଗଠାରେ ଜୁନ୍ ୨୦୨୫ ପରଠାରୁ ୭,୦୦୦ ରୁ ଅଧିକ ମାମଲା ରେକର୍ଡ କରାଯାଇଛି। ଏହି ସହରର ଜନସଂଖ୍ୟା ପ୍ରାୟ ୭୮ ଲକ୍ଷ।  ୨୦୧୯ ପରେ ହଂକଂରେ ଚିକୁନଗୁନିଆର ପ୍ରଥମ ମାମଲା ସମ୍ପ୍ରତି ରିପୋର୍ଟ ହୋଇଛି।

ଚିକନଗୁନିଆର ବର୍ଦ୍ଧିତ ମାମଲାକୁ ଦୃଷ୍ଟିରେ ରଖି, ସିଡିସି ଏକ ସ୍ତର-୨ ଯାତ୍ରା ସ୍ୱାସ୍ଥ୍ୟ ନୋଟିସ୍ ଜାରି କରିଛି ଯାହା ପାଇଁ ଅଧିକ ସତର୍କତା ଆବଶ୍ୟକ। ଏଥିରେ ଦକ୍ଷିଣ ଆମେରିକାର ବୋଲିଭିଆ, ଚୀନ୍‌ର ଗୁଆଙ୍ଗଡୋଙ୍ଗ ପ୍ରଦେଶ, ମାଡାଗାସ୍କର, ମରିସସ୍, ମାୟୋଟ୍, ରିୟୁନିଅନ୍, ସୋମାଲିଆ ଏବଂ ଭାରତ ମହାସାଗର ଅଞ୍ଚଳର ଶ୍ରୀଲଙ୍କା ଭଳି ଦେଶ ଅନ୍ତର୍ଭୁକ୍ତ। ଏହା ବ୍ୟତୀତ, ସିଡିସି ବ୍ରାଜିଲ, କଲମ୍ବିଆ, ଭାରତ, ମେକ୍ସିକୋ, ନାଇଜେରିଆ, ପାକିସ୍ତାନ, ଫିଲିପାଇନ୍ସ ଏବଂ ଥାଇଲ୍ୟାଣ୍ଡ ସମ୍ପର୍କରେ ଆମେରିକୀୟ ଯାତ୍ରୀଙ୍କ ପାଇଁ ଏକ ଚେତାବନୀ ମଧ୍ୟ ଜାରି କରିଛି।

ଆମେରିକାରେ ଚିକନଗୁନିଆ ସାଧାରଣ। ତଥାପି, ସିଡିସି ତଥ୍ୟ ଅନୁଯାୟୀ, ୨୦୦୬ ପୂର୍ବରୁ, ଆମେରିକୀୟ ଯାତ୍ରୀଙ୍କ ମଧ୍ୟରେ ଚିକନଗୁନିଆ ସଂକ୍ରମଣ ବହୁତ କମ ଥିଲା। ୨୦୦୬-୨୦୧୩ ମଧ୍ୟରେ, ପ୍ରତିବର୍ଷ ଆମେରିକାରେ ହାରାହାରି ୨୮ ଜଣ ଚିକନଗୁନିଆ ଭାଇରସ ସଂକ୍ରମଣରେ ପୀଡିତ ଥିବା ନିଶ୍ଚିତ ହୋଇଥିଲା। ଏମାନେ ସମସ୍ତେ ଏସିଆ, ଆଫ୍ରିକା କିମ୍ବା ଭାରତ ମହାସାଗରର ପ୍ରଭାବିତ ଅଞ୍ଚଳକୁ ଆସୁଥିବା କିମ୍ବା ଫେରୁଥିବା ଯାତ୍ରୀ ଥିଲେ।

ସିଡିସି ଅନୁଯାୟୀ, ୨୦୧୯ ପରେ ଆମେରିକାରେ ସ୍ଥାନୀୟ ଭାବରେ ସଂକ୍ରମିତ କୌଣସି ମାମଲା ରିପୋର୍ଟ ହୋଇନାହିଁ। ତଥାପି, ୨୦୨୪ ମସିହାରେ ଯାତ୍ରା ସମୟରେ ଆମେରିକୀୟ ନାଗରିକଙ୍କଠାରେ ୧୯୯ ଏବଂ ୨୦୨୫ ମସିହାରେ ଏପର୍ଯ୍ୟନ୍ତ ୪୬ ସଂକ୍ରମଣ ମାମଲା ରିପୋର୍ଟ ହୋଇଛି।

ସୌଜନ୍ୟ – ସମ୍ବାଦ