ନୂଆଦିଲ୍ଲୀ,୧୦।୧୧: ପ୍ରଧାନମନ୍ତ୍ରୀ ମୋଦି ଗୋବର୍ଦ୍ଧନ ପୂଜା ଅବସରରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି। ସେ ଇନଷ୍ଟାଗ୍ରାମରେ ଏକ ପୋଷ୍ଟ ଶେୟାର କରିଛନ୍ତି, ଯେଉଁଥିରେ ସେ ଏକ ଗାଈକୁ ଘାସ ଖୁଆଉଥିବାର ଦୃଶ୍ୟ ରହିଛି। ଏହି ଫଟୋ ସହିତ ପ୍ରଧାନମନ୍ତ୍ରୀ ଲେଖିଛନ୍ତି, ‘ଗୋବର୍ଦ୍ଧନ ପୂଜାର ପବିତ୍ର ଅବସରରେ, ସମସ୍ତଙ୍କ ଜୀବନରେ ଶାନ୍ତି, ସୁଖ ଏବଂ ସମୃଦ୍ଧି ଆସୁ…’।
ଏହି ଫଟୋଗୁଡ଼ିକରେ ପ୍ରଧାନମନ୍ତ୍ରୀ ମୋଦି ଏକ ଗାଈ ଓ ତା’ର ବାଛୁରୀକୁ ଘାସ ଖୁଆଉଥିବାର ଦେଖିବାକୁ ମିଳୁଛି। ସେ ଉଲ୍ଲେଖ କରିଛନ୍ତି ଯେ ଏହି ଛବିଗୁଡ଼ିକ କିଛି ବିଶେଷ ମୁହୂର୍ତ୍ତକୁ ବର୍ଣ୍ଣନା କରୁଛି।
ଫଟୋଗୁଡ଼ିକ ବ୍ୟତୀତ, ପ୍ରଧାନମନ୍ତ୍ରୀ ମୋଦି ସୋସିଆଲ ମିଡିଆରେ ଏକ ଶ୍ଳୋକ ମଧ୍ୟ ଶେୟାର କରିଛନ୍ତି। ସେ ଲେଖିଛନ୍ତି, ‘ଗୋବର୍ଦ୍ଧନ ପୂଜା ଅବସରରେ ସମସ୍ତ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା। ଏହି ପବିତ୍ର ପର୍ବ ଆପଣମାନଙ୍କ ଜୀବନରେ ନୂତନ ଶକ୍ତି ଓ ଉତ୍ସାହ ଭରିଦେଉ। ମୁଁ କାମନା କରେ ଯେ ସମସ୍ତଙ୍କ ଜୀବନରେ ସୁଖ, ସୌଭାଗ୍ୟ ଏବଂ ସମୃଦ୍ଧିର ପ୍ରସାର ଘଟୁ।’
ପ୍ରଧାନମନ୍ତ୍ରୀ ଏକ ସଂସ୍କୃତ ଶ୍ଳୋକ ଶେୟାର କରିଛନ୍ତି: ‘ଅଭିରନଗରୀ-ପ୍ରାଣପ୍ରିୟଂ ସତ୍ୟ-ପରାକ୍ରମମ, ସ୍ବଭୃତ୍ୟ-ଭୟ-ଭେତ୍ତାରଂ ଗୋବର୍ଦ୍ଧନଧରଂ ଭଜେ।’ ଏହି ଶ୍ଳୋକର ଅର୍ଥ ହେଉଛି: ‘ମୁଁ ଭଗବାନ ଶ୍ରୀକୃଷ୍ଣଙ୍କୁ ବନ୍ଦନା କରୁଛିଯିଏ ବ୍ରଜବାସୀଙ୍କ ପାଇଁ ପ୍ରାଣଠାରୁ ଅଧିକ ପ୍ରିୟ, ଯିଏ ସତ୍ୟ ପରାକ୍ରମର ଅଧିକାରୀ, ଯିଏ ନିଜ ଭକ୍ତମାନଙ୍କ ଭୟ ଦୂର କରନ୍ତି ଏବଂ ଯିଏ ଗୋବର୍ଦ୍ଧନ ପର୍ବତକୁ ଧାରଣ କରିଥିଲେ।’
ପ୍ରଧାନମନ୍ତ୍ରୀଙ୍କ ଦ୍ୱାରା ଶେୟାର କରାଯାଇଥିବା ଶ୍ଳୋକଟି ‘ଶ୍ରୀ ଗୋବର୍ଦ୍ଧନଧରାଷ୍ଟକମ’ରୁ ନିଆଯାଇଛି। ଏହି ସୁନ୍ଦର ସ୍ତୋତ୍ରଟି ଭଗବାନ ଶ୍ରୀକୃଷ୍ଣଙ୍କ ‘ଗୋବର୍ଦ୍ଧନଧାରୀ’ (ଯିଏ ଗୋବର୍ଦ୍ଧନ ପର୍ବତ ଉଠାଇଥିଲେ) ରୂପର ମହିମା ଗାନ କରେ। ଏହି ଶ୍ଳୋକ ମାଧ୍ୟମରେ ଭଗବାନ ଶ୍ରୀକୃଷ୍ଣଙ୍କ ଦିବ୍ୟ ଗୁଣ ଏବଂ ଲୀଳାଗୁଡ଼ିକର ବର୍ଣ୍ଣନା କରାଯାଇଛି।
ସୌଜନ୍ୟ ଧରିତ୍ରୀ
