ନୂଆଦିଲ୍ଲୀ,୧୭।୭: ଦେଶର ବିଭିନ୍ନ ଜେଲ୍ରେ ବନ୍ଦୀ ଥିବା ବୃଦ୍ଧ, ଗୁରୁତର ଅସୁସ୍ଥ ଏବଂ ଅକ୍ଷମ କଏଦୀମାନଙ୍କ ପାଇଁ ସୁପ୍ରିମକୋର୍ଟ ଏକ ବଡ଼ ନିଷ୍ପତ୍ତି ଶୁଣାଇଛନ୍ତି। ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ଏଭଳି କଏଦୀମାନଙ୍କୁ ସମୟ ପୂର୍ବରୁ ମୁକ୍ତ କରିବା ପାଇଁ ଆସନ୍ତା ୩ ମାସ ମଧ୍ୟରେ ଏକ ସ୍ପଷ୍ଟ ନୀତି ପ୍ରସ୍ତୁତ କରି ବିଜ୍ଞପ୍ତି ପ୍ରକାଶ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ପ୍ରକ୍ରିୟାକୁ ସ୍ବଚ୍ଛ ଓ ସମୟବଦ୍ଧ କରିବା ପାଇଁ ପ୍ରଯୁକ୍ତିବିଦ୍ୟା ଆଧାରିତ ଡିଜିଟାଲ ବ୍ୟବସ୍ଥା ଲାଗୁ କରିବାକୁ ମଧ୍ୟ କୁହାଯାଇଛି।
ରାଷ୍ଟ୍ରୀୟ ଆଇନ ସେବା ପ୍ରାଧିକରଣ (ନାଲସା – NALSA) ପକ୍ଷରୁ ଦାୟର କରାଯାଇଥିବା ଏକ ଜନସ୍ବାର୍ଥ ମାମଲାର ଶୁଣାଣି ସମୟରେ ସର୍ବୋଚ୍ଚ ନ୍ୟାୟାଳୟ ଏହି ନିର୍ଦ୍ଦେଶ ଦେଇଛନ୍ତି। ଏହି ଆବେଦନରେ ୭୦ ବର୍ଷରୁ ଅଧିକ ବୟସ୍କ ଏବଂ ଦୁର୍ବଳ କଏଦୀମାନଙ୍କୁ ମାନବିକତା ଆଧାରରେ ମୁକ୍ତ କରିବା ପାଇଁ ସମାନ ନିୟମ ପ୍ରସ୍ତୁତ କରିବାକୁ ଦାବି କରାଯାଇଥିଲା।
ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ, କଏଦୀମାନଙ୍କ ସମୟପୂର୍ବ ମୁକ୍ତି ପାଇଁ ସମସ୍ତ ଆବେଦନ କେବଳ ‘e-Prisons’ ପୋର୍ଟାଲ ମାଧ୍ୟମରେ ହିଁ କରାଯିବ। ଏହି ଡିଜିଟାଲ ବ୍ୟବସ୍ଥା ଦ୍ୱାରା ସମ୍ପୂର୍ଣ୍ଣ ପ୍ରକ୍ରିୟାରେ ସ୍ବଚ୍ଛତା ଆସିବ ଏବଂ ମାମଲାଗୁଡ଼ିକର ଶୀଘ୍ର ସମାଧାନ ହୋଇପାରିବ।
କୋର୍ଟ କହିଛନ୍ତି ଯେ, ଏହି ପୋର୍ଟାଲରେ ଆବେଦନର ସମ୍ପୂର୍ଣ୍ଣ ପ୍ରକ୍ରିୟା ଡିଜିଟାଲ ଆକାରରେ ଅର୍ନ୍ତଭୁକ୍ତ ହେବା ଉଚିତ୍। ଏଥିରେ ଆବେଦନ ଦାଖଲ କରିବା ଠାରୁ ଆରମ୍ଭ କରି ମେଡିକାଲ ଯାଞ୍ଚ, ଜେଲ କର୍ତ୍ତୃପକ୍ଷଙ୍କ ରିପୋର୍ଟ, ମେଡିକାଲ ବୋର୍ଡର ସୁପାରିଶ, ବିଚାରାଧୀନ ସମୀକ୍ଷା କମିଟି (ଅଣ୍ଡରଟ୍ରାଏଲ ରିଭ୍ୟୁ କମିଟି)ର ମତାମତ, ସକ୍ଷମ କର୍ତ୍ତୃପକ୍ଷଙ୍କ ଚୂଡ଼ାନ୍ତ ନିଷ୍ପତ୍ତି ଏବଂ ଏହାର କାରଣ ସମ୍ପର୍କିତ ସମସ୍ତ ସୂଚନା ଉପଲବ୍ଧ ରହିବା ଆବଶ୍ୟକ।
ସୌଜନ୍ୟ ଧରିତ୍ରୀ
