ତେହେରାନ: ଇରାନର ପୂର୍ବତନ ସର୍ବୋଚ୍ଚ ନେତା ଆୟୋତୋଲ୍ଲା ଅଲି ଖେମିନିଙ୍କ ଅନ୍ତିମ ସଂସ୍କାର ଖୁବ୍ ଶୀଘ୍ର ହେବ। ଇରାନ ସରକାର ତିନି ଦିନିଆ ରାଷ୍ଟ୍ରୀୟ ଅନ୍ତିମ ସଂସ୍କାର ଘୋଷଣା କରିଛି। ତେହେରାନ, କୋମ୍ ଏବଂ ମଶହାଦରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମରେ ଦୁଇ କୋଟି ଲୋକ ଯୋଗଦେବାର ଆଶା କରାଯାଉଛି। ପ୍ରଶାସନ ଏତେ ବଡ଼ ଭିଡ଼କୁ ନିୟନ୍ତ୍ରଣ କରିବା ପାଇଁ ବ୍ୟବସ୍ଥା କରୁଛି। ଏନେଇ ୪ ସ୍ଥାନରେ ଶୋଭାଯାତ୍ରା ବାହାର କରାଯିବ। ଇରାନୀ ଗଣମାଧ୍ୟମ ଅନୁସାରେ, ଏହି ଶୋଭାଯାତ୍ରାଗୁଡ଼ିକ ରାଜଧାନୀ ତେହେରାନ, କୋମ ଏବଂ ମଶହାଦରେ ଅନୁଷ୍ଠିତ ହେବ। ତିନୋଟି ସ୍ଥାନରେ ପ୍ରମୁଖ ସାର୍ବଜନୀନ କାର୍ଯ୍ୟକ୍ରମ ଅନୁଷ୍ଠିତ ହେବ। କେବଳ ତେହେରାନରେ ମୁଖ୍ୟ କାର୍ଯ୍ୟକ୍ରମ ୨୪ ଘଣ୍ଟାରୁ ଅଧିକ ସମୟ ଧରି ଚାଲିବ। ତେହେରାନ ପ୍ରଶାସନ ପ୍ରସ୍ତୁତିରେ ବ୍ୟସ୍ତ ଅଛନ୍ତି।
ସମାରୋହ ଜୁନ୍ ମାସରେ ହେବ
୨୮ ଫେବୃଆରିରେ ଇରାନ ଉପରେ ଆମେରିକା ଏବଂ ଇସ୍ରାଏଲ ଏକ ବଡ଼ ଆକ୍ରମଣ କରିଥିଲେ। ଏଥିରେ ଆୟୋତୋଲ୍ଲା ଅଲି ଖେମିନିଙ୍କ ମୃତ୍ୟୁ ଘଟିଥିଲା। ଇସଲାମିକ ପରମ୍ପରା ଅନୁଯାୟୀ ତୁରନ୍ତ କବର ଦେବା ଆବଶ୍ୟକ, କିନ୍ତୁ ଇରାନୀ କର୍ତ୍ତୃପକ୍ଷ ଏହାକୁ ଦୀର୍ଘ ସମୟ ପାଇଁ ବିଳମ୍ବିତ କରିଥିଲେ।
ମାର୍ଚ୍ଚ ଆରମ୍ଭରେ, ପ୍ରଶାସନ କହିଥିଲା ଯେ ପ୍ରବଳ ଭିଡ଼ ଯୋଗୁ ତୁରନ୍ତ ଅନ୍ତିମ ସଂସ୍କାର ସମ୍ଭବ ହେବ ନାହିଁ। ଏବେ, ରାଜ୍ୟ ସମାଚାର ଏଜେନ୍ସି ଆଇଆର୍ଏନ୍ଏ ରିପୋର୍ଟ କରିଛି ଯେ, ଏହି ସମାରୋହ ଜୁନ୍ ମାସରେ ହେବ, ସମ୍ଭବତଃ ଜୁନ୍ ତୃତୀୟ ସପ୍ତାହରେ ହୋଇପାରେ। ତେବେ କୌଣସି ନିଦ୍ଦିଷ୍ଟ ତାରିଖ ଏପର୍ଯ୍ୟନ୍ତ ସ୍ଥିର କରାଯାଇ ନାହିଁ।
ସୌଜନ୍ୟ ସମ୍ବାଦ