ୱାସିଂଟନ: ଆମେରିକା ଏବଂ ଇରାନ ମଧ୍ୟରେ ପ୍ରସ୍ତାବିତ ଦ୍ୱିତୀୟ ପର୍ଯ୍ୟାୟ ଆଲୋଚନା ପାକିସ୍ତାନର ରାଜଧାନୀ ଇସଲାମାବାଦରେ ହେବ କି ନାହିଁ ସେ ବିଷୟରେ ଏପର୍ଯ୍ୟନ୍ତ କୌଣସି ନିଶ୍ଚିତକରଣ ହୋଇନାହିଁ। ବର୍ତ୍ତମାନର ଏନେଇ ସଙ୍କେତ ସ୍ପଷ୍ଟ ନାହିଁ। ତେଣୁ ପରିସ୍ଥିତି ଅନିଶ୍ଚିତ ରହିଛି। ଏହି ସମୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ସମୃଦ୍ଧ ୟୁରାନିୟମ୍ ବିଷୟରେ ଅଧିକ ଚିନ୍ତିତ ହୋଇ ପଡିଛନ୍ତି। ଇରାନ ତାଙ୍କ ଆଖିରୁ ନିଦ ହଜାଇ ଦେଇଛି। ଇରାନର ପରମାଣୁ କାର୍ଯ୍ୟକ୍ରମ ବିଷୟରେ ଚିନ୍ତା ପ୍ରକାଶ କରିଛନ୍ତି। ଅଧରାତିରେ ସେ ନଶୋଇ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ନିଜ ମନର ଭୟ ପ୍ରକାଶ କରି କହିଛନ୍ତି, ଇରାନର ପରମାଣୁ ପ୍ଲାଣ୍ଟ୍ ସ୍ଥାନ ତଳେ ପ୍ରାୟ ୪୦୦ କିଲୋଗ୍ରାମ ସମୃଦ୍ଧ ୟୁରାନିୟମ ରହିଛି। ଏହାକୁ ନେଇ ପରିସ୍ଥିତି ଗମ୍ଭୀର ରହିଛି। ଟ୍ରମ୍ପ ଦାବି କରିଛନ୍ତି, ଗତବର୍ଷ ଆମେରିକାର ସାମରିକ କାର୍ଯ୍ୟାନୁଷ୍ଠାନ ଦ୍ୱାରା ଏହି ଘାଟିଗୁଡ଼ିକର ଚାରିପାଖରେ ଥିବା ଅଞ୍ଚଳଗୁଡ଼ିକ ଗୁରୁତର ଭାବରେ କ୍ଷତିଗ୍ରସ୍ତ ହୋଇଛି । ସେଠାରୁ ୟୁରାନିୟମ ବାହାର କରିବା ଏକ କଷ୍ଟକର ଏବଂ ଲମ୍ବା ପ୍ରକ୍ରିୟା । ସେ ୟୁରାନିୟମକୁ ପରମାଣୁ ଧୂଳି ଭାବରେ ବର୍ଣ୍ଣନା କରି କହିଛନ୍ତି ଯେ, ଏହା ଅତ୍ୟନ୍ତ ସମ୍ବେଦନଶୀଳ ଏବଂ ବିପଜ୍ଜନକ ହୋଇପାରେ।
ଆମେରିକା ପ୍ରଶାସନ ଅଭିଯୋଗ କରୁଛି, ଇରାନ ଏହି ୟୁରାନିୟମକୁ ପରମାଣୁ ଅସ୍ତ୍ର ତିଆରି ପାଇଁ ବିଶୋଧନ କରୁଛି, ଯେତେବେଳେ ଇରାନ ସର୍ବଦା ଦାବି କରିଆସିଛି ଯେ ଏହାର ପରମାଣୁ କାର୍ଯ୍ୟକ୍ରମ ଶାନ୍ତିପୂର୍ଣ୍ଣ ଉଦ୍ଦେଶ୍ୟରେ କରାଯାଉଛି। ମଧ୍ୟପ୍ରାଚ୍ୟରେ ଉତ୍ତେଜନା ଏବଂ ସମ୍ଭାବ୍ୟ ଯୁଦ୍ଧବିରତି ଉପରେ ସାରା ବିଶ୍ୱ ନଜର ରଖିଛି। ଆମେରିକା ଏବଂ ଇରାନ ଏକ ନୂତନ ଚୁକ୍ତିରେ ପହଞ୍ଚିପାରିବେ କି ନାହିଁ ନା ପରିସ୍ଥିତି ପୁଣି ଥରେ ଯୁଦ୍ଧ ଆଡ଼କୁ ଗତି କରିପାରିବ ତାହା ପ୍ରଶ୍ନ ହୋଇ ରହିଛି। ବର୍ତ୍ତମାନ, ଦ୍ୱିତୀୟ ପର୍ଯ୍ୟାୟ ଆଲୋଚନା ନିଶ୍ଚିତ ହୋଇନାହିଁ କିମ୍ବା ନୂତନ ଚୁକ୍ତିର ସ୍ପଷ୍ଟ ଘୋଷଣା ହୋଇନାହିଁ। ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି, ଏବଂ ବିଶ୍ୱ ଦେଖୁଛି ଯେ ଆଗକୁ କୂଟନୈତିକ ପଥ ପ୍ରଶସ୍ତ ହେବ କି ବିବାଦ ପୁଣି ଥରେ ବୃଦ୍ଧି ପାଇବ।
ଆମେରିକା ଇସଲାମାବାଦରେ ଶାନ୍ତି ଆଲୋଚନା ପାଇଁ ରାଜି ହୋଇସାରିଛି। ଉପରାଷ୍ଟ୍ରପତି ଜେଡି ଭାନ୍ସଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ମଙ୍ଗଳବାର ଆସିବେ । ତଥାପି, ଇରାନ ଏହି ଆଲୋଚନାରେ ଅଂଶଗ୍ରହଣ କରିବାକୁ ସ୍ପଷ୍ଟ ଭାବରେ ମନା କରିଦେଇଛି। ଇରାନ କହିଛି ଯେ, ଯେପର୍ଯ୍ୟନ୍ତ ଆମେରିକାର ହର୍ମୁଜ୍ ପ୍ରଣାଳୀ ଅବରୋଧ ଜାରି ରହିଛି ସେପର୍ଯ୍ୟନ୍ତ ଆମେରିକା ସହିତ କୌଣସି ଆଲୋଚନାରେ ଅଂଶଗ୍ରହଣ କରିବୁ ନାହିଁ।
ସୌଜନ୍ୟ ସମ୍ବାଦ